ខេត្តស្វាយរៀង ៖ លោកទេសរដ្ឋមន្ដ្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងថា «ទោះបីអត្រាអ្នកឆ្លងជងឺអេដស៍នៅខេត្តស្វាយរៀងមានការថយចុះក៏ពិតមែន តែយើងមិនត្រូវមើលស្រាលនោះទេ ដូច្នេះមន្ត្រីដែលពាក់ពន្ធ័ទាំងអស់ត្រូវបន្តសកម្មភាពប្រយុទ្ធប្រឆាំងនឹងជំងឺអេដស៍ឲ្យបានខ្លាំងក្លាបន្ថែមទៀត ដើម្បីចូលរួមសំរេចគោលដៅថ្នាក់ជាតិ៩៥-៩៥-៩៥ ឆ្នាំ២០២០ និងឈានទៅលុបបំបាត់ការឆ្លងថ្មីនៅឆ្នាំ២០២៥-២០៣០»។
លោកទេសរដ្ឋមន្ត្រីអៀង មូលី បានលើកឡើងបែបនេះក្នុងសិក្ខាសាលាស្តីពីការឆ្លើយតបនឹងមេរោគអេដស៍ និងជំងឺអេដស៍ជាពហុវិស័យរបស់គណៈកម្មាធិការប្រយុទ្ធនឹងជំងឺអេដស៍ខេត្តស្វាយរៀង ឆមាសទី២ ឆ្នាំ២០១៩ ដែលបានធ្វើឡើងនៅមន្ទីរសុខាភិបាលខេត្តស្វាយរៀង កាលពីរសៀលថ្ងៃទី១៣ ខែសីហា ឆ្នាំ២០១៩ ដែលមានការចូលពីថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍ និងលោកតូច ប៉ូលីវ៉ា អភិបាលរងខេត្ត ជាប្រធានគណៈកម្មាធិការប្រយុទ្ធនឹងជំងឺអេដស៍ខេត្ត លោកប្រធានមន្ទីរសុខាភិបាលខេត្តតំណាងលេខាធិការដ្ឋានប្រយុទ្ធនឹងជំងឺអេដស៍ខេត្ត តំណាងមន្ទីរពាក់ព័ន្ធក្នុងខេត្ត តំណាងអង្គការសង្គមស៊ីវិល(AHF និងCPN+) អាជ្ញាធរដែនដី និងកងកម្លាំងប្រដាប់អាវុធប្រមាណជាង៥០នាក់។
លោកអៀង មូលី បានថ្លែងនូវការកោតសរសើរដល់គណៈកម្មាធិការប្រយុទ្ធនិងជំង្ងឺអេដស៍ខេត្តនិងអង្គភាពដែលពាក់ពន្ធ័ទាំងអស់នៅក្នុងខេត្តដែលបានចូលរួមអនុវត្តភារកិច្ច និងសកម្មភាពយ៉ាងផុសផុលប្រយុទ្ធនឹងជំងឺអេដស៍ដែលធ្វើឲ្យអត្រាអ្នកឆ្លងជំងឺនេះថយចុះ។
លោកអៀង មូលី បានបញ្ជាក់ថា សិក្ខាសាលានេះធ្វើឡើងដើម្បីពិនិត្យមើលវឌ្ឍនភាព និងសិក្សាស្វែងយល់អំពីស្ថានភាពប្រយុទ្ធនឹងជំងឺអេដស៍ជាពហុវិស័យនៅថ្នាក់ក្រោមជាតិតាមរយៈការដាក់បញ្ចូលការងារប្រយុទ្ធនឹងជំងឺអេដស៍ក្នុងគោលនយោបាយភូមិឃុំមានសុវត្ថិភាព ឈានឆ្ពោះទៅសម្រេចគោលដៅ៩៥-៩៥-៩៥ នៅឆ្នាំ២០២៥ ។
ម្យ៉ាងមួយវិញទៀត សូមគណៈកម្មាធិការប្រយុទ្ធនឹងជំងឺអេដស៍ និងអ្នកដែលពាក់ពន្ធ័ទាំងអស់ត្រូវណែនាំដល់បណ្តារោងចក្រ កាស៊ីណូទាំងអស់នៅក្នុងខេត្តស្វាយរៀងកុំរើសអើងចំពោះអ្នកផ្ទុកមេរោគអេដស៍ ត្រូវទទួលពួកគាត់ឲ្យបានបម្រើការងារ និងជំរុញលើកទឹកចិត្តដល់ពួកគាត់ឲ្យខិតខំធ្វើការងារថែរក្សាសុខភាព ព្រមទាំងលេបថ្នាំប្រឆាំងមេរោគអេដស៍ឲ្យបានត្រឹមត្រូវទៅតាមការណែនាំរបស់គ្រូពេទ្យផងដែរ។
លោកតូច ប៉ូលីវ៉ា អភិបាលរងខេត្ត ជាប្រធានគណៈកម្មាធិការប្រយុទ្ធនឹងជំងឺអេដស៍ខេត្ត បានឲ្យដឹងថា ស្ថានភាពរាលដាលនៃមេរោគអេដស៍ក្នុងខេត្តស្វាយរៀង តាមការប៉ាន់ស្មាន និងព្យាករណ៍នៅឆ្នាំ២០១៩ មានអ្នកផ្ទុកមេរោគអេដស៍ចំនួន១,៧៩១នាក់ ករណីឆ្លងថ្មី១៤នាក់ និងស្លាប់៧៧នាក់ ។ ក្នុងការឆ្លើយតបនឹងការបង្ការនិងថែទាំព្យាបាលដល់អ្នកជម្ងឺអេដស៍ឆមាសទី១ឆ្នាំ២០១៩នេះ មានសេវាធ្វើតេស្តឈាមរកមេរោគអេដស៍ មានអតិថិជនធ្វើតេស្តចំនួន១២,៨២២នាក់ វិជ្ជមានចំនួន៣៣ករណី និងបានបញ្ជូនទៅទទួលសេវាផ្តល់ឱសថប្រឆាំងមេរោគអេដស៍ចំនួន៣០នាក់ត្រូវជា៩០ភាគរយ និងអ្នកជំងឺអេដស៍សកម្មកំពុងទទួលសេវាសរុបមានចំនួន១,៣៩៥នាក់ ក្នុងនោះអ្នកទទួលឱសថប្រឆាំងមេរោគអេដស៍ចំនួន១,៣៩៣នាក់ ៩៩ភាគរយមានបន្ទុកមេរោគទាប ស្លាប់១៥នាក់ និងលះបង់៥នាក់។
លោកបានបញ្ជាក់ថា បណ្តាញអ្នកផ្ទុកមេរោគអេដស៍ប្រចាំខេត្ត គ្រប់គ្រងអ្នកជម្ងឺអេដស៍ចំនួន១,៣២៧នាក់ ក្នុងនោះមាន២៣៥គ្រួសារមានបណ្ណ័មូលនិធិសមធម៌ ហើយយើងទទួលបានលទ្ធផលល្អនាពេលនេះ ដោយសារមានការគាំទ្រពីថ្នាក់ជាតិនិងក្រោមជាតិ ព្រមទាំងអង្គការដៃគូ រួមមានអង្គការAHF, អង្គការCHC, បណ្តាញអ្នកផ្ទុកមេរោគអេដស៍ប្រចាំខេត្តសាខាកាកបាទក្រហមខេត្ត និងសកម្មភាពចូលរួមរបស់វិស័យឯកជនផងដែរ។
ទន្ទឹមនឹងនោះ យើងក៏មានបញ្ហាប្រឈមមួយចំនួនដូចជាអ្នកផ្ទុកមេរោគអេដស៍/អ្នកជំងឺអេដស៍ នៅមានជីវភាពក្រីក្រពុំមានពេលវេលាគ្រប់គ្រាន់មកពិនិត្យដោយសារចំណាកស្រុករកការងារ ហើយអង្គការដៃគូមួយចំនួនមានកាត់បន្ថយថវិកាពីមួយឆ្នាំទៅមួយឆ្នាំដែលពុំមានថវិកាគ្រប់គ្រាន់ក្នុងការអនុវត្តសកម្មភាពអោយបានគ្រប់ជ្រុងជ្រោយ៕ (កែសម្រួលដោយ ៖ ធីតា)
ចែករំលែកព័តមាននេះ