រាជធានីភ្នំពេញ ៖ មេដឹកនាំគណបក្សសង្គ្រោះជាតិ ទាំងលោក សម រង្សុី ប្រធានគណបក្ស និង លោក កឹម សុខា អនុប្រធានគណបក្ស បានព្រមានថា នឹងលុបកិច្ចចរចាជាមួយគណបក្សប្រជាជនកម្ពុជា ប្រសិនបើគណបក្សប្រជាជនកម្ពុជា នៅតែបន្តការរារាំងដល់វេទិកាសាធារណៈរបស់ខ្លួន ។
រាជធានីភ្នំពេញ ៖ មេដឹកនាំគណបក្សសង្គ្រោះជាតិ ទាំងលោក សម រង្សុី ប្រធានគណបក្ស និង លោក កឹម សុខា អនុប្រធានគណបក្ស បានព្រមានថា នឹងលុបកិច្ចចរចាជាមួយគណបក្សប្រជាជនកម្ពុជា ប្រសិនបើគណបក្សប្រជាជនកម្ពុជា នៅតែបន្តការរារាំងដល់វេទិកាសាធារណៈរបស់ខ្លួន ។ ការព្រមានរបស់មេបក្សប្រឆាំងទាំងពីររូបនេះ ធ្វើឡើងក្នុងសន្និសីទសារព័ត៌មានមួយកាលពីព្រឹកថ្ងៃទី២០ កុម្ភៈ នៅទីស្នាក់ការគណបក្សសង្គ្រោះជាតិ ក្នុងសង្កាត់ចាក់អង្រែលើ ខណ្ឌមានជ័យ ។
លោក សម រង្សុី ប្រធានគណបក្សសង្គ្រោះជាតិ ថ្លែងថា ប្រសិនបើគណបក្សប្រជាជនកម្ពុជា នៅតែបញ្ជាកម្លាំងរបស់ខ្លួនឱ្យមករារាំងវេទិកាសាធារណៈរបស់គណបក្សសង្គ្រោះជាតិ នៅតាមបណ្តាខេត្តនានា ដែលថ្នាក់ដឹកនាំចុះជួបសំណេះសំណាលជាមួយសមាជិក-សមាជិការបស់គណបក្សសង្គ្រោះជាតិទៀតនោះ គណបក្សសង្គ្រោះជាតិ នឹងបញ្ឈប់ការចរចា គឺរហូតដល់មានការធានាឱ្យបានច្បាស់លាស់ថា ឈប់មករំខានគណបក្សសង្គ្រោះជាតិ ទើបគណបក្សសង្គ្រោះជាតិ ចាប់ផ្តើមចរចាជាថ្មី ។
លោក សម រង្សុី ថ្លែងទៀតថា ការជួបជាមួយប្រជាពលរដ្ឋនេះ ជាការស្របច្បាប់ និងជាកន្លែងដែលមានការគាំទ្រគណបក្សសង្គ្រោះជាតិច្រើន ចុះហេតុអ្វីបានជាគណបក្សប្រជាជនកម្ពុជា មានការគាំទ្រតិចសោះ មករំខានមិនឱ្យគេជួបជុំគ្នា ។ គណបក្សប្រជាជនកម្ពុជា កំពុងតែរំលោភលើសេចក្តីថ្លែងការណ៍រួមរបស់ខ្លួនជាមួយគណបក្សសង្គ្រោះជាតិ កាលពីកិច្ចប្រជុំថ្នាក់ដឹកនាំកំពូលនាថ្ងៃទី១៦ កញ្ញា ឆ្នាំ២០១៣ នៅវិមានរដ្ឋសភាថា ឈប់ប្រើអំពើហិង្សា តែផ្ទុយពីកិច្ចព្រមព្រៀង គណបក្សប្រជាជនកម្ពុជាបានប្រើអំពើហិង្សាជារៀងរហូត ជាក់ស្តែងកាលពីពេលថ្មីៗនេះ ។
ថ្នាក់ដឹកនាំគណបក្សសង្គ្រោះជាតិរូបនេះបញ្ជាក់ថា ប្រសិនបើថ្នាក់ដឹកនាំគណបក្សប្រជាជនកម្ពុជា នៅតែប្រព្រឹត្តទង្វើបែបនេះ មិនចាំបាច់ជួបគ្នាចរចាទៀតទេ ឈប់
ចរចា ។ លោក កឹម សុខា អនុប្រធានគណបក្សសង្គ្រោះជាតិ បានលើកឡើងថា នៅថ្ងៃទី២០ កុម្ភៈ គឺជាថ្ងៃចុងក្រោយនៃការឈប់ចរចាជាមួយគណបក្សប្រជាជនកម្ពុជា ប្រសិនបើគណបក្សប្រជាជនកម្ពុជា នៅតែរំខានដល់វេទិកាសាធារណៈរបស់គណបក្សសង្គ្រោះជាតិ នៅខេត្តកំពង់ឆ្នាំង ។ លោក កឹម សុខា ស្នើឱ្យអ្នកសារព័ត៌មានចុះទៅមើលផ្ទាល់ភ្នែកថា តើកម្លាំងរបស់គណបក្សប្រជាជនកម្ពុជា ធ្វើអ្វីមកលើគណបក្សសង្គ្រោះជាតិ នៅពេលធ្វើវេទិកាសាធារណៈ គឺមានការគំរាមកំហែងរំខានទៀត ឬអត់ «បើមិនជឿ សូមទៅជាមួយខ្ញុំ» ។ លោក កឹម សុខា បានសង្កត់ធ្ងន់ទៅលើថ្នាក់ដឹកនាំគណបក្សប្រជាជនកម្ពុជាថា ប្រសិនបើគណបក្សប្រជាជនកម្ពុជា ចង់ឱ្យមានការចរចាដោះស្រាយបញ្ហា ហេតុអ្វីចាំបាច់ធ្វើអ្វីដែលផ្ទុយពីការប្រកាសថា បក្សខ្លួនបើកទ្វារចំហក្នុងការចរចាជាមួយគណបក្សសង្គ្រោះជាតិ ។ គណបក្សសង្គ្រោះជាតិ ប្រកាន់ជំហរចរចាជានិច្ច តែផ្ទុយទៅវិញ ប្រសិនបើគណបក្សប្រជាជនកម្ពុជា ប្រើកាណុងកាំភ្លើងមកចរចា តើឱ្យថ្នាក់ដឹកនាំគណបក្សសង្គ្រោះជាតិ ចរចាជាមួយកាណុងកាំភ្លើងយ៉ាងម៉េច គណបក្សសង្គ្រោះជាតិ ចង់ដោះស្រាយដោយសន្តិវិធី ។
លោក កឹម សុខា ថ្លែងទៀតថា ប្រសិនបើថ្ងៃនេះ គ្មានការរំខានពីកងកម្លាំងរបស់គណបក្សប្រជាជនកម្ពុជា នោះការចរចាជាមួយគណបក្សប្រជាជនកម្ពុជា នឹងបន្តទៀត ។ ចំពោះវិធានការ និងអ្វីដែលគណបក្សសង្គ្រោះជាតិបន្តធ្វើទៀត គឺការស្វែងរកយុត្តិធម៌ជូនប្រជាពលរដ្ឋ ។ គណបក្សសង្គ្រោះជាតិប្រកាន់ជំហរ គឺស្វែងរកការគាំទ្រពីបណ្តាអង្គទូត និងប្រទេសនានា និងនៅជាមួយប្រជាពលរដ្ឋជានិច្ច ។ ថ្នាក់ដឹកនាំគណបក្សសង្គ្រោះជាតិ ចុះជួបជាមួយប្រជាពលរដ្ឋ ដោយសារតែគណបក្សសង្គ្រោះជាតិ មិនមានប្រព័ន្ធផ្សព្វផ្សាយដូចគណបក្សប្រជាជនកម្ពុជា ទេ ។ លោក សម រង្សុី បានទម្លាក់កំហុសលើគណបក្សប្រជាជនកម្ពុជាថា មិនគោរពតាមកិច្ចព្រមព្រៀងថ្ងៃទី១៦ កញ្ញា ឆ្នាំ២០១៣ នៃស្មារតីជំនួបកំពូល ដែលថ្នាក់ដឹកនាំគណបក្សទាំងពីរព្រមព្រៀងគ្នានោះគឺ ១-ការបញ្ឈប់ការប្រើអំពើហិង្សា ២-បន្តការជជែកគ្នាទៀត និង៣-និយាយពីការកែទម្រង់ការបោះឆ្នោត ។ ដូច្នេះ លក្ខខណ្ឌទាំងនោះគណបក្សសង្គ្រោះជាតិ បានគោរពទាំងអស់ តែផ្ទុយទៅវិញ គណបក្សប្រជាជនកម្ពុជា មិនបានគោរពទេ គឺនៅតែប្រើអំពើហិង្សា ។ លោក កឹម សុខា បានសាទរចំពោះការជួបជុំជាមួយប្រជាពលរដ្ឋរបស់គណបក្សប្រជាជនកម្ពុជា និងគណបក្សសង្គ្រោះជាតិ ប៉ុន្តែសូមកុំមានការរំខានដល់វេទិកាសាធារណៈរបស់គណបក្សសង្គ្រោះជាតិ ។
ទាក់ទងនឹងការលើកឡើងរបស់លោក សម រង្សុី ថា ប្រសិនបើការបោះឆ្នោតសាជាថ្មីមុនអាណត្តិនោះថា គណបក្សសង្គ្រោះជាតិ នឹងឈ្នះ លោក ជាម យៀប មន្ត្រីជាន់ខ្ពស់របស់គណបក្សប្រជាជនកម្ពុជា និងជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ សវនកម្ម នៃរដ្ឋសភា មានប្រសាសន៍ថា វាមិនអាចទៅរួចទេ ព្រោះខុសនឹងរដ្ឋធម្មនុញ្ញ ហើយប្រសិនបើគណបក្សសង្គ្រោះជាតិ មានការបោះឆ្នោតលើកក្រោយចាញ់គណបក្សប្រជាជនកម្ពុជា នោះគណបក្សសង្គ្រោះជាតិ ពិតជាខ្មាសប្រជាពលរដ្ឋដែលគាំទ្រខ្លួនមិនខានឡើយ ៕
ចែករំលែកព័តមាននេះ