ជំនន់ទឹកភ្លៀងក្នុងភូមិសាស្រ្ដស្រុកអង្គរជុំ បង្កផលប៉ះពាល់ដល់ពលរដ្ឋ
- សៀមរាប
ខេត្តសៀមរាប ៖ នៅថ្ងៃទី១៣ ខែវិច្ឆិកា ឆ្នាំ២០២៥ លោក អឹុង គឹមលាង អភិបាលរងខេត្ដ តំណាងឯកឧត្តម…
ខេត្តសៀមរាប ៖ នៅថ្ងៃទី១៣ ខែវិច្ឆិកា ឆ្នាំ២០២៥ លោក អឹុង គឹមលាង អភិបាលរងខេត្ដ តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្ដសៀមរាប បានដឹកនាំក្រុមការងារចុះពិនិត្យ ដើម្បីឆ្លើយតបទៅនឹងផលប៉ះពាល់បង្កឡើងដោយជំនន់ទឹកភ្លៀង ក្នុងភូមិសាស្ដ្រស្រុកអង្គរជុំ ។ អមដំណើរលោកអភិបាលរងខេត្ត មានលោកប្រធានមន្ទីរធនធានទឹក និងឧតុនិយមខេត្ដ និងអាជ្ញាធរពាក់ព័ន្ធជាច្រើនរូបទៀត ។
លោក ភន់ សុខុម អភិបាលស្រុកអង្គរជុំបានឱ្យដឹងថា សម្រាប់ជំនន់ទឹកភ្លៀងនេះបានជន់លិចសាលាស្រុក វិទ្យាល័យអង្គរជុំ និងដំណាំស្រូវមួយចំនួនរបស់បងប្អូនប្រជាពលរដ្ឋ ។ ចំពោះការជន់លិចនៅក្នុងវិទ្យាល័យអង្គរជុំនេះ ក៏បានធ្វើឱ្យសិស្សានុសិស្សផ្អាកការសិក្សាជាបណ្ដោះអាសន្ន ដើម្បីឱ្យអាជ្ញាធរដោះស្រាយទឹកជន់លិចនេះឱ្យបានឆាប់រហ័ស និងទាន់ពេលវេលា ដើម្បីឱ្យសិស្សានុសិស្សឆាប់បានចូលរៀនឡើងវិញ ។
ក្នុងការចុះពិនិត្យនោះដែរ លោក អឹុង គឹមលាង អភិបាលរងខេត្ដ បានមានប្រសាសន៍ថា ដើម្បីដោះស្រាយការជន់លិចដោយជំនន់ទឹកភ្លៀងនេះ យើងត្រូវរកឱ្យឃើញថា តើទឹកហូរមកពីប្រភពណា ដើម្បីធ្វើការបិទលូ បិទខ្ទប់ ឬបញ្ចៀសទឹក កុំឱ្យជន់លិចនៅតាមទីប្រជុំបែបនេះបន្ដទៀត ។
ជាក់ស្ដែង ក្រុមការងារបានរកឃើញប្រភពដែលហូរមកទីប្រជុំជន គឺនៅបណ្ដោយផ្លូវលំចាប់ពីភូមិតាលាវដល់ភូមិចារ ដែលភ្ជាប់ពីឃុំចារឈូកទៅឃុំតាសោម ក្នុងស្រុកអង្គរជុំ ខេត្តសៀមរាប ។
ជាមួយគ្នានេះដែរ លោកអភិបាលរងខេត្ដ បានធ្វើការណែនាំដល់អាជ្ញាធរស្រុកឱ្យរៀបចំធ្វើការបិទលូ កុំឱ្យទឹកហូរចូលមកទីប្រជុំជន និងកន្លែងផ្សេងៗទៀត ព្រមទាំងធ្វើការបញ្ចៀសទឹកឱ្យហូរទៅលូនៅភូមិយាង ក្នុងឃុំចារឈូក ឱ្យទឹកហូរចូលទៅក្នុងប្រឡាយ ។
លោកអភិបាលរងខេត្ដ ក៏បានបន្ដដឹកនាំក្រុមការងារចុះពិនិត្យតំបន់ទឹកលិច ដូចជាក្នុងបរិវេណសាលាស្រុក វិទ្យាល័យអង្គរជុំ ក៏ត្រូវពិនិត្យមើលលូដែលស្ទះនៅតាមបណ្ដោយផ្លូវនៅទីប្រជុំ ដើម្បីធ្វើការកាយស្ដារសំរាម និងស្មៅដែលស្ទះនៅមុខលូ ដើម្បីឱ្យទឹកហូរបានលឿន ។ លោកអភិបាលរងខេត្តក៏បានធ្វើការណែនាំ និងជំរុញដល់អាជ្ញាធរស្រុក សហការជាមួយមន្ទីរអង្គភាពពាក់ព័ន្ធ មន្ត្រីជំនាញ ធ្វើការរំដោះទឹក និងបញ្ចៀសទឹកឱ្យបានឆាប់រហ័ស ដើម្បីកុំឱ្យជន់លិចកសិផលរបស់ពលរដ្ឋផងដែរ ៕
ចែករំលែកព័តមាននេះ