រាជធានីភ្នំពេញ ៖ នាថ្ងៃទី២០ កុម្ភៈ ជាថ្ងៃដែលពិភពលោកប្រារព្ធទិវាយុត្តិធម៌សង្គម ប្រជាពលរដ្ឋសហគមន៍បុរីកីឡាប្រមាណ២០នាក់ បាននាំគ្នាមកអុជធូបនៅព្រះអង្គដងកើ (មុខព្រះបរមរាជវាំង) វិថីព្រះសុីសុវត្ថិ ក្នុងសង្កាត់ជ័យជំនះ ខណ្ឌដូនពេញ កាលពីវេលាម៉ោង៣រសៀល ដើម្បីបួងសួង ក៏ដូចជាអំពាវនាវដល់រាជរដ្ឋាភិបាលអាណត្តិថ្មី ឱ្យជួយផ្តល់យុត្តិធម៌ដល់ពលរដ្ឋសហគមន៍បុរីកីឡា ដែលរងគ្រោះដោយការបណ្តេញចេញពីលំនៅឋាន ។
ស្ត្រីម្នាក់ដែលរស់នៅក្នុងសហគមន៍បុរីកីឡា និងបានមកចូលរួមអុជធូបនៅព្រះអង្គដងកើ និយាយថា ពលរដ្ឋសហគមន៍បុរីកីឡា ភូមិទី១២ ស្ថិតក្នុងសង្កាត់វាលវង់ ខណ្ឌ៧មករា បានរងគ្រោះដោយសារតែក្រុមហ៊ុន ប្រើកម្លាំងប្រដាប់អាវុធចម្រុះ មកឈូសឆាយ និងកម្ទេចផ្ទះប្រជាពលរដ្ឋកាលពីខែមករា ឆ្នាំ២០១២ ទាំងអយុត្តិធម៌ ធ្វើឱ្យប្រជាពលរដ្ឋរងទុក្ខវេទនា ហើយបង្ខំចិត្តរស់នៅក្បែរគំនរសំរាម និងក្រោមជណ្តើររហូតដល់បច្ចុប្បន្ន រង់ចាំរាជរដ្ឋាភិបាលអាណត្តិថ្មីផ្តល់ភាពយុត្តិធម៌ តែរហូតមកដល់ថ្ងៃនេះ គឺសូន្យដដែល ។ នៅពេលថ្មីៗនេះទៀត ប្រជាពលរដ្ឋសហគមន៍បុរីកីឡា ត្រូវបានកម្លាំងសមត្ថកិច្ចចម្រុះខណ្ឌ៧មករា បណ្តេញចេញពីអគារទី៩ និងវាយដំប្រជាពលរដ្ឋប្រុសស្រីឱ្យរងរបួស ។ ដោយអស់សង្ឃឹមទៅលើអាជ្ញាធរ ក៏ដូចជាតុលាការ ទើបនៅរសៀលថ្ងៃទី២០ កុម្ភៈ ដែលត្រូវនឹងទិវាយុត្តិធម៌សង្គមពិភពលោក ពលរដ្ឋសហគមន៍បុរីកីឡា នាំគ្នាជិះរ៉ឺម៉កម៉ូតូមកកន្លែងព្រះអង្គដងកើ ដើម្បីបន់ស្រន់សុំឱ្យរាជរដ្ឋាភិបាលអាណត្តិថ្មី ជួួយផ្តល់យុត្តិធម៌ជូនពលរដ្ឋសហគមន៍បុរីកីឡា ដែលកំពុងរងទុក្ខវេទនាគ្មានទីជម្រករស់នៅមិនស្មើនឹងសត្វទៅទៀត ។
មន្ត្រីសាលាខណ្ឌដូនពេញ ដែលឃ្លាំមើលសកម្មភាពប្រជាពលរដ្ឋសហគមន៍បុរីកីឡា ឱ្យដឹងថា ប្រជាពលរដ្ឋសហគមន៍បុរីកីឡាដែលមកអុជធូបបួងសួងនៅព្រះអង្គដងកើ គឺមិនមានការបង្ក្រាប ឬបណ្តេញចេញនោះទេ បើទោះបីជាពួកគាត់មកជួបជុំដោយគ្មានការអនុញ្ញាតពីសាលារាជធានីភ្នំពេញក៏ដោយ ម្យ៉ាងវិញទៀត មិនធ្វើឱ្យបាត់បង់សណ្តាប់ធ្នាប់ឡើយ ។ មន្ត្រីដដែលបញ្ជាក់ថា ដោយឡែក នៅព្រឹកថ្ងៃទី២០ កុម្ភៈ ក៏មានក្រុមយុវជន៧នាក់ និងព្រះសង្ឃ៣អង្គ នាំគ្នាមកកាន់ទីលានប្រជាធិបតេយ្យ ដើម្បីសម្តែងការអបអរសាទរទិវាយុត្តិធម៌សង្គមពិភពលោក ២០ កុម្ភៈ ប៉ុន្តែពួកគេត្រូវបានកម្លាំងសមត្ថកិច្ចចម្រុះខណ្ឌដូនពេញ បណ្តេញចេញពីទីនោះ ព្រោះការជួបជុំនេះធ្វើឡើងដោយមិនមានការអនុញ្ញាតពីសាលារាជធានីភ្នំពេញ ៕
ចែករំលែកព័តមាននេះ