ខេត្តបាត់ដំបង ៖ ការចុះអនុវត្តច្បាប់ក្នុងការរៀបចំសណ្ដាប់តាមចំណតរថយន្តរបស់ក្រុមហ៊ុនដឹកអ្នកដំណើរនានា នៅក្នុងក្រុងបាត់ដំបងរបស់សមត្ថកិច្ចចរាចរត្រូវគេមើលឃើញថា នៅតែគ្មានប្រសិទ្ធភាព និងគ្មានតម្លាភាពដដែល ដោយការអនុវត្តន៍នេះ ហាក់ដូចជាមានការរើសអើង និងមានការខ្វែងគំនិត្យគ្នារវាងមន្រ្តីថ្នាក់ក្រោម ដែលចុះអនុវត្តច្បាប់ផ្ទាល់ និងមន្រ្តីថ្នាក់លើដែលអង្គុយចាំបញ្ជា ។
មន្រ្តីចរាចរខេត្តដែលចុះអនុវត្តការងារនេះបាននិយាយនៅព្រឹកថ្ងៃទី២១ កុម្ភៈ នេះថា កិច្ចប្រតិបត្តិការរៀបចំសណ្ដាប់ធ្នាប់តាមចំណតរថយន្តក្រុមហ៊ុនដឹកអ្នកដំណើរនេះ គឺធ្វើឡើងដោយយោងតាមសេចក្ដីសម្រេចរបស់គណៈកម្មការកងឯកភាពខេត្ត ដែលតម្រូវឱ្យរថយន្តក្រុមហ៊ុនដឹកអ្នកដំណើរទាំងអស់បិទចំណតរបស់ខ្លួន ហើយចូលទៅចាប់ម៉ូយនៅចំណតរថយន្តតែមួយនៅផ្សារទំនើបរបស់លោកភូ ពុយ ដែលស្ថិតក្នុងសង្កាត់អូរចា ក្រុងបាត់ដំបង ។
មន្រ្តីដដែលថា សេចក្ដីសម្រេចនេះបានជូនដំណឹងដល់បណ្ដាក្រុមហ៊ុនដឹកអ្នកដំណើរទាំងអស់ជាងកន្លះខែហើយ ព្រមទាំងមានធ្វើកិច្ចសន្យាទៀតផង ដើម្បីឱ្យពួកគេចាកចេញទៅកាន់ចំណតរថយន្តនៅផ្សារទំនើបខាងលើ តែក្រុមហ៊ុនមួយចំនួនមិនព្រមស្ដាប់ ថែមទាំងផ្គើននឹងសេចក្ដីសម្រេចនេះទៀត ដោយសារតែក្រុមហ៊ុនទាំងនោះអាងខ្សែអ្នកធំតែម្ដង។
ជាក់ស្ដែងនៅព្រឹកថ្ងៃទី២១ កុម្ភៈ នេះ កម្លាំងចម្រុះដែលចុះអនុវត្តច្បាប់ បាននាំយករថយន្តក្រុមហ៊ុនរបស់ក្រុមហ៊ុនមួយទៅកាន់ការិយាល័យចរាចរណ៏ខេត្ត ដោយសាតែក្រុមហ៊ុននេះមិនព្រមចាកចេញ ព្រោះអាងខ្សែមិនខ្លាចច្បាប់ ។ ប៉ុន្តែពេលទៅដល់ការិយាល័យ មិនទាន់ពន្លត់ម៉ាស៊ីនផង ក៏ត្រូវលោកសាត គីមសាន ប្រធានការិយាល័យបញ្ជាឱ្យដោះលែងវិញ ដែលជាហេតុធ្វើឱ្យមន្រ្តីថ្នាក់ក្រោមដែលកំពុងអនុវត្តច្បាប់នេះ បញ្ចេញប្រតិកម្ម និងមិនសប្បាយចិត្ត ជាពិសេសរងការចំអកឡកលើយពីក្រុមហ៊ុន
តែម្ដង ។
ចែករំលែកព័តមាននេះ