រាជធានីភ្នំពេញ ៖ យោងតាមប្រភពពីសាលាដំបូងរាជធានីភ្នំពេញ បានឱ្យដឹងថា កាលពីថ្ងៃទី១៩ កុម្ភៈ មេធាវីតំណាងឱ្យលោក ឃួង ស្រេង អភិបាលរងរាជធានីភ្នំពេញ ដែលជាដើមបណ្ដឹងក្នុងចំណោមដើមបណ្ដឹងជាច្រើនទៀតបានចូលបំភ្លឺតាមដីកាកោះហៅរបស់លោកហៀង សុភ័ក្រ្ត ព្រះរាជអាជ្ញារងអមសាលាដំបូងរាជធានីភ្នំពេញ ទាក់ទងនឹងសំណុំរឿងបាតុកម្មក្លាយជាអំពើហិង្សារហូតមានមនុស្សស្លាប់និងរងរបួសជាច្រើននាក់ ។
ក្នុងករណីនេះ អយ្យការតុលាការនៅមិនទាន់បានបញ្ចប់នីតិវិធីរបស់ខ្លួនក្នុងការសាកសួរភាគីដែលពាក់ព័ន្ធនោះទេ ហើយក៏នៅមិនទាន់ចោទប្រកាន់លើជនជាប់ចោទចំនួន៣នាក់គឺ ១-លោក សម រង្សុី ២-លោក កឹម សុខា ៣-លោក រ៉ុង ឈុន នៅឡើយដែរ ។ តុលាការបានបញ្ជាក់ថា ការចូលបំភ្លឺរបស់មេធាវីតំណាងដើមបណ្ដឹងនេះធ្វើឡើងបន្ទាប់ពីបានចោទសួរមនុស្សចំនួន៣នាក់ គឺលោក សម រង្សុី ប្រធានគណបក្សសង្គ្រោះជាតិ លោក កឹម សុខា អនុប្រធានគណបក្សសង្គ្រោះជាតិ និងលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យនិងជាប្រធានសហភាពសហជីពកម្ពុជា កាលពីថ្ងៃទី១៤ ខែមករា ឆ្នាំ២០១៤ កន្លងទៅ ទាក់ទងនឹងបទចោទថា«ញុះញង់ឱ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម» កាលពីថ្ងៃទី២-៣ ខែមករា ឆ្នាំ២០១៤ នៅតាមបណ្ដោយផ្លូវវ៉េងស្រេង សង្កាត់ចោមចៅ ខណ្ឌពោធិ៍សែនជ័យ បណ្ដាលឱ្យមនុស្សយ៉ាងហោចណាស់៣នាក់ស្លាប់ និងរងរបួសជាច្រើននាក់ ក្នុងអំឡុងពេលមានបាតុកម្មតវ៉ាទាមទារដំឡើងប្រាក់ខែគោលរបស់កម្មករឱ្យបាន១៦០ដុល្លារនោះ ។
ការសាកសួរដើមបណ្ដឹងនៅពេលនេះ ធ្វើឡើងក្នុងអំឡុងពេលដែលដំណើរការសើុបអង្កេតកំពុងប្រព្រឹត្តទៅ និងបន្ទាប់ពីតុលាការបានចោទសួរជនជាប់ចោទ៣នាក់ គឺលោក សម រង្សុី លោក កឹម សុខា និងលោក រ៉ុង ឈុន កាលពីថ្ងៃទី១៤ មករា ឆ្នាំ២០១៤ កន្លងមក នៅអយ្យការអមសាលាដំបូងរាជធានីភ្នំពេញ ។ ទន្ទឹមនឹងនេះ តុលាការក៏បានសាកសួរមន្ត្រីកងរាជអាវុធហត្ថដែលរងរបួសក្នុងបាតុកម្មនាពេលនោះជាច្រើនរូបដែលខ្លះជាសក្សី និងខ្លះជាជនរងគ្រោះរួចមកហើយដែរ ហើយការសាកសួរទាំងនេះគឺដើម្បីស្រាវជ្រាវសើុបអង្កេតបន្ថែមក្នុងគោលបំណងដាក់បន្ទុកលើជនជាប់ចោទ៣នាក់ខាងលើនេះ ។ ក្នុងសំណុំរឿងនេះដែរ មនុស្សចំនួន២១នាក់កំពុងត្រូវបានឃុំខ្លួនដែលក្នុងនោះមានលោក វន់ ពៅ ជាប្រធានសមាគមសេដ្ឋកិច្ចក្រៅប្រព័ន្ធ ក្រុមសិទ្ធិមនុស្ស និងកម្មករ ។ គួររំលឹកថា កាលពីថ្ងៃទី១៤ ខែមករា ឆ្នាំ២០១៤ មេដឹកនាំគណបក្សសង្គ្រោះជាតិ លោក សម រង្សុី និងលោក កឹម សុខា ប្រធាន-អនុប្រធានគណបក្ស និងលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានចូលទៅបំភ្លឺនៅសាលាដំបូងរាជធានីភ្នំពេញតាមដីកាកោះរបស់លោកព្រះរាជអាជ្ញារង ហៀង សុភ័ក្រ្ត ។
ការចូលបំភ្លឺនៅសាលាដំបូងរាជធានីភ្នំពេញ នាព្រឹកថ្ងៃទី១៤ មករា នោះ សំណុំរឿងមានបទចោទតែមួយដូចគ្នាគឺ«ការញុះញង់ឱ្យប្រព្រឹត្តបទឧក្រិដ្ឋ ឬប្រព្រឹត្តអំពើហិង្សាបង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម» ដោយសារតែមេបក្សប្រឆាំងបានដឹកនាំធ្វើបាតុកម្មនាពេលកន្លងមកនេះ ។ គេនៅមិនទាន់ដឹងថា មេដឹកនាំទាំងបីរូបនេះត្រូវបានចោទប្រកាន់ឬយ៉ាងណានោះទេ ព្រោះពួកគាត់មិនមានការចាប់ខ្លួនទេក្រោយការសាកសួរមានរយៈពេលរាប់ម៉ោង ហើយក្រុមអ្នកគាំទ្ររាប់ពាន់នាក់ក៏បានប្រមូលផ្ដុំគ្នានៅខាងក្រៅតុលាការផងដែរ ដែលធ្វើឱ្យទីផ្សារ និងចរាចរណ៍លើកំណាត់ផ្លូវនេះត្រូវបិទទាំងស្រុង ។ នៅខាងក្រៅតុលាការ ក្រោយពេលចេញពីបន្ទប់សាកសួរ លោក សម រង្សុី បានមានប្រសាសន៍ថា លោកមិនមានការព្រួយបារម្ភពីការចាប់ខ្លួនលោកនោះទេ ។ លោកបញ្ជាក់ថា លោកនៅតែបន្តការទាមទារលុះត្រាណាប្រជា ពលរដ្ឋទទួលបានយុត្តិធម៌ ហើយនៅពេលណាប្រជាពលរដ្ឋមិនទាន់បានយុត្តិធម៌ទេ ការតវ៉ានៅតែមាន ។ ចំណែកឯលោក កឹម សុខា បានបញ្ជាក់ថា លោកនៅតែបន្តដឹកនាំការតវ៉ាដើម្បីធ្វើយ៉ាងណាឱ្យមានការផ្លាស់ប្ដូរនៅកម្ពុជាឱ្យទាល់តែបាន ។
ដីកាកោះដែលធ្វើឡើងកាលពីថ្ងៃទី៣ មករា ឆ្នាំ២០១៤ ត្រូវបានគេមើលឃើញថា ធ្វើឡើងភ្លាមៗក្រោយពីមានការប៉ះទង្គិចគ្នាតែប៉ុន្មានម៉ោងប៉ុណ្ណោះ ។ ការតវ៉ារហូតផ្ទុះហិង្សានេះក៏ត្រូវបានគេមើលឃើញផងដែរថាកើតឡើងប្រមាណជា១ថ្ងៃបន្ទាប់ពីលោក សម រង្សុី ប្រកាសប្ដេជ្ញាចិត្តជួយទាមទារប្រាក់ខែគោលជូនកម្មករឱ្យបាន១៦០ដុល្លារ ហើយលោកអំពាវនាវឱ្យកម្មករចូលរួមទាំងអស់គ្នាទាមទារឱ្យទាល់តែបាន ។ មានការចំអកទៅលើសកម្មភាពទាមទាររបស់លោក សម រង្សុី ថា សូម្បីតែអង្គរក្សរបស់លោកបានតែ៨០ដុល្លារ ចាញ់អង្គរក្សលោក កឹម សុខា ផងដែលបានជាង១០០ដុល្លារ តើគប្បីបន្ថែមប្រាក់ខែឱ្យអង្គរក្សរបស់លោកសិនទៅបានទេ ?
ចែករំលែកព័តមាននេះ