រាជធានីភ្នំពេញ ៖ វគ្គសិក្សាសាមគ្គីអូឡាំពិកស្តីពីរដ្ឋបាលកីឡា ដែលចាប់ផ្តើមពីថ្ងៃទី១៨ កុម្ភៈនោះ បានបញ្ចប់ហើយនៅល្ងាចថ្ងៃទី២០ កុម្ភៈ ឆ្នាំ២០១៤ ហើយពិធីបិទវគ្គត្រូវបានគេរៀបចំធ្វើនៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ស្ថិតក្រោមអធិប តីភាពលោករដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ថោង ខុន
រាជធានីភ្នំពេញ ៖ វគ្គសិក្សាសាមគ្គីអូឡាំពិកស្តីពីរដ្ឋបាលកីឡា ដែលចាប់ផ្តើមពីថ្ងៃទី១៨ កុម្ភៈនោះ បានបញ្ចប់ហើយនៅល្ងាចថ្ងៃទី២០ កុម្ភៈ ឆ្នាំ២០១៤ ហើយពិធីបិទវគ្គត្រូវបានគេរៀបចំធ្វើនៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ស្ថិតក្រោមអធិប តីភាពលោករដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ថោង ខុន ដោយមានការចូលរួមពីលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ព្រមទាំងគ្រូឧទ្ទេសនាម និងមន្ត្រីកីឡាជាច្រើនរូប ។
វគ្គសិក្សានេះមានអ្នកយកព័ត៌មានមកពី៣បណ្តាញផ្សព្វផ្សាយចូលរួម គឺសារព័ត៌មានបោះពុម្ព (កាសែត ទស្សនាវដ្តី) សោតទស្សន៍ (ទូរទស្សន៍) និងគេហទំព័រសរុប២៤អង្គភាព ស្មើនឹង៤៧នាក់ ។ មានប្រសាសន៍នាឱកាសនោះ លោករដ្ឋមន្ត្រី ថោង ខុន បានកោតសរសើរដល់បណ្តាអ្នកសារព័ត៌មានជាតិទាំងអស់ដែលមានឆន្ទៈ និងស្មារតីខិតខំឈ្មុសឈ្មុលក្នុងការយកព័ត៌មានទៅផ្សព្វផ្សាយបានកាន់តែល្អប្រសើរ ។ កីឡាជាផ្នែកមួយនៃវប្បធម៌ ហើយក៏ជាអត្តសញ្ញាណជាតិមួយដ៏សំខាន់ផងដែរ ដូច្នេះសម្រាប់អ្នកយកព័ត៌មានយើងដែលមានរាល់ថ្ងៃនេះនៅមិនទាន់គ្រប់គ្រាន់ទេ ។ ទោះបីយ៉ាងណា ប្អូនៗដែលមានក្នុងពេលបច្ចុប្បន្នត្រូវខិតខំធ្វើជាគំរូដល់មនុស្សជំនាន់ក្រោយទៀត ព្រោះនៅសល់តែ៩ឆ្នាំទៅមុខទៀត យើងនឹងធ្វើជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេមហើយ ។ លោកថោង ខុន បានបន្តថា យើងឃើញបណ្តាប្រទេសមួយចំនួនគេបានប្រើប្រាស់ជាអក្សរឡាតាំងអស់ហើយ នៅឡើយតែកម្ពុជា ។ ភាសានិយាយគឺមានភាពងាយស្រួល តែចំពោះភាសាសរសេរវិញ គឺមិនធម្មតានោះទេ ដោយយើងបានយកអក្សរបាលីមានសក់ មានជើង មានព្យាង្គតម្រួតមកប្រើ តែនោះជាអត្តសញ្ញាណជាតិរបស់យើងដែលមិនមានអ្នកណាបំបាត់បានតាមរយៈអក្សរនេះ ។
ឆ្លៀតក្នុងឱកាសនេះ លោកថោង ខុន បានថ្លែងអំណរគុណដល់វាគ្មិនដែលបានចូលរួមចែករំលែកនូវចំណេះដឹងដល់បណ្តាអ្នកសារព័ត៌មានជាតិអំពីបញ្ហាគុណភាពអត្ថបទជំនាញកីឡានេះ ដើម្បីជាស្ពានបន្តទៅថ្ងៃមុខ សំដៅធ្វើឱ្យអ្នកសារព័ត៌មានយល់កាន់តែច្បាស់អំពីអក្សរសាស្ត្រខ្មែរ។ ជាមួយគ្នានេះ លោកបានសំណូមពរឱ្យអ្នកអានសារព័ត៌មានតាមទូរទស្សន៍គួរតែអាន ឬមើលឱ្យបានមួយចប់មុននឹងអានជាផ្លូវការនោះដើម្បីចៀសវាងនូវកំហុសនានាដែលកើតមានឡើង ។
សូមបញ្ជាក់ថា វគ្គសិក្សាដែលមានរយៈពេល៣ថ្ងៃនេះ វាគ្មិនសំខាន់ៗដែលជាគ្រូឧទ្ទេសនាមមានលោកបណ្ឌិតច័ន្ទ សំណព្វ អនុប្រធានរាជបណ្ឌិត្យសភាកម្ពុជា ធ្វើបទបង្ហាញលើប្រធានបទ ការរៀបចំរចនាសម្ព័ន្ធប្រយោគ និងអក្ខរាវិរុទ្ធក្នុងភាសាខ្មែរ, លោកឌឹម សុវណ្ណារុំ ជំនួយការអមទីស្តីការគណៈរដ្ឋមន្ត្រី និងជាប្រធានផ្នែកកិច្ចការសាធារណៈនៃសាលាក្តីខ្មែរក្រហម ធ្វើបទបង្ហាញលើប្រធានបទ ខ្លឹមសារព័ត៌មាន របៀបរៀបចំបទយកការណ៍សោតទស្សន៍, លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ធ្វើបទបង្ហាញលើប្រធានបទ ការប្រើប្រាស់ភាសាខ្មែរ បច្ចេកទេសកីឡា ពាក្យពេចន៍កីឡា ក្រមសីលធម៌កីឡា (Fair Play) និងលោកកែវ សារ៉េត នាយកមជ្ឈមណ្ឌលជាតិហ្វឹកហ្វឺនកីឡា ធ្វើបទបង្ហាញលើប្រធានបទ ប្រភេទកីឡាបាល់ទាត់ ពាក្យពេចន៍ និងច្បាប់ប្រកួតផងដែរ ៕
ចែករំលែកព័តមាននេះ