រាជធានីភ្នំពេញ ៖ ប្តីប្រពន្ធ ២នាក់ បានណាត់គ្នាមកលោតទឹកលើស្ពានជ្រោយចង្វា ប៉ងធ្វើអត្តឃាតដោយសារតែមិនចុះសម្រុងគ្នារឿងទៅរកស៊ីជាមួយឪពុកក្មេក លុះពេលមកដល់លើស្ពានស្រាប់តែប្រពន្ធដូរចិត្តលែងចង់ស្លាប់ ក៏បញ្ចុះបញ្ចូលប្តី ប៉ុន្តែ ប្តីមិនព្រម ប្រពន្ធក៏ចាប់អោបប្រតាយទាញចុះឡើងផ្អើលដល់អ្នកដំណើរមកជួយចាប់ទាញ រួចផុតពីសេចក្តីស្លាប់ទាំង ២នាក់ ប្តីប្រពន្ធ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង ១០ និង ២៥នាទី យប់ថ្ងៃទី២០ កុម្ភៈ ២០១៤ ស្ថិតក្នុងសង្កាត់ស្រះចក ខណ្ឌដូនពេញ។ ប្តីប្រពន្ធប៉ងលោតទឹកសម្លាប់ខ្លួនខាងលើមានឈ្មោះ ១. វៀង យ៉ានទីន ភេទប្រុស អាយុ ២០ឆ្នាំ ជាប្តី មុខរបរអ្នកលក់នំបុ័ងសាច់ ២. យ៉ិន សុផល ភេទស្រី អាយុ ២៨ឆ្នាំ ជាប្រពន្ធ មុខរបរអ្នកលក់នំបុ័ងសាច់ដូចគ្នា អ្នកទាំង២ ស្នាក់នៅសង្កាត់ទួលសង្កែ ខណ្ឌឬស្សីកែវ។
តាមសម្តីប្តីប្រពន្ធទាំង ២នាក់ បានឲ្យដឹងថា កាលពី ១ខែមុន ឪពុកខាងប្តីបានបបួលឲ្យទៅរកស៊ី និងស្នាក់នៅជាមួយគាត់នៅច្បារអំពៅ ហើយប្តីចង់ទៅ តែប្រពន្ធមិនព្រមដោយនាងចង់រកស៊ីតែ ២នាក់ ប្តីប្រពន្ធ ដោយនិយាយមិនចុះសម្រុងគ្នា លុះដល់ល្ងាចថ្ងៃកើតហេតុនេះ ប្តីប្រពន្ធខាងលើក៏បានណាត់គ្នាមកលោតទឹកលើស្ពានជ្រោយចង្វាតែម្តង។
ប៉ុន្តែ ពេលមកដល់ប្រពន្ធបានដូរចិត្ត និងបាននិយាយលួងលោមប្តី តែដោយប្តីមិនព្រម ក៏មានការទាញគ្នាចុះឡើងផ្អើលដល់ប្រជាពលរដ្ឋ និងសមត្ថកិច្ច មកជួយឃាត់ និងនាំយកទៅសាកសួរតែម្តង៕
ចែករំលែកព័តមាននេះ