ខេត្តបន្ទាយមានជ័យ ៖ តាមប្រភពព័ត៌មានពីស្រុកថ្មពួកបានឱ្យដឹងថា លោកអភិបាលរងស្រុកថ្មពួកមួយរូប និងមន្ត្រីបរិស្ថានមួយចំនួនត្រូវបានប្រជាពលរដ្ឋដែលខឹងសម្បាឈានដល់ការប្រើអំពើហិង្សាវាយទាត់ធាក់ បណ្តាលឱ្យរងរបួសកាលពីវេលាម៉ោងជិត១១ព្រឹកថ្ងៃទី២០ កុម្ភៈ នៅក្នុងភូមិប្រាសាទត្បែង ឃុំបន្ទាយឆ្មារក្នុងពេលអស់លោកទាំងនេះចុះទៅបំពេញការងារនៅទីនោះ ។
លោកអភិបាលរងស្រុកដែលរងរបួសត្រូវបានប្រាប់ថា គឺលោកជី សំនាង ចំណែកមន្ត្រីបរិស្ថានមួយចំនួនទៀតពុំត្រូវបានគេបង្ហើបឱ្យស្គាល់អត្តសញ្ញាណនៅឡើយទេ ។ ជុំវិញបញ្ហាខាងលើនេះ លោកជី សំនាង អភិបាលរងស្រុកថ្មពួក បានប្រាប់តាមទូរស័ព្ទនៅរសៀលថ្ងៃដដែលនោះ ថា រូបលោកនិងមន្ត្រីបរិស្ថានមួយចំនួន ត្រូវបានក្រុមប្រជាពលរដ្ឋវាយទាត់ធាក់ បណ្តាលឱ្យរងរបួសយ៉ាងធ្ងន់ ។
លោកអភិបាលរងស្រុកបន្តថា ពេលនេះលោកកើតទុក្ខមិនសុខចិត្តទេ និងបានដាក់ពាក្យបណ្តឹងទៅតុលាការរួចហើយដើម្បីឱ្យជួយរកយុត្តិធម៌ ព្រោះលោកមិនបានធ្វើអ្វីខុសឡើយ គឺចុះទៅបំពេញការងារតាមបញ្ជាលោកអភិបាលស្រុក និងខេត្ត ធ្វើអត្តសញ្ណាណកម្មប្រជាពលរដ្ឋនិងអត្តសញ្ញាណកម្មដីដែលត្រូវជូនប្រជាពលរដ្ឋ ដែលមានទំនាស់ជាមួយក្រុមហ៊ុនមួយឈ្មោះលាង ប៊ូ ដែលប្រជាពលរដ្ឋចំនួន៤២៨គ្រួសារបានប្តឹងតវ៉ាទៅសាលាខេត្តចោទថាបានរំលោភយកដីពួកគាត់ ។ ធាតុពិតរូប លោកនិងក្រុមការងារចុះទៅទីនោះដើម្បីរកយុត្តិធម៌ជូនប្រជាពលរដ្ឋតែប៉ុណ្ណោះ បែរជាក្រុមប្រជាពលរដ្ឋប្រើអំពើហិង្សាមកលើពួកលោកជាមន្ត្រីទៅវិញ ។
នៅថ្ងៃទី២១ កុម្ភៈ ភ្នាក់ងារកោះសន្តិភាពបានចុះទៅដល់កន្លែងកើតហេតុ ដែលតាមពិតគឺស្ថិតនៅក្នុងភូមិតាមាំុង ឃុំគោករមៀត មិនមែនស្ថិតក្នុងភូមិប្រាសាទត្បែង ឃុំបន្ទាយឆ្មារ ដូចការអះអាងរបស់លោកអភិបាលរងស្រុកដែលចោទប្រកាន់ថាប្រជាពលរដ្ឋវាយធ្វើបាបនោះទេ ។ នៅកន្លែងកើតហេតុពុំមានផ្ទះប្រជាពលរដ្ឋទេ និងជាកន្លែងស្ងាត់ដែលធ្វើឱ្យពិបាកក្នុងការរកការបំភ្លឺពីប្រជាពលរដ្ឋជាខ្លាំង ។ ជាមួយនេះអ្នកយកព័ត៌មានយើងក៏បានទៅដល់ភូមិប្រាសាទត្បែង ឃុំបន្ទាយឆ្មារ ដើម្បីសុំការបំភ្លឺពីអាជ្ញាធរ និងប្រជាពលរដ្ឋដែលមានជម្លោះជាមួយក្រុមហ៊ុនលាងប៊ូ ឬអ្នកពាក់ព័ន្ធក្នុងជម្លោះជាមួយលោក ជី សំនាង ជាអភិបាលរងស្រុកកាលពីម្សិលមិញ ។ ចំពោះលោក ឯក វណ្ណា មេភូមិប្រាសាទត្បែង មិនអាចសុំការបំភ្លឺបានទេ ព្រោះលោកមិននៅផ្ទះ ។
ពេលជួបជាមួយលេខាភូមិលោកវ៉យ វឿយ អាយុ៦៦ឆ្នាំ បានប្រាប់ថា ថ្ងៃកើតហេតុនោះរូបលោកមិនបានស្ថិតនៅកន្លែងកើតហេតុទេ ប៉ុន្តែអះអាងថា ប្រជាពលរដ្ឋក្នុងភូមិប្រាសាទត្បែងរបស់គាត់មានចំនួន៣១៧គ្រួសារមានបញ្ហាជាមួយក្រុមហ៊ុនឈ្មោះ លាងប៊ូ តាំងពីឆ្នាំ២០១០ មកម៉្លេះ ។លោកលេខាភូមិបន្តថា នៅឆ្នាំ១៩៩៩ ភូមិប្រាសាទត្បែងត្រូវបានបង្កើតឡើង ហើយឆ្នាំ២០០០ ចាប់ផ្តើមចែកដីជូនប្រជាពលរដ្ឋដើម្បីពង្រឹងព្រំដែន ។
លុះឆ្នាំ២០០៣ ក៏មានក្រុមមន្ត្រីបរិស្ថានចុះទៅបោះបង្គោលថាជាដីព្រះរាជក្រឹត្យ ។ លោកបន្តថា ដោយប្រជាពលរដ្ឋដឹងថា ដីដែលបែងចែកប៉ះចំដីព្រះរាជក្រឹត្យ ក៏នាំគ្នាផ្តិតមេដៃជូនថ្នាក់លើដើម្បីសុំដីព្រះរាជក្រឹត្យទាំងនេះ មកបង្កបង្កើនផលដោះស្រាយជីវភាពគ្រួសារនីមួយៗវិញ ។
ទោះជាយ៉ាងណា លោកលេខាភូមិរូបនេះប្រាប់ថា ដីទាំងនេះជាដីគ្រួសារកងទ័ពភាគច្រើន ដែលកាលណោះ គ្រួសារកងទ័ពក្នុងមួយគ្រួសារៗ ទទួលបាន៥ហិកតា ឯប្រជាពលរដ្ឋមួយគ្រួសារៗ ទទួលបាន៤ហិកតា និងមានជម្លោះជាមួយក្រុមហ៊ុនលាងប៊ូ តាំងពីឆ្នាំ២០១០រហូតមកទល់ពេលនេះដោយក្រុមហ៊ុនមួយនេះអះអាងថា គេមានច្បាប់ពីថ្នាក់លើដូចគ្នា ។ លោកលេខាភូមិរូបនេះប្រាប់ថា ហេតុការណ៍ពីម្សិលមិញ (២០ កុម្ភៈ) មានប្រជាពលរដ្ឋក្នុងភូមិរបស់គាត់ខ្លះដែរ នៅកន្លែងកើតហេតុ ប៉ុន្តែមិនដឹងថានរណានោះទេ ។
លោក ទេស នាថ មេភូមិតាមុាំង មិនអាចទាក់ទងសុំការបំភ្លឺបានទេ ខណៈអ្នកយកព័ត៌មានបានទៅដល់លំនៅឋានគាត់ បុ៉ន្តែបានជួបស្ត្រី៣នាក់ដែលស្ថិតក្នុងហេតុការណ៍កាលពីថ្ងៃទី២០ កុម្ភៈ នោះ ។ ស្ត្រីម្នាក់ឈ្មោះ ទិញ សុភាព អាយុ៤៤ឆ្នាំ អះអាងថា គាត់ជាម្ចាស់ដីកន្លែងកើតហេតុ ។ ស្ត្រីឈ្មោះ ទិញ សុភាព ក៏ដូចជាស្ត្រី២នាក់ទៀតបានប្រាប់ថា ហេតុការណ៍ដែលកើតឡើងនោះគឺបណ្តាលមកពីលោកអភិបាលរងស្រុកមិនព្រមស្តាប់តាមការហាមឃាត់របស់ប្រជាពលរដ្ឋ ដែលសុំម្តងហើយម្តងទៀតថា កុំសាងសង់អ្វីលើដីរបស់ប្រជាពលរដ្ឋ ។ ស្ត្រីឈ្មោះ ទិញ សុភាព អះអាងថា ដីរបស់គាត់ជាដីរបបយោធា ព្រោះប្តីគាត់ឈ្មោះ សុឹម ប៊ុនធឿន អាយុ៤៧ឆ្នាំ ជាយោធានៅខ្សែបន្ទាត់ព្រំដែនក្នុងភូមិសាស្ត្រស្រុកថ្មពួក ហើយការសាងសង់រោងលើដីរបស់គាត់ គឺគ្មាននរណាសុំគាត់ក្នុងនាមជាម្ចាស់ដីនោះទេ ។
ពួកគាត់ប្រាប់បន្តថា មុនហេតុការណ៍កើតឡើង៣ថ្ងៃ លោកជី សំនាង អភិបាលរងស្រុក ថ្មពួក និងមន្ត្រីមួយចំនួនទៀតបានទៅកន្លែងកើតហេតុ ហើយសាងសង់រោង បុ៉ន្តែត្រូវក្រុមអ្នកស្រុកមកពី៤ភូមិ រួមមានភូមិតាម៉ាំង ភូមិមហោស្រព ភូមិកណ្តោល ឃុំគោករមៀត និងភូមិប្រាសាទត្បែង ឃុំបន្ទាយឆ្មារ នាំគ្នារារាំងជាបន្តបន្ទាប់២លើក ។ លុះលើកទី៣ នេះនៅតែបន្តសាងសង់ទៀត ទើបប្រជាពលរដ្ឋជាង៧០នាក់នាំគ្នារុះរើ និងកាប់កម្ទេចចោលតែម្តងព្រោះយល់ថា រោងនោះអាចធ្វើឡើងដើម្បីក្រុមហ៊ុនលាងប៊ូ ។
ចំពោះព័ត៌មានដែលលោកអភិបាលរងស្រុកចោទថា រូបលោកនិងមន្ត្រីបរិស្ថានត្រូវបានប្រជាពលរដ្ឋនាំគ្នាព្រួតវាយរបួសធ្ងន់នោះ ត្រូវបានស្ត្រីទាំង៣នាក់ខាងលើអះអាងថា វាជារឿងមិនពិតទេ ។ អ្នកស្រុកនាំគ្នារុញច្រាន ឬទាញដៃលោកឱ្យចេញពីកន្លែងកើតហេតុ កុំឱ្យបន្តការសាងសង់រោង ហើយមន្ត្រីបរិស្ថានម្នាក់បានរត់ធ្លាក់ប្រឡាយតូចមួយដោយខ្លួនឯងពេលប្រជាពលរដ្ឋតាមរករឿង ។
ក្រុមហ៊ុនលាងប៊ូដែលជាប់ពាក់ព័ន្ធថា រំលោភយកដីនោះ កោះសន្តិភាពមិនអាចទាក់ទងសុំការបំភ្លឺបានទេ ព្រោះមិនស្គាល់លេខទូរស័ព្ទ ។ នៅកន្លែងកើតហេតុ គេឃើញឈើទាំងឡាយដែលទំនងត្រូវបានគេសាងសង់ជារោងហើយនោះស្ថិតនៅរាយប៉ាយ ហើយសសរធំៗត្រូវគេកាប់ដាច់រាយព្រោះដកមិនរួច និងសសររោងខ្លះត្រូវដុតកម្ទេចចោល ដែលមើលទៅទំនងជារឿងនេះមិនធម្មតាទេ ៕
ចែករំលែកព័តមាននេះ