រាជធានីភ្នំពេញ ៖ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា បានសម្តែងការពេញចិត្ត និងអបអរសាទរចំពោះការសម្រេចបានជោគជ័យគួរជាទីមោទនៈក្នុងការលើកម្ពស់សមភាពយេនឌ័រនៅកម្ពុជា ។ …
រាជធានីភ្នំពេញ ៖ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា បានសម្តែងការពេញចិត្ត និងអបអរសាទរចំពោះការសម្រេចបានជោគជ័យគួរជាទីមោទនៈក្នុងការលើកម្ពស់សមភាពយេនឌ័រនៅកម្ពុជា ។
សម្តេចប្រធានរដ្ឋសភាបានគូសបញ្ជាក់ថា ក្នុងរយៈពេល៣ទសវត្សរ៍កន្លងមកនេះ ក្រោមម្លប់សន្តិភាព និងស្ថិរភាពនយោបាយដ៏រឹងមាំ តាមរយៈការដឹកនាំរបស់សម្តេចតេជោ ហ៊ុន សែន ជាបុរេលក្ខខណ្ឌមិនអាចខ្វះបាន និងជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍលើគ្រប់វិស័យ រួមទាំងការលើកកម្ពស់សមភាពយេនឌ័រ និងការបង្កើនភាពអង់អាចដល់«ស្ត្រី និងក្មេងស្រី»។
សម្តេចរដ្ឋសភាធិបតី ឃួន សុដារី បានលើកឡើងដូច្នេះ នៅក្នុងឱកាសអញ្ជើញជាអធិបតីដ៏ខ្ពង់ខ្ពស់បើកវេទិកាជាតិស្តីពី«ស្ត្រីក្នុងភាពជាអ្នកដឹកនាំនិងអភិបាលកិច្ច»ក្រោមប្រធានបទ«ភាពជាអ្នកដឹកនាំរបស់ស្ត្រីនិងក្មេងស្រី ដើម្បីទាំងអស់គ្នា»ដែលរៀបចំឡើងដោយក្រសួងកិច្ចការនារី នាព្រឹកថ្ងៃទី១៤ ខែវិច្ឆិកា ឆ្នាំ២០២៥ នៅសណ្ឋាគាររ៉េស៊ីដង់សុខាភ្នំពេញ ។
សម្តេចប្រធានរដ្ឋសភាបានលើកឡើងថា «សម្តេចតេជោតែងតែយកចិត្តទុកដាក់គាំទ្រ និងជំរុញការអនុវត្តគោលនយោបាយលើកកម្ពស់សមភាពយេនឌ័រ ដោយបានពន្លឿនដំណើរឆ្ពោះទៅសម្រេចបានសមិទ្ធផលគួរជាទីមោទនៈ និងជាប្រយោជន៍ពុំអាចកាត់ថ្លៃបានសម្រាប់«ស្ត្រី និងក្មេងស្រី»ដោយបានដាក់ចេញ និងអនុវត្តគោលនយោបាយសមភាពយេនឌ័រនៅកម្ពុជាប្រកបដោយប្រសិទ្ធភាពតាមរយៈយុទ្ធសាស្ត្រចតុកោណទាំងបួនដំណាក់កាល ដែលបានកំណត់«ស្ត្រីជាឆ្អឹងខ្នងនៃសេដ្ឋកិច្ច និងសង្គមជាតិ» និងបានបង្កើនឱ្យមានវត្តមានស្ត្រីកាន់តែច្រើនឡើងៗនៅក្នុងថ្នាក់ធ្វើសេចក្តីសម្រេចចិត្ត និងជាតំណាង ទាំងនៅថ្នាក់ជាតិ និងថ្នាក់ក្រោមជាតិ» ។
សម្តេចប្រធានរដ្ឋសភាបានគូសបញ្ជាក់ថា រាជរដ្ឋាភិបាលកម្ពុជានីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃ ប៉ិនប្រសប់ និងមានចក្ខុវិស័យវែងឆ្ងាយរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានប្តេជ្ញាពង្រឹងភាពជាប្រជាពលរដ្ឋក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ក្នុងនោះ«ស្ត្រី គឺជាស្នូល»។ រាជរដ្ឋាភិបាលបានបន្តបង្កើនការវិនិយោគសំខាន់ៗលើសមភាពយេនឌ័រ និងផ្តល់ភាពអង់អាចដល់ស្ត្រី ដែលក្នុងនោះ មានវិស័យសេដ្ឋកិច្ច អប់រំ សុខភាព និងការដឹកនាំសាធារណៈ ដើម្បីទាញយកអត្ថប្រយោជន៍ពីភាគលាភយេនឌ័រ ការបង្កលក្ខណៈអំណោយផលដល់ស្ត្រីក្នុងការប្រើប្រាស់សិទ្ធិលើការសម្រេចចិត្តលើផែនការគ្រួសារ ការកាត់បន្ថយភាពងាយរងគ្រោះដោយអំពើហិង្សាទាក់ទងនឹងយេនឌ័រ និងការលើកកម្ពស់ទំនាក់ទំនងអន្តរជំនាន់ ។
សម្តេចរដ្ឋសភាធិបតីក៏បានបញ្ជាក់យ៉ាងច្បាស់ថា«ពិភពលោកនឹងកាន់តែមានសុវត្ថិភាព ស្រស់បំព្រង និងកក់ក្តៅជាងមុន ប្រសិនបើមានស្ត្រីក្លាយជាអ្នកដឹកនាំកាន់តែច្រើន»។
សម្តេចប្រធានរដ្ឋសភា វាយតម្លៃខ្ពស់លើការរៀបចំ«វេទិកាជាតិ ស្តីពីស្ត្រីក្នុងភាពជាអ្នកដឹកនាំនិងអភិបាលកិច្ច» ក្នុងគោលបំណងលើកកម្ពស់ភាពជាតំណាងរបស់«ស្ត្រីនិងក្មេងស្រី» ដើម្បីពង្រឹងបណ្តាញសាមគ្គីភាព និងគាំទ្រគ្នាទៅវិញទៅមក ក្នុងចំណោមថ្នាក់ដឹកនាំជាស្ត្រីនៅគ្រប់កម្រិតនិងគ្រប់ជំនាន់ ព្រមទាំងសំដៅជំរុញការគាំទ្រពីដៃគូពាក់ព័ន្ធ ក្នុងការលើកកម្ពស់សមភាពយេនឌ័រនិងតួនាទីរបស់ស្ត្រី ក្នុងភាពជាអ្នកដឹកនាំ និងអភិបាលកិច្ចនៅគ្រប់កម្រិត ។
សម្តេចបានសម្តែងការកោតសរសើរ និងវាយតម្លៃខ្ពស់ចំពោះក្រសួងកិច្ចការនារី និងដៃគូពាក់ព័ន្ធទាំងអស់ ដែលបានរួមសហការគ្នារៀបចំព្រឹត្តិការណ៍ដ៏មានសារៈសំខាន់នេះ ឱ្យក្លាយជាព្រឹត្តិការណ៍ជាតិប្រចាំឆ្នាំ ដើម្បីផ្តល់ឱកាសឱ្យស្ត្រីជាថ្នាក់ដឹកនាំគ្រប់កម្រិត ទទួលបាននូវបទពិសោធន៍ល្អៗ និងគន្លឹះល្អៗ ក្នុងភាពជាអ្នកដឹកនាំរបស់ស្ត្រី និងស្វែងរកនូវវិធានការសមស្រប ដើម្បីឈានទៅសម្រេចបាននូវបេសកកម្មរួមគ្នា គឺការលើកកម្ពស់ភាពជាអ្នកដឹកនាំរបស់ស្ត្រីនៅគ្រប់ទិដ្ឋភាព ទាំងក្នុងវិស័យសាធារណៈ វិស័យឯកជន នយោបាយ សេដ្ឋកិច្ចសង្គម ថ្នាក់ជាតិ និងថ្នាក់ក្រោមជាតិ។
ឆ្លៀតក្នុងឱកាសនោះ ជួសមុខឱ្យអង្គពីធីទាំងមូល សម្តេចប្រធានរដ្ឋសភា បានថ្កោលទោសដាច់អហង្ការ ចំពោះការបាញ់ប្រហាររបស់ទាហានថៃមកលើប្រជាជនខ្មែរ ដែលជាជនស៊ីវិលស្លូតត្រង់ ក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទីពុធ ទី១២ ខែវិច្ឆិកា ឆ្នាំ២០២៥ ដែលបណ្តាលឱ្យប្រជាជនខ្មែរម្នាក់ បាត់បង់អាយុជីវិត និងជាច្រើននាក់ទៀតរងរបួស ។
ការវាយប្រហារនេះ ជាអំពើឃោរឃៅយង់ឃ្នង អមនុស្សធម៌ ដែលមិនត្រឹមជាការំលោភបំពានលើអធិបតេយ្យរបស់កម្ពុជាប៉ុណ្ណោះទេ ប៉ុន្តែថែមទាំងរំលោភបំពានធ្ងន់ធ្ងរលើសេចក្តីថ្លែងការណ៍រួម ស្តីពីកិច្ចព្រមព្រៀងសន្តិភាព ដែលនាយករដ្ឋមន្ត្រីនៃប្រទេសទាំងពីរបានចុះហត្ថលេខា កាលពីថ្ងៃទី២៦ ខែតុលាថ្មីៗកន្លងទៅ អំឡុងពេលដំណើរការកិច្ចប្រជុំកំពូលអាស៊ានលើកទី៤៧ នៅទីក្រុងគូឡាឡាំពួ ប្រទេសម៉ាឡេស៊ី ដោយមានវត្តមានជាសាក្សី ពី ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក និងឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន។ ការបាញ់ប្រហារនេះ ក៏ជាការរំលោភបំពានយ៉ាងធ្ងន់ធ្ងរដល់ច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។
សម្តេចប្រធានរដ្ឋសភា បានមានប្រសាសន៍ថា ក្នុងកាលៈទេសៈប្រទេសជាតិប្រឈមនឹងការគំរាមកំហែង និងភាពមិនប្រាកដប្រជាបែបនេះ ជាពេលវេលាសំខាន់ជាងពេលណាៗទាំងអស់ ដែលយើងទាំងអស់គ្នាត្រូវមានការជឿជាក់ និងគាំទ្រពេញទំហឹងដល់រាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការដោះស្រាយជម្លោះព្រំដែន រក្សានិងការពារ សុខសន្តិភាព ឯករាជ្យ អធិបតេយ្យ និងបូរណភាពទឹកដីកម្ពុជា។ កម្ពុជាត្រូវពង្រឹងសាមគ្គីភាពឱ្យកាន់តែខ្លាំងក្លាឡើង ដើម្បីប្រែក្លាយបញ្ហាទៅជាឱកាស ក្នុងការពង្រឹងភាពម្ចាស់ការ អធិបតេយ្យសេដ្ចកិច្ច និងភាពធន់របស់ជាតិឱ្យបានរឹងមាំ។
ជាមួយគ្នានេះដែរសម្តេចប្រធានរដ្ឋសភាបានគូសបញ្ជាក់ថា៖«យើងត្រូវចាំថា «ខ្មែរមានសាមគ្គី ខ្មែរខ្លាំង និងមានភាពធន់» ហើយអាចបោះជំហានទៅមុខ ដោយមានភាពជឿជាក់ និងក្តីសង្ឃឹម» ៕
ចែករំលែកព័តមាននេះ