រាជធានីភ្នំពេញ៖​ ​រដ្ឋមន្រ្តីការបរទេសអូស្រ្តាលី ​​លោកស្រី ជូលី ប៊ីស្សប​ ​នឹងមកដល់ប្រទេសកម្ពុជា ​​នាយប់ថ្ងៃទី២១ ​​កុម្ភៈ ​​២០១៤ ។

នេះបើយោង​​តាមលោក ​កុយ គួង​ ​អ្នកនំាពាក្យ​ក្រសួង​ការបរទេស​​និងសហប្រតិបត្តិការ​អន្តរជាតិ ​​ដែលបា្រប់កោះសន្តិភាព​​តាមទូរស័ព្ទ​​នៅប៉ុន្មាននាទីមុននេះ ។

បើតាមលោក​ ​កុយ គួង ​​លោកស្រីរដ្ឋមន្រ្តី​ការបរទេស​អូស្រ្តាលី​ ​នឹងជួបពិភាក្សាការងារ​​ទ្វេភាគីជាមួយ​លោក​ឧបនាយករដ្ឋមន្រ្តី ​​ហោ ណំាហុង​ ​រដ្ឋមន្រ្តីក្រសួង​​ការបរទេស​​និ​ងសហប្រតិបត្តិការ​អន្តរជាតិ នៅម៉ោង១១ថ្ងៃ​ត្រង់​ថ្ងៃទី២២​ ​កុម្ភៈ ​​២០១៤ ។

តាមកម្មវិធី​ដែល​បានគ្រោងទុក​នៅ​ម៉ោង៩ព្រឹកស្អែកដែរ​​ លោកស្រី ជូលី ប៊ីស្សប ​​ក៏នឹងចូលជួបសម្តែង​ការ​គួរសម​និងធ្វើសវនាការ​ជាមួយ​សម្តេច​នាយករដ្ឋមន្រ្តី​ ​ហ៊ុន សែន​ ​នៅវិមាន​សន្តិភាព​ទីស្តីការ​នាយករដ្ឋមន្រ្តី ។

គួរបញ្ជាក់ថា​ ​ដំណើរទស្សនកិច្ច​​ផ្លូវការរបស់លោកស្រី​​រដ្ឋមន្រ្តីការបរទេស​​អូស្រ្តាលី​នៅក្នុង​ប្រទេសកម្ពុជារយៈពេលពីរថ្ងៃ​​ដោយចាប់ផ្តើមពីថ្ងៃសុក្រនេះ ​​ធ្វើឡើងតាមការអញ្ជើញ​​របស់លោក​ប្រមុខការទូត​ខ្មែរ ហោ ណាំហុង​ ​ហើយបើយោងតាម​សេចក្តី​ជូនព័ត៌មាន​របស់​ក្រសួងការបរទេសកម្ពុជា ​​លោកស្រីក៏នឹងជួបពិភាក្សា​ការងារ​ទ្វេភាគី​ជាមួយលោក​ឧបនាយករដ្ឋមន្រ្តី ​​ស ខេង ​​រដ្ឋមន្រ្តីក្រសួងមហាផ្ទៃ​ផងដែរ ។

មកដល់រសៀលថ្ងៃ​ទី២១កុម្ភៈនេះ​ មិនទាន់មានប្រភពណា​បង្ហើបឲ្យដឹងថា ​ប្រមុខការទូតកម្ពុជានិងអូស្រ្តាលី​ នឹងពិភាក្សាលើបញ្ហាអ្វីខ្លះ​នោះនៅឡើយទេ​ ប៉ុន្តែការពង្រឹងពង្រីក​​និងកិច្ច​សហប្រតិបត្តិការ​ទំាង​វិស័យការទូត ​និងសេដ្ឋកិច្ច​ ​រវាងប្រទេស​អាចជារបៀបវារៈមួយ​ក្នុងចំណោមរបៀបវារៈជាច្រើនទៀតដែលភាគី​ទំាងពីរអាច​នឹង​លើកយកមកជជែកគ្នា ៕