ខេត្តមណ្ឌលគិរី ៖ ប្រតិបត្តិការប្រមាញ់បទល្មើសព្រៃឈើមួយបានធ្វើឡើង កាលពីថ្ងៃទី១៣ ខែវិច្ឆិកា ឆ្នាំ២០២៥ ដោយកម្លាំងគណៈបញ្ជាការឯកភាពស្រុកពេជ្រាដា បានបើកយុទ្ធនាការចុះល្បាត និងទប់ស្កាត់ការកាប់រានដីព្រៃ និងការបរបាញ់សត្វ…
ខេត្តមណ្ឌលគិរី ៖ ប្រតិបត្តិការប្រមាញ់បទល្មើសព្រៃឈើមួយបានធ្វើឡើង កាលពីថ្ងៃទី១៣ ខែវិច្ឆិកា ឆ្នាំ២០២៥ ដោយកម្លាំងគណៈបញ្ជាការឯកភាពស្រុកពេជ្រាដា បានបើកយុទ្ធនាការចុះល្បាត និងទប់ស្កាត់ការកាប់រានដីព្រៃ និងការបរបាញ់សត្វ ជាពិសេស ក្រុមចាប់ស្វាព្រៃខុសច្បាប់នៅក្នុងសហគមន៍តំបន់ការពារធនធានធម្មជាតិត្រពាំងក្អើម ក្នុងភូមិសាស្ត្រភូមិពូតាង ឃុំពូជ្រៃ ស្រុកពេជ្រាដា ។
សេចក្តីរាយការណ៍បានឲ្យដឹងថា តាមការសន្និដ្ឋាន ក្រុមជនសង្ស័យមានគ្នាពី១០ ទៅ២០ នាក់ និងមានប្រើប្រាស់អាវុធក្នុងការធ្វើសកម្មភាព។ ប្រតិបត្តិកានេះ ដឹកនាំដោយលោក អ៊ាង ស៊ាងអន អភិបាលរងស្រុកពេជ្រាដា ដោយមានការចូលរួមពីមន្ត្រីការិយាល័យ ដែនជម្រកសត្វព្រៃស្រែពក កងកម្លាំងប្រដាប់អាវុធទាំង០៣ប្រភេទ (កងរាជអាវុធហត្ថ, នគរបាល, យោធា) និងសមាជិក សហគមន៍តំបន់ការពារធម្មជាតិត្រពាំងក្អើម ដោយមានសមាសភាពសរុប៣១រូប ។
សេចក្តីរាយការបន្តថា កម្លាំងចម្រុះបានចុះល្បាតដោយថ្មើរជើង និងបានប្រទះឃើញទីតាំងកាប់រំលំឈើខុសច្បាប់ចំនួន០២កន្លែង ។ ទីតាំងទី១ បទល្មើសកាប់រំលំឈើក្នុងទំហំប្រមាណ២០អា។ ទីតាំងទី២ បទល្មើសកាប់រំលំឈើក្នុងទំហំប្រមាណ១៥អា ដែលការកាប់រំលំដើមឈើនេះ គឺហ៊ុមព័ទ្ធដើម្បីចាប់យកសត្វស្វា ដែលជាបទល្មើសទ្វេដង (បទល្មើសព្រៃឈើ និងបទល្មើសសត្វព្រៃ)។
ទោះបីមិនបានឃាត់ខ្លួនជនសង្ស័យនៅនឹងកន្លែងក្តី តែតាមការសន្និដ្ឋានក្រុមជនល្មើសមានចំនួនប្រហែល១០ ទៅ២០នាក់ និងមានការប្រើប្រាស់អាវុធក្នុងការធ្វើសកម្មភាព។
ជាមួយគ្នានេះ មន្ត្រីជំនាញនៃការិយាល័យដែនជម្រកសត្វព្រៃស្រែពក និងអាជ្ញាធរស្រុក
ពេជ្រាដាបានធ្វើការអំពាវនាវយ៉ាងទទូច និងសូមសំណូមពរដល់សាធារណជនជាពិសេសប្រជាពលរដ្ឋដែលរស់នៅជុំវិញតំបន់ការពារធម្មជាតិឲ្យចូលរួមសហការ និងបញ្ឈប់រាល់សកម្មភាពល្មើសច្បាប់ទាំងឡាយ។ ដោយបញ្ឈប់ជាបន្ទាន់ រាល់សកម្មភាព កាប់រានដីព្រៃ ការកាប់ឈើខុសច្បាប់ និងការបរបាញ់សត្វព្រៃនៅគ្រប់តំបន់ការពារធម្មជាតិទាំងអស់។
ទង្វើទាំងនេះ មិនត្រឹមតែជាបទល្មើស ដែលត្រូវផ្តន្ទាទោសតាមច្បាប់ប៉ុណ្ណោះទេ ថែមទាំងបំផ្លាញដល់ធនធានធម្មជាតិដ៏មានតម្លៃ និងប៉ះពាល់យ៉ាងធ្ងន់ធ្ងរដល់ជីវភាពរបស់ប្រជាសហគមន៍នាពេលអនាគត ។
សូមបងប្អូនត្រឡប់មករួមគ្នាការពារ និងថែរក្សាព្រៃឈើ និងសត្វព្រៃរបស់យើងវិញ។ ខណៈអាជ្ញាធរខេត្តនឹងបន្តអនុវត្តច្បាប់ដោយតឹងរ៉ឹង និងចាត់វិធានការតាមនីតិវិធីច្បាប់ចំពោះជនល្មើសណាដែលនៅតែបន្តប្រព្រឹត្តបទល្មើសទាំងនេះ ៕
ចែករំលែកព័តមាននេះ