ខេត្តមណ្ឌលគិរី ៖ អភិបាលស្រុកអូររាំង កំពុងត្រូវបានមហាជនចោទប្រកាន់ថា កំពុងប្រើល្បិចកន្ទេលធំបន្លំដេក ដោយបានបញ្ជាគ្រឿងចក្រចូលទៅឈូសឆាយដីព្រៃស្រល់ នៅចំណុចភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី តែបែកការណ៍ដល់អភិបាលខេត្តក៏ដកគ្រឿងចក្រវិញ កាលពីល្ងាចថ្ងៃទី១៣ សីហា ២០១៩ ។
យោងតាមព័ត៌មានដែលកោះសន្តិភាពទទួលបានឲ្យថា គ្រឿងចក្រជាច្រើនដូចជាអាប៊ុល១គ្រឿង អេស្កាវ៉ាទ័រ១គ្រឿង រថយន្តឡង់គ្រីស័រ២គ្រឿង មួយគ្រឿងកែច្នៃសម្រាប់ដឹកប្រេង១គ្រឿង និងរថយន្តធំសម្រាប់ដឹកគ្រឿងចក្រ១គ្រឿង ។ ក្រុមនេះ បានធ្វើសកម្មភាពឈូសឆាយផ្លូវក្នុងព្រៃមួយខ្សែ ទទឹងជិត២០ម៉ែត្រ ឈូសកាត់ព្រៃឈើ និងដើមស្រល់រាប់រយពាន់ម៉ែត្រ ដោយមិនមានការអនុញ្ញាតពីក្រសួង ឬរដ្ឋបាលសាលាខេត្តមណ្ឌលគិរីនោះឡើយ ពោលគឺមានត្រឹមលិខិតជូនដំណឹងប៉ុណ្ណោះ ។
ជាការកត់សម្គាល់ ការឈូសឆាយផ្លូវកាត់ព្រៃចម្ការដើមស្រល់នេះ ត្រូវបានគេរាយការណ៍ថា លោក សៀក មុន្នី អភិបាលស្រុកអាចបានចេតនាសង់ផ្លូវចូលទៅដីរបស់ដៃគូគាត់ឈ្មោះ ថាំង រិទ្ឋី ដែលប្រមូលទិញដីរដ្ឋ ដោយឲ្យអ្នកភូមិជាអ្នកឈរលក់ ដែលមានទីតាំងក្នុងព្រៃរាប់រយហិចតា។ហើយរណ្តៅដីមួយចំនួនគឺគេបានកប់ដើមស្រល់ដើម្បីបំបាត់ដាន។
ទាក់ទិនករណីនេះលោក សៀក មុន្នី អភិបាលស្រុកអូររាំងបានឲ្យអ្នកកាសែតដឹងថា «ចំពោះការឈូសឆាយ ហើយដកគ្រឿងចក្រចេញនេះ គឺកុំឲ្យមានការយល់ច្រលំគ្នាច្រើន ចឹងខ្ញុំគិតថា សម្រេចចិត្តឲ្យគេដកគ្រឿងចក្រសិន ចាំមើលឲ្យបានយល់គ្នាសិន ចាំយើងបន្តទៅទៀត ព្រោះខ្ញុំមិនចង់ធ្វើអី ឲ្យមានការយល់ច្រលំទាំងអស់គ្ជួនកាលគេគិតថា យើងចូលទៅឈូសព្រៃឈូសអី អ៊ីចឹងគឺខ្ញុំ រង់ចាំជជែកការងារជាមួយខាងខេត្តសិន ដើម្បីឲ្យគាត់ដឹងពីគម្រោង ដែលយើងធ្វើ អភិវឌ្ឍន៍នៅក្នុងស្រុក»។ (សម្រួលដោយ៖ស្រីណា)
ព័ត៌មានបន្ថែមនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ