ខេត្តកណ្តាល ៖ សពមនុស្ស២នាក់ក្នុងចំណោម៣នាក់ ដែលបានបាត់ខ្លួននៅបាតទន្លេដោយសារការបាក់ស្រុតច្រាំងទន្លេមេគង្គនោះ បានផុសអណ្តែតជាបន្តបន្ទាប់ ក្នុងពេលវេលាខុសៗគ្នា នៅកន្លែងកើតហេតុ ។
ខេត្តកណ្តាល ៖ សពមនុស្ស២នាក់ក្នុងចំណោម៣នាក់ ដែលបានបាត់ខ្លួននៅបាតទន្លេដោយសារការបាក់ស្រុតច្រាំងទន្លេមេគង្គនោះ បានផុសអណ្តែតជាបន្តបន្ទាប់ ក្នុងពេលវេលាខុសៗគ្នា នៅកន្លែងកើតហេតុ ។
លោកវរសេនីយ៍ត្រី ម៉ែន សុឃឿន អធិការនគរបាលស្រុកខ្សាច់កណ្តាល ឱ្យដឹងថា សពដែលផុសអណ្តែតនោះមាន ១-ឈ្មោះ ចេក រស្មី ហៅឈួយ ភេទប្រុស អាយុ១ឆ្នាំ ត្រូវជាចៅ បានផុសអណ្តែតនៅវេលាម៉ោង៩ព្រឹក ថ្ងៃទី២០ កុម្ភៈ ២-ឈ្មោះ ប៉ុក សំអុល ភេទស្រី អាយុ៣៩ឆ្នាំ ជាជីដូន បានផុសអណ្តែតនៅវេលាម៉ោង១និង៣០នាទីរសៀល ថ្ងៃទី២០ កុម្ភៈ ។ លោកអធិការបានបញ្ជាក់ទៀតថា ចំណែកក្មេងប្រុសម្នាក់ទៀត រហូតមកដល់រសៀលថ្ងៃទី២០ កុម្ភៈ នៅមិនទាន់ផុសអណ្តែតនៅឡើយទេ ហើយសមត្ថកិច្ចកំពុងរង់ចាំមើលបន្តទៀត ។
គួររំឭកថា មនុស្ស៣នាក់បានបាត់ខ្លួន ខណៈផ្ទះពលរដ្ឋចំនួន៣ខ្នង បានបាក់ធ្លាក់ចូលទៅក្នុងទឹកទន្លេមេគង្គកាលពីវេលាម៉ោង១០និង៣០នាទីយប់ ថ្ងៃទី១៨ កុម្ភៈ នៅត្រង់ចំណុចភូមិព្រះប្រសប់ ឃុំព្រះប្រសប់ ស្រុកខ្សាច់កណ្តាល ដែលបណ្តាលមកពីការបាក់ច្រាំងទន្លេ។ មន្ត្រីនគរបាលស្រុកខ្សាច់កណ្តាល បានឱ្យដឹងថា គ្រោះថ្នាក់បាក់ច្រាំងទន្លេនេះ បណ្តាលឱ្យលំនៅឋានអ្នកភូមិចំនួន៣ខ្នង ក្នុងនោះមានមួយខ្នងបានលិចបាត់ចូលទៅក្នុងទន្លេមេគង្គ និងពីរខ្នងទៀត បានបាក់ដាច់មួយកំណាត់ចូលទៅក្នុងទឹកទន្លេ ។ ក្នុងឧបទ្ទវហេតុដ៏សោកសៅនេះ បានប៉ះពាល់ដល់មនុស្ស៥នាក់ រងគ្រោះថ្នាក់លង់ទឹកទន្លេ ក្នុងនោះមាន២នាក់ ត្រូវបានសង្គ្រោះទាន់ពេលវេលា ។ ចំណែក៣នាក់ទៀតជួយមិនទាន់ ក៏បានបាត់ខ្លួនក្នុងទឹកទន្លេ ជាមួយលំនៅឋានដែលបាក់ធ្លាក់ក្នុងទឹក ។
មន្ត្រីនគរបាលស្រុកបានឱ្យដឹងទៀតថា មនុស្ស៣នាក់ ដែលបាត់ខ្លួនក្នុងទឹកទន្លេនោះមាន ១-ឈ្មោះ ប៉ុក សំអុល ភេទស្រី អាយុ៣៩ឆ្នាំ ជាម្តាយនិងជាជីដូន ២-ឈ្មោះ ចេក ព្រិល ភេទប្រុស អាយុ២ឆ្នាំ ជាកូន និង៣-ឈ្មោះ ចេក រស្មី ភេទប្រុស អាយុ១ឆ្នាំ ត្រូវជាចៅ ។ ទាំង៣នាក់ដែលសន្មតថាស្លាប់នេះ គឺជាក្រុមគ្រួសាររស់នៅក្នុងផ្ទះដែលស្រុតបាក់លិចចូលទៅក្នុងបាតទន្លេ៕
ចែករំលែកព័តមាននេះ