រាជធានីភ្នំពេញ ៖ ហេតុការណ៍ហិង្សាមួយដែលឈានដល់ការវាយស្លាប់បុរសជនជាតិវៀតណាមម្នាក់ នៅមុខរោងចក្របារីសេក ស្ថិតក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ កាលពីវេលាម៉ោង៩យប់ ថ្ងៃទី១៥ កុម្ភៈ ឆ្នាំ២០១៤ ហាក់ដូចជាបង្កឱ្យមានភាពស្មុគស្មាញមួយ និងកំពុងក្លាយជាការវិភាគជាទូទៅផងដែរថា តើការសម្លាប់នេះជាការរើសអើងពូជសាសន៍ឬបែបណា?
ការវាយសម្លាប់នោះ គឺជាហិង្សាព្រួតវាយគួរឱ្យភ្ញាក់ផ្អើលមួយពីសំណាក់មនុស្សជាច្រើននាក់ ហើយក្រោយពេលកើតហេតុសមត្ថកិច្ចបានឃាត់ខ្លួនបុរសម្នាក់ដើម្បីសួរនាំ ផ្ទុយទៅវិញស្រាប់តែកសាងសំណុំរឿងបញ្ជូនទៅសាលាដំបូងដោយចោទពីបទបង្កឱ្យមានហិង្សា និងជាអ្នកស្រែកឱ្យមានហិង្សាកើតឡើង ។ មកដល់រសៀលថ្ងៃទី១៩ កុម្ភៈ តុលាការបានចោទប្រកាន់បុរសរូបនេះពីបទហិង្សាដោយចេតនាមានស្ថានទម្ងន់ទោស និងបញ្ជូនទៅឃុំខ្លួនបណ្តោះអាសន្ននៅពន្ធនាគារព្រៃស រង់ចាំការសើុបអង្កេតដោយចៅក្រមនៅពេលក្រោយ ។ អ្វីដែលជាការកត់សម្គាល់ជុំវិញរឿងរា៉វខាងលើនេះ បុរសឈ្មោះ ប៊ុន ចាន់វុត្ថា អាយុ៥០ឆ្នាំ មានទីលំនៅផ្ទះលេខ១១១៥ ផ្លូវជាតិលេខ២ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ ដែលជាជនជាប់ចោទ ដោយមិនដឹងថាខ្លួនមានទោសអ្វី ក៏ដូចជាក្រុមគ្រួសារប្រពន្ធកូន បានស្រែកទ្រហោយំរកយុត្តិធម៌ដោយអះអាងថាឈ្មោះ ប៊ុន ចាន់វុត្ថា មិនមែនជាឃាតករពិតប្រាកដ ដែលបានប្រើហិង្សាលើជនជាតិវៀតណាមឈ្មោះ ង្វៀង យាំងជាង អាយុ២៨ឆ្នាំ ដែលស្លាប់ដោយសារការព្រួតវាយពីសំណាក់ប្រជាពលរដ្ឋជាច្រើននាក់នោះឡើយ ។
ការលើកឡើងដូច្នេះដោយសារមានសាក្សីជាច្រើននាក់និយាយថា ពេលកើតហេតុវាយតប់គ្នាបណ្តាលឱ្យឈ្មោះ ង្វៀង យាំងជាង ស្លាប់នោះ ឈ្មោះ ប៊ុន ចាន់វុត្ថា បានរត់ទៅកាន់ស្នាក់ការប៉ុស្តិ៍នគរបាលចាក់អង្រែលើ ដើម្បីប្តឹងសមត្ថកិច្ចថា មានមនុស្សមួយក្រុមកំពុងវាយតប់គ្នាជាមួយកូនប្រុសគាត់ ហើយបែរជាត្រូវសមត្ថកិច្ចឃាត់ខ្លួនគាត់ទៅវិញ ។ ដូច្នេះហេតុការណ៍នេះ ក្រុមគ្រួសារជនជាប់ចោទបានសំណូមពរតាមរយៈកោះសន្តិភាពសុំទៅលោកប្រធានសាលាដំបូងរាជធានីភ្នំពេញ ក៏ដូចជាលោកចៅក្រម និងព្រះរាជអាជ្ញារួមជាមួយមន្ត្រីតុលាការដទៃទៀត ដែលកំពុងប្រតិបត្តិច្បាប់លើករណីចោទប្រកាន់ឈ្មោះ ប៊ុន ចាន់វុត្ថា សូមមេត្តាបើកការសើុបអង្កេតឱ្យបានម៉ត់ចត់ដើម្បីផ្តល់យុត្តិធម៌ជូនជនជាប់ចោទ ចៀសវាងមានរឿងអយុត្តិធម៌កើតឡើង ហើយឃាតករពិតប្រាកដបែរជារួចខ្លួនទៅវិញ ។ សូមរំលឹកថា កាលពីយប់ថ្ងៃទី១៥ កុម្ភៈ កន្លងមក ជនរងគ្រោះដែលស្លាប់បាត់បង់ជីវិតឈ្មោះ ង្វៀង យាំងជាង មានទីលំនៅជិតវត្តចាក់អង្រែក្រោម ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ត្រូវបានមិត្តភក្តិ និងអ្នកជិតខាងរត់មកប្រាប់ថា ឱ្យទៅជួយប្អូនប្រុសឈ្មោះ ង្វៀង យាំងតឹង ដែលកំពុងត្រូវគេព្រួតវាយដោយសាររឿងគ្រោះថ្នាក់ចរាចរណ៍តិចតួច នៅចំណុចខាងលើ ។ ពេលនោះឈ្មោះ ង្វៀង យាំងជាង ក៏ធ្វើដំណើរទៅកាន់កន្លែងកើតហេតុដើម្បីជួយមើលប្អូនរបស់ខ្លួន ។
ដោយឡែកឈ្មោះ ប៊ុន ចាន់វុត្ថា ក៏ត្រូវបានកូនប្រុសឈ្មោះ ប៊ុន សិទ្ធិវណ្ណ ទូរស័ព្ទមកប្រាប់ថា ខ្លួនត្រូវជនជាតិវៀតណាមព្រួតវាយ ទើបខ្លួនគាត់ជាឪពុកជិះម៉ូតូទៅជួយមើលកូននៅកន្លែងកើតហេតុដូចគ្នាដែរ ហើយក៏កើតមានការប្រទូស្តរា៉យគ្នាមួយប្រាវ រួចបែកគ្នារៀងៗខ្លួន ទៅ ។ ពេលនោះឈ្មោះ ង្វៀង យាំងជាង បានរត់គេចពីកន្លែងកើតហេតុលើកទី១ បំណងចូលទៅតំបន់ផ្សារដែកដែលគេច្រើនហៅថាជាភូមិយួនដើម្បីគេចខ្លួន និងរកមិត្តភក្តិជួយទើបបណ្តាលឱ្យមានមនុស្សមួយក្រុមធំព្រួតវាយម្តងទៀតរហូតស្លាប់នៅនឹងកន្លែង ។ ខណៈពេលកើតហេតុលើកទី២នេះ ឈ្មោះប៊ុន ចាន់វុត្ថា កំពុងស្ថិតនៅស្នាក់ការប៉ុស្តិ៍នគរបាលរដ្ឋបាលឯណោះ ដូច្នេះករណីនេះ ទើបក្រុមគ្រួសារជនជាប់ចោទទាមទាររកយុត្តិធម៌ពិតប្រាកដពីតុលាការ ។ បើទោះជាបែបណាក៏ដោយក៏មានការលើកឡើងថា ប្រជាពលរដ្ឋតាមផ្លូវសាធារណៈមិនគួរយកច្បាប់ព្រៃមកអនុវត្តបណ្តាលឱ្យមានការលាបពណ៌ដាក់គ្នា រហូតផ្ទុះហិង្សាវាយសម្លាប់ដូចករណីខាងលើនេះឡើយ ព្រោះសង្គមជាតិយើងមានច្បាប់គ្រប់គ្រាន់សម្រាប់ការពារជនគ្រប់ រូប ។ ឯសមត្ថកិច្ចពាក់ព័ន្ធក៏គួរស្វែងរកយុត្តិធម៌ពិតប្រាកដជូនបុគ្គលម្នាក់ និងមិនគួរបណ្តែតបណ្តោយទុកឱ្យជនឧក្រិដ្ឋរួចខ្លួន ហើយជាប់ចោទបុរសម្នាក់ដែលបានបដិសេធថា ខ្លួនមិនបានវាយសម្លាប់ជនរងគ្រោះឡើយ ។
ជុំវិញការចាប់ខ្លួនឈ្មោះ ប៊ុន ចាន់វុត្ថា គឺបានធ្វើឱ្យគ្រួសាររបស់គាត់ទាំងមូលបាត់បង់នូវអ្វីៗសព្វបែបយា៉ងទាំងអស់ ព្រោះរូបគាត់ជាមេគ្រួសារហើយបញ្ហាសំខាន់មួយទៀតនោះ គឺសូម្បីតែផ្ទះដែលកំពុងជ្រកកោនសព្វថ្ងៃក៏ជាប់បំណុលធនាគារដែរ ។ លោក ប៊ុន ចាន់វុត្ថា បានហៅការចាប់ខ្លួនរូបលោកនាពេលនេះ ថាជារឿងអយុត្តិធម៌ ព្រោះលោកមិនបានស្រែកញុះញង់ឱ្យស្អប់ជាតិសាសន៍នោះទេ ខណៈភរិយាសពជនរងគ្រោះអ្នកស្រី ម៉ែន សីុណាត បានអំពាវនាវឱ្យអាជ្ញាធររកយុត្តិធម៌ឱ្យប្តីរបស់ខ្លួន ហើយថា បើគ្មានការញុះញង់ថា «យួនវាយខ្មែរ» ទេនោះ ប្តីអ្នកស្រីក៏មិនត្រូវគេវាយស្លាប់អីុចឹងដែរ ។ បុរសដែលត្រូវអាជ្ញាធរចាប់ខ្លួនឈ្មោះ ប៊ុន ចាន់វុត្ថា អាយុ៥០ឆ្នាំ បានច្រានចោលការចោទប្រកាន់មកលើរូបលោកថា ជាអ្នកញុះញង់ឱ្យមានការរើសអើងជាតិសាសន៍នោះ ។ យោងតាមប្រភពវិទ្យុRFA ផ្សាយថ្ងៃទី១៩ កុម្ភៈ ថា ជាងជួសជុលម៉ូតូម្នាក់ឈ្មោះយ៉ាវ សុខជា ដែលបានឃើញហេតុការណ៍ផ្ទាល់នឹងភ្នែកនៅពេលនោះរៀបរាប់ឱ្យដឹងក្រោយពេលកើតហេតុថា នៅម៉ោងប្រមាណជា៨យប់មនុស្ស២នាក់ស្រវឹងស្រា បានជិះម៉ូតូដួលនៅជិតកន្លែងជួសជុលម៉ូតូរបស់លោក ។ បន្ទាប់មកពួកគេក៏ក្រោកឡើង ហើយជិះម៉ូតូទៅបុកគូទរថយន្តខាងមុខទៀត ។ ក្រោយមកលោកក៏បានទៅជួយលើកម៉ូតូ និងប្រគល់សោឱ្យពួកគេ ហើយប្រាប់ថាឱ្យទៅផ្ទះវិញ ប៉ុន្តែពួកគេមិនព្រមទៅ ហើយនៅទូរស័ព្ទហៅគ្នា ។ ក្រោយមកគ្នីគ្នាពួកគេបានមកហើយចតម៉ូតូព្រោងព្រាតនៅមុខច្រកចូលផ្លូវចូលផ្ទះអ្នកស្រុកដែលនៅខាងក្នុង ។
លោក យ៉ាវ សុខជា និយាយថា «មានក្មេងម្នាក់នៅក្រោយនេះ វាមក វារកផ្លូវចូលផ្ទះអត់ឃើញ វាថាម៉ូតូនរណាគេដាក់ច្រងេងច្រងាងពេញផ្លូវ ? ពួកវាហ្នឹងក៏វាយអាមួយហ្នឹង វាយអាមួយហ្នឹង អាកូននោះរត់ទៅប្រាប់ឪវា ឪវាក៏ចេញមកឃាត់ ដើម្បីកុំឱ្យឈ្លោះគ្នា ដល់ហើយឃើញកូនគាត់របួសធ្ងន់អីុចឹង គាត់ក៏ទៅដាក់ពាក្យបណ្តឹងនៅប៉ុស្តិ៍សង្កាត់ចាក់អង្រែយើងនេះ។ ដល់ពេលហើយគាត់ហ្នឹងក៏ត្រូវគេវាយដែរ ពួកយួនហ្នឹងវាយ គាត់ក៏ឈរជូតឈាមមាត់កន្លែងខ្ញុំនេះ ដែលកំពុងប៉ះកង់នេះ ហើយមនុស្សគាត់ជាមនុស្សល្អបំផុតអត់ដែលរករឿងនរណាទាំងអស់ ហើយមូលហេតុអី្វបានជាប៉ូលិសប៉ុស្តិ៍ដែលគាត់ទៅដាក់ពាក្យបណ្តឹងហើយ ហេតុអីក៏ចាប់គាត់វិញ ករណីហ្នឹងវា២ វាមិនមែនតែមួយទេ» ។ ទាក់ទិននឹងករណីវាយសម្លាប់នេះ អនុប្រធានស៊ើបអង្កេតសិទ្ធិមនុស្សរបស់សមាគមអាដហុក លោក ចាន់ សុវ៉េត បានមានប្រសាសន៍ថា ក្រុមការងាររបស់លោកក៏ចុះទៅពិនិត្យមើលអំពីករណីនេះដែរ ។ លោកថា ការសម្លាប់មនុស្សដោយហ្វូងមនុស្សនេះ វាជាកាតព្វកិច្ចរបស់អាជ្ញាធររដ្ឋាភិបាលដែលត្រូវបើកស៊ើបអង្កេត ។
លោក ចាន់ សុវ៉េត ថ្លែងថា «បើសិនជាយើងពិនិត្យទៅលើគោលការណ៍ច្បាប់ជាធរមាន មិនចំពោះពលរដ្ឋខ្មែរទេ ជនជាតិណាក៏ដោយ ពីព្រោះស្រុកខ្មែរយើងវាមានជនជាតិយួន មានជនជាតិចិន ពួកគេកំពុងតែរស់នៅប្រកបរបររកស៊ីនៅក្នុងប្រទេស អុីចឹងប្រសិនបើគេរស់នៅក្នុងប្រទេស គេត្រូវតែគោរពច្បាប់ប្រទេស ។ អីុចឹងប្រសិនបើពួកគេទទួលរងនូវអំពើឧក្រិដ្ឋកម្មណាមួយពាក់ព័ន្ធ ដល់រូបរាងកាយ ឬក៏អាយុជីវិត អាហ្នឹងតាមច្បាប់ប្រទេសយើងត្រូវតែធ្វើការស៊ើបអង្កេត ស្រាវជ្រាវ ថាតើការកើតមានបណ្តាលឱ្យមានមនុស្សស្លាប់អុីចឹង កើតមានមនុស្សស្លាប់អីុចឹង វាបណ្តាលមកពីមូលហេតុអ្វីពិតប្រាកដ? យើងមិនអាចឱ្យមានអរិភាពទៅលើបញ្ហាការរើសអើងជាតិសាសន៍ទេ» ៕
ចែករំលែកព័តមាននេះ