រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីៃនព្រះរាជាណាចក្រកម្ពុជា បានមានប្រសាសន៍ក្នុងឱកាសបិទសន្និបាតបូកសរុបការងារឆ្នាំ២០១៣ និងលើកទិសដៅការងារឆ្នាំ២០១៤ របស់ក្រសួងមហាផ្ទៃ នារសៀលថ្ងៃទី២០ កុម្ភៈ នៅទីស្តីការក្រសួងថា ជាចំណុចការវិនិយោគដោយគ្មានការបង់ថ្លៃ គឺជាការទាមទារនូវសុចរិតភាព និងការយកចិត្តទុកដាក់នៃឆន្ទៈរបស់អ្នកអនុវត្តនៅមូលដ្ឋានតែប៉ុណ្ណោះ ។
ពាក់ព័ន្ធនឹងបញ្ហាការងារនៅមូលដ្ឋាន សម្តេចតេជោសង្កត់ធ្ងន់ថា វាគ្មានការអ្វីលំបាកទេ បើសិនជាយើងមានការស្មោះត្រង់ពិតប្រាកដ ចង់បម្រើប្រជាជនពិតប្រាកដ ជួយដោះស្រាយបញ្ហាពិតប្រាកដ ។ បើសិនជាប្រជាជនគាត់សុំសាលារៀន មន្ទីរពេទ្យ សុំប្រឡាយទឹក ផ្លូវថ្នល់ នោះគឺវាត្រូវការពេលវេលា វាត្រូវការការវិនិយោគ ដោយថវិការបស់ជាតិ ដោយការធ្វើបុណ្យផ្កាសម្រាប់ការកសាងសាលារៀន មន្ទីរពេទ្យ ស្ពាន ត្រូវទាមទារការវិនិយោគមួយ ។ ប៉ុន្តែចំពោះសេវាសាធារណៈនេះ វាអត់ត្រូវការឱ្យអស់លោក លោកជំទាវ លោកស្រី ចេញដើមទុនយកទ្រព្យសម្បត្តិពីផ្ទះយកទៅឱ្យគាត់ឯណា អត់ទេ គឺវាទាមទារតែសេចក្តីស្មោះត្រង់ ថាយើងបម្រើប្រជាជនពិតប្រាកដតែប៉ុណ្ណោះ ។ រឿងដែលវាចោទឡើង សេវាសាធារណៈមានច្រើនទូលំទូលាយណាស់ ពាក់ព័ន្ធនឹងជីវភាពប្រជាជន ។ ដូចជារឿងអត្រានុកូលដ្ឋាន…វាអត់ត្រូវការឱ្យអស់លោកចំណាយដើមទុន ឱ្យអស់លោកទៅរកលុយពីកន្លែងមួយទៅកន្លែងមួយ ដើម្បីដោះស្រាយបញ្ហាឯណា គឺអត់ផង ។
ដូចសៀវភៅគ្រួសារ គឺរដ្ឋចេញលុយទេតើ បើសិនជាមានការកំណត់ថ្លៃសេវាគឺយកតាមរដ្ឋកំណត់បានហើយ ។ បញ្ហាវាស្ថិតនៅត្រង់ភាពស្មោះត្រង់ជាមួយប្រជាជន និងឆន្ទៈផ្តូរផ្តាច់ដើម្បីបម្រើប្រជាពលរដ្ឋនោះទេ ។ សមិទ្ធផលដែលរាជរដ្ឋាភិបាលបានបង្កើតឡើងវាច្រើនណាស់នៅពេញប្រទេស ។ ប៉ុន្តែការឆកល្វែងនៃសេវាសាធារណៈ ភាពតូចតាចមែន តែទាំងអស់នេះ វាប្រមូលផ្តុំក្លាយទៅជាអគ្គិភ័យ សំរាមត្រង់នេះបន្តិចត្រង់នោះបន្តិច ប្រមូលផ្តុំទៅដឹករាប់តោន ។ ឧទាហរណ៍ប្រជាពលរដ្ឋត្រូវការលិខិតបញ្ជាក់ គាត់ទៅរកយើង យើងបែរជារវល់ ទៅត្រង់នោះត្រង់ណោះ កេះកៀវសព្វបែបយ៉ាង អីុចឹងទៅវាបង្កើតជារឿង ។ ដូច្នេះការបង្កើតច្រកចេញចូលតែមួយរវាងរដ្ឋបាលនិងនគរបាលវាក៏ជាផ្នែកមួយកាត់បន្ថយកុំឱ្យប្រជាពលរដ្ឋរត់ច្រើនកន្លែង គឺដាក់តែមួយកន្លែងទៅ ។ កាលពីសម័យមុន ក្រុមប្រឹក្សាអភិវឌ្ឍន៍កម្ពុជា វាមិនមែនច្រកចេញចូលតែមួយ គឺវាចូលទៅក្រសួងច្រើន ។ ចាប់តាំងពីវេទិការដ្ឋនិងវិស័យឯកជនទី១ ទី២ និងទី៣ មក ឥឡូវវិស័យឯកជនគេលែងស្រែកហើយ ។ ដូច្នេះផ្នែកខាងនគរបាលមូលដ្ឋានក៏យើងត្រូវធ្វើដូចគ្នាដែរ អ្វីដែលអាចប្រមូលបានមិនមែនបញ្ហានៅមូលដ្ឋានទេ គឺនៅខាងថ្នាក់លើ អ្វីដែលអាចអង្គុយបានគឺឱ្យនៅជាមួយគ្នា ឱ្យគាត់រត់តែមួយកន្លែង។
បញ្ហាទាំងអស់របស់ប្រជាពលរដ្ឋ បើមើលទៅចាត់ទុកជារឿងធម្មតា ប៉ុន្តែសម្រាប់ប្រជាពលរដ្ឋវិញ គឺមិនមែនជារឿងធម្មតាពេកទេ ។ សម្តេចបានអំពាវនាវចំពោះលោក លោកស្រីទាំងឡាយមេត្តាផ្តល់សេវាសាធារណៈ ជូនប្រជាពល រដ្ឋឱ្យបានល្អ ហើយអត់តម្រូវឱ្យអស់លោកលោកស្រីបង់ថ្លៃអ្វីទាំងអស់ គ្រាន់តែឱ្យអស់លោក ធ្វើឱ្យត្រឹមត្រូវតាមការកំណត់នៃច្បាប់ អត់តម្រូវឱ្យយកលុយពីផ្ទះទៅឯណា ? សម្ដេចខ្សឹបដាក់មេក្រូ ចំណូលពន្ធដារខេត្តកណ្ដាលរកបានគឺយកពីអ្នករស់នៅរាជធានីភ្នំពេញ តាមរយៈការបង់ពន្ធយានយន្ត មូលហេតុមកពីនៅភ្នំពេញធ្វើការយឺត គេទៅបង់ពន្ធនៅខេត្តកណ្ដាលវិញ ។ ខេត្តកណ្ដាលបានលុយមួយឆ្នាំៗមិនតិចទេ គេគ្រាន់តែយកលុយទៅបង់សោះទៅជាពិបាក ។ នេះគ្រាន់តែសេវាពន្ធដារគេទៅបង់ហើយទៅជាពិបាក ។ ពាក់ព័ន្ធនឹងបញ្ហាខាងលើ សម្ដេចតេជោនាយករដ្ឋមន្ត្រីមានប្រសាសន៍ថា យើងត្រូវរកវិធីយ៉ាងម៉េចដើម្បីបំព្រួញការលំបាករបស់ប្រជាជនដែលគាត់ធ្វើដំណើរមក គាត់ធ្លាប់ចូលគ្រប់ទីកន្លែងទម្រាំបានលិខិតមួយ ឥឡូវយើងប្រមូលគ្នាឱ្យនៅតែមួយកន្លែងតើបានទេ ? ស្វែងរកតទៅទៀតមិនថាថ្នាក់កណ្ដាលឬថ្នាក់ជាតិទេ ។
ដូចជាក្រសួងពាណិជ្ជកម្មកន្លងទៅក៏មានការកែទម្រង់មួយចំនួនការនាំចេញដោយមិនចាំបាច់មានCO ក៏ត្រូវចេញCOឱ្យគេដែរ ហើយCOយកទៅបោះចោល ។ ឥឡូវគេកែទម្រង់ទៅតាមស្ថាប័ននីមួយៗរកវិធីកែទម្រង់ ហើយផ្នែកនគរបាលនៅមូលដ្ឋានក៏រកវិធីកែទម្រង់ដែរ ។ កិច្ចការខ្លះរកធ្វើតែមួយថ្ងៃមួយព្រឹក ឬមួយពេល ដល់ពេលធ្វើឱ្យប្រជាជន មួយសប្ដាហ៍មួយសប្ដាហ៍ដើម្បីអ្វី? ដូច្នោះទៅប្រជាពលរដ្ឋគាត់វិលចុះវិលឡើង ហើយកុំបន្ទោសគាត់ឱ្យគាត់ថាមេ៉ចក៏គ្មានលិខិតបញ្ជាក់អាហ្នឹង គាត់ឆ្លើយថា ខ្ញុំទៅប្រាំដងហើយតែធ្វើមិនបានឥឡូវខ្ញុំអត់មានពេលនោះ ព្រោះបន្ទោសគាត់អត់បានទេ។ នេះមកពីយើង ដូច្នេះការផ្លាស់ប្ដូរឥរិយាបថនៅកន្លែងនេះគឺសំខាន់ខ្លាំងណាស់ ។ ចំណែកភាសីុផ្សារក៏មិនធម្មតាដែរ តម្លៃកង់គេឱ្យយកចំនួន២០០រៀល ពួកគាត់យក៥០០រៀល គាត់យក១.០០០រៀល ។ ទាំងអស់នេះគឺ សុទ្ធតែមានបញ្ហាហើយគឺវាខុសពីការដាក់នៅក្នុងសៀវភៅបន្ទុក ។ ត្រូវចាប់ប្រធានផ្សារទាំងអស់ព្រោះការដេញភាសីុបានគឺត្រូវអនុវត្តសៀវភៅបន្ទុក ។ ព្រោះមានចងក្នុងកិច្ចព្រមព្រៀងដែរឬ?
សម្ដេចបានសង្កត់ធ្ងន់ថា ការបង់ពន្ធប្រថាប់ត្រាអ្វីៗ ការលក់ដូរត្រូវតែមានការផ្ទេរសិទ្ធិដូច្នេះត្រូវមានចុះហត្ថលេខាផ្ទេរសិទ្ធិគឺត្រូវធ្វើឱ្យបានលឿនយកតម្លៃទៅតាមការកំណត់ទៅបានហើយ ។ ពេលដែលចុះទៅមូលដ្ឋានឃើញមានបញ្ហាដល់ឃើញបញ្ហាយកឆ្លុះមកខាងលើហើយចុះទៅមិនមែនដោះជំនួសឱ្យអាជ្ញាធរថ្នាក់ក្រោមជាតិឬស្ថាប័នដែលចែងដោយច្បាប់នោះទេ ។ ចំណុចមួយដែលចាប់អារម្មណ៍នៅត្រង់ថា អ្នកសោធននិវត្តន៍ត្រូវបើកលុយនៅតាមធនាគារ ។ ប៉ុន្តែមានការកំណត់ជាក់លាក់មួយថាគ្មានអ្នកទៅបើកជំនួសបាន ។ ចំណោទចោទសួរថា ចុះបើគាត់ឈឺគាត់មកបើកអត់បានតើត្រូវដោះស្រាយដូចម្ដេច ? ត្រង់នេះក្រុមការងារត្រូវបំភ្លឺមកឱ្យក្រសួងសង្គមកិច្ចអតីតយុទ្ធជន កែតម្រូវយ៉ាងមេ៉ច ដូច្នេះករណីឈឺបើកមិនបានអាចឱ្យសហព័ន្ធបើកយកទៅឱ្យបាន ។
នេះហើយជាក្របខណ្ឌកំណែទម្រង់មិនមែនអ្វីដែលដាក់ទៅចេះតែត្រូវទាំងអស់នោះទេ ត្រូវតែមានចំណុចខុសដែលត្រូវកែ ។ នេះហើយដែលយើងធ្វើគណនេយ្យភាពជាមួយប្រជាពលរដ្ឋរកឃើញត្រូវកែ មិនមែនកែកម្រិតថ្នាក់ក្រោមថ្នាក់ជាតិ កែទាំងថ្នាក់ជាតិ រាប់ទាំងកម្មវិធីនយោបាយ រាប់ទាំងសេចក្ដីសម្រេចរបស់រាជរដ្ឋាភិបាល ។ អនុក្រឹត្យក៏ដោយ ព្រះរាជក្រឹត្យក៏ដោយរហូូតដល់ធ្វើវិសោធកម្មច្បាប់ទៀត ៕
ចែករំលែកព័តមាននេះ