រាជធានីភ្នំពេញ ៖ នៅទីបំផុតជើងខ្លាំងល្បីឈ្មោះពីររូបគឺកីឡាករឯម វិចិត្រ មកពីក្លិបឫទ្ធិពោធិសែនជ័យ និងកីឡាកររ៉ាក់ វិឆ័យ មកពីក្លិបកងពលតូចលេខ៧០ ត្រូវគេផ្គូផ្គងឱ្យប៉ះគ្នាមែននៅលើសង្វៀនទូរទស្សន៍បាយ័នស្ទឹងមានជ័យ នាល្ងាចថ្ងៃទី២២ កុម្ភៈនេះ ។
រាជធានីភ្នំពេញ ៖ នៅទីបំផុតជើងខ្លាំងល្បីឈ្មោះពីររូបគឺកីឡាករឯម វិចិត្រ មកពីក្លិបឫទ្ធិពោធិសែនជ័យ និងកីឡាកររ៉ាក់ វិឆ័យ មកពីក្លិបកងពលតូចលេខ៧០ ត្រូវគេផ្គូផ្គងឱ្យប៉ះគ្នាមែននៅលើសង្វៀនទូរទស្សន៍បាយ័នស្ទឹងមានជ័យ នាល្ងាចថ្ងៃទី២២ កុម្ភៈនេះ ។ ក្រុមអ្នកគាំទ្រកំពុងផ្តោតការចោទសួរយ៉ាងខ្លាំងថា រវាងកីឡាករទាំងពីរនេះ អ្នកណាជាអ្នកឈ្នះ បើពេលនេះពួកគេកំពុងល្បីឈ្មោះ និងស្ទុះឡើងកូដប្រហាក់ប្រហែលគ្នាបែបនេះ ។
នាពេលកន្លងមក ជើងខ្លាំងទាំងពីរនាក់មិនធ្លាប់បានជួបគ្នាទេ បើទោះជាគេម្នាក់ៗត្រូវអ្នកស្នេហាកីឡាប្រដាល់ភាគច្រើនកោតសរសើេរថា ខ្លាំង និងមានសន្ទុះក្នុងការវាយលុកបានល្អដូចគ្នា។ ក្រុមអ្នកវិភាគនិយាយថា ខ្លាចាស់ ឯម វិចិត្រ ថ្វីត្បិតតែមើលទៅចង្កូមរាងរេចរឹលជាងមុនបន្តិច បុ៉ន្តែអ្នកណាក៏ដឹងដែរថា ចង្កូមរបស់គេនៅមានលទ្ធភាពគ្រប់គ្រាន់សម្រាប់ត្របាក់កីឡាកររ៉ាក់ វិឆ័យ មិនឱ្យហើបមាត់បាន ។ ជាក់ស្តែង មុននេះបន្តិចកីឡាករអ៊ុំ ចំរើន មកពីក្លិបតាឡីដំរីមានឫទ្ធិ ដែលលឹបលម្តងឈប់ប្រកួត និងម្តងចេញមុខមកប្រកួតវិញ ព្រោះតែហេតុផលជាប់សិក្សាថ្នាក់ទី១២ ដែលជាថ្នាក់ត្រូវប្រឡងយកសញ្ញាបត្រនោះ ក៏ទើបនឹងសន្លប់ក្រោមដៃរបស់គេយ៉ាងអាម៉ាស់ផងដែរកាលពីថ្ងៃទី៩ កុម្ភៈកន្លងទៅ ។ ទោះបីយ៉ាងណា ជ័យជម្នះលើកីឡាករអ៊ុំ ចំរើន ហាក់មិនត្រូវបានគេយកជាការនោះទេ ដោយសារតែកីឡាកររូបនេះតាំងពីជក់សូរសិក្សា និងជាប់ដែរស្បែកជើង ឈប់រវីរវល់នឹងប្រដាល់ស៊ប់មក គឺឡើងប្រកួតជាមួយអ្នកណាក៏សន្លប់ក្រោមដៃអ្នកនោះស្ទើរតែគ្រប់លើកនាបុ៉ន្មានលើកចុងក្រោយ ។ ដោយឡែក សម្រាប់កីឡាកររ៉ាក់ វិឆ័យ វិញ គេក៏មិនអន់នោះដែរ ដោយសារតែក្នុងពេលកន្លងមក គេធ្លាប់បំបាក់មុខសិស្សច្បង និងសិស្សស្រករខ្លួនដែលមានឈ្មោះល្បីឱ្យចុះចាញ់ច្រើនលើករួចមកហើយនៅលើសង្វៀន ។ ឯម វិចិត្រ ត្រូវគេមើលឃើញថា មានវ័យច្រើនបន្តិច បុ៉ន្តែផ្លែជង្គង់ និងកែងរបស់គេមានសភាពមុតស្រួចល្អច្រើនណាស់សម្រាប់យកឈ្នះទៅលើកីឡាករស្រករក្រោយ។ ម្យ៉ាងកីឡាកររូបនោះក៏រហ័ស ដែលពិបាកឱ្យកីឡាកររូបណាបំបាក់បានផង ។
ក្រុមអ្នកវិភាគបន្តថា កីឡាកររ៉ាក់ វិឆ័យ ក៏មិនមែនជាក្មេងបុ៉ន្មានដែរ ។ បើទោះជាការប្រដាល់នាពេលកន្លងមកនៅតែមានសន្ទុះល្អ ដែលអាចនិយាយបានថា ចាប់ផ្តើមឡើងសន្ទុះមកវិញ ក៏ការប្រកួតរបស់គេកន្លងមកត្រូវគេមើលឃើញនៅតែមិនអស់រឿងស្ពឹកស្រពន់ក្នុងការវាយលុក ។ រ៉ាក់ វិឆ័យ ប្រកួតកន្លងមកមិនសូវទទួលបានផ្លែផ្កាឡើយ ពោលគឺបើគិតស្ថិតិចុងក្រោយអ្នកណាក៏មើលឃើញថា គេបានពើបប្រទះនឹងការបរាជ័យច្រើនជាងទទួលជ័យជម្នះ។ ជាក់ស្តែង កាលពីពាក់កណ្តាលខែកុម្ភៈកន្លងទៅ គេទើបតែបានបំបាក់កីឡាករពៅ សីហា មកពីក្លិបរាជសីហ៍ខេត្តបន្ទាយមានជ័យ ឱ្យចុះចាញ់ក្នុងទឹកទី៣ ដោយភាពហេងស៊យបុ៉ណ្ណោះ ទើបពិបាកថា តើក្នុងជំនួបប៉ះជាមួយ ឯម វិចិត្រ អាចទៅរួចសម្រាប់រូបគេបានឬយ៉ាងណា ? ទោះជាបែបនេះក៏ដោយ ក៏ការជួបប្រកួតជាមួយ ឯម វិចិត្រ លើកនេះត្រូវបានគេរំពឹងថា មិនអាចឈ្នះ រ៉ាក់ វិឆ័យ បានឡើយ ដោយសារតែគេដ្បិតថាវាយមានភាពស្ពឹកមែន បុ៉ន្តែសម្រាប់មួយស្នៀតៗ និងមួយដៃៗរបស់គេ គឺស្ទើរតែគ្មានមួយក្បាច់ណាដែលបោះដៃទៅហើយមិនត្រូវទៅលើគូប្រកួតនោះទេ ។ ថ្វីដ្បិត ឯម វិចិត្រ មានការរីកចម្រើនជាងមុន បុ៉ន្តែ រ៉ាក់ វិឆ័យ ក៏មិនអន់នោះដែរសម្រាប់ការវាយលុក ដែលគេមើលឃើញមិនធម្មតានាពេលថ្មីៗ ។ ចាំមើល តើរវាង រ៉ាក់ វិឆ័យ និង ឯម វិចិត្រ នរណាជាអ្នកឈ្នះសម្រាប់ជំនួបលើកដំបូងនេះ ? ។
ក្នុងវេទិកានោះដែរ ក៏មានការប្រកួតជម្រុះក្នុងជុំទី២ ដើម្បីស្វែងរកអ្នកឈ្នះបន្តទៅវាយដណ្តើមយកពានរង្វាន់ទូរទស្សន៍ BTV ក្នុងប្រភេទទម្ងន់៥១គីឡូក្រាមនៅល្ងាចថ្ងៃសៅរ៍នេះដែរ ដោយក្នុងនោះគឺមានកីឡាករអ៊ុន រតនា មកពីក្លិបតាឡីដំរីមានរិទ្ធ នឹងត្រូវប្រកួតជាមួយកីឡាកររិទ្ធ កៅ មកពីមជ្ឈមណ្ឌលកីឡាខ.ភ.ម។ អ្នកប្រដាល់ទាំងពីរនេះមិនធ្លាប់ប៉ះគ្នាទេពីមុនមក។ អ៊ុន រតនា កាលពីជុំទី១ វាយចាញ់កីឡាករជួប ជាង មកពីក្លិបនិរោធមានជ័យ ក្នុងទឹកទី៣ ខណៈដែលកីឡាកររិទ្ធ កៅ គឺវាយចាញ់កីឡាករចៅ រស់ មកពីក្លិបចាក់អង្រែមានជ័យដូចគ្នា ដោយពិន្ទុនៅលើសង្វៀន ។ ដូច្នេះសម្រាប់អ្នកចាញ់ និងអ្នកចាញ់ត្រូវប៉ះគ្នានេះ គេមិនដឹងថាអ្នកណានឹងមានប្រៀបនោះទេ ក្នុងពេលដែលពួកគេទើបតែក្តាប់បាន១ពិន្ទុម្នាក់ ដែលដាច់ខាតត្រូវទាមទារប្រឹងប្រកួតដោយអស់ពីចិត្តបំផុតដើម្បីទទួលបាន៣ពិន្ទុនៅជុំទី២នេះ ។ ក្នុងចំណោមពួកគេ បើអ្នកណាចាញ់នឹងអស់សិទ្ធិឡើងដណ្តើមខ្សែក្រវាត់តែម្តង បើទោះជាម្នាក់ៗនៅមួយប្រកួតចុងក្រោយទៀតក្តី ។ ចំពោះការប្រកួតមួយគូទៀត កីឡាករចៅ រស់ មកពីក្លិបចាក់អង្រែមានជ័យ នឹងត្រូវជួបប្រកួតជាមួយកីឡាករជួប ជាង មកពីក្លិបនិរោធមានជ័យ ។
អ្នកប្រដាល់ទាំងពីរនេះមិនដែលប៉ះគ្នាពីមុនមកដូចគ្នា ។ សម្រាប់ពីរនាក់នេះសុទ្ធតែមានទឹកមាត់លេបដូចគ្នា ដោយសារម្នាក់ៗមាន៣ពិន្ទុរួចទៅហើយ ទោះយ៉ាងណា សម្រាប់អ្នកចាញ់គឺលើកលែងតែយកឈ្នះក្នុងជុំទី៣ ទើបអាចកំណត់បានថា មានសិទ្ធិឡើងទៅប្រកួតដណ្តើមខ្សែក្រវាត់។ អុីចឹងហើយ កីឡាករទាំងពីរពិតជាប្រឹងរៀងខ្លួនៗដើម្បីបានឈ្នះដោយស្វ័យប្រវត្តិ ដោយមិនចាំបាច់នៅភ័យអរៗក្នុងជុំចុងក្រោយ ៕
ចែករំលែកព័តមាននេះ