រាជធានីភ្នំពេញ ៖ នៅថ្ងៃសុក្រ ទី២១ កុម្ភៈនេះ កីឡាករជើងខ្លាំងពីររូបគឺកីឡាករចាន់ ស៊ីណាត និងកីឡាករចៅ ផលឌឿ នឹងឡើងសង្វៀនទូរទស្សន៍បាយ័នស្ទឹងមានជ័យព្រមគ្នា មិនតែបុ៉ណ្ណោះ ពួកគេថែមទាំងបានបញ្ចេញអំនួតរៀងខ្លួនថា ពួកគេនឹងឈ្នះគូប្រកួតដោយមិនពិបាកសម្រាប់ការប្រកួតល្ងាចនេះទៀតផង។
រាជធានីភ្នំពេញ ៖ នៅថ្ងៃសុក្រ ទី២១ កុម្ភៈនេះ កីឡាករជើងខ្លាំងពីររូបគឺកីឡាករចាន់ ស៊ីណាត និងកីឡាករចៅ ផលឌឿ នឹងឡើងសង្វៀនទូរទស្សន៍បាយ័នស្ទឹងមានជ័យព្រមគ្នា មិនតែបុ៉ណ្ណោះ ពួកគេថែមទាំងបានបញ្ចេញអំនួតរៀងខ្លួនថា ពួកគេនឹងឈ្នះគូប្រកួតដោយមិនពិបាកសម្រាប់ការប្រកួតល្ងាចនេះទៀតផង។
កីឡាករចាន់ ស៊ីណាត មកពីក្លិបនិរោធមានជ័យ នឹងដល់ថ្ងៃអង្សាដែលត្រូវកីឡាករជើងខ្លាំង អ៊ុង ស៊ីណា មកពីក្លិបផ្សារបឹងទំពុន ធ្វើការសងសឹកនៅថ្ងៃសុក្រល្ងាចនេះ ។ ជំនួបរវាងពួកគេបានធ្វើឱ្យអ្នកស្នេហាកីឡាប្រដាល់មួយចំនួនផ្តោតការចាប់អារម្មណ៍យ៉ាងខ្លាំង ។ ទោះបីយ៉ាងណា កីឡាករចាន់ ស៊ីណាត ហាក់រំពឹងយ៉ាងខ្លាំងថា គេនឹងអាចការពារតំណែងឈ្នះជាថ្មីម្តងទៀតទៅលើគូប្រកួតបាន បើទោះជា អ៊ុង ស៊ីណា បានបញ្ជាក់យ៉ាងមុតមាំថា នឹងយកឈ្នះឱ្យបានសម្រាប់ការប៉ះគ្នាលើកនេះ ។ ចាន់ ស៊ីណាត និងអ៊ុង ស៊ីណា បានប៉ះគ្នា២ដងរួចមកហើយ ដោយកាលពីថ្ងៃទី២ ខែធ្នូ ឆ្នាំ២០១២ កន្លងទៅ ចាន់ ស៊ីណាត បានផ្តួល អ៊ុង ស៊ីណា ឱ្យបរាជ័យដោយពិន្ទុយ៉ាងអាម៉ាស់ និងលើកទី២ កាលពីថ្ងៃទី៣ ខែមីនា ឆ្នាំមុននេះ ។ បុ៉ន្តែការប្រកួតកាលពីលើកទី២ នោះពុំបានទទួលលទ្ធផលនោះឡើយ ដោយសារតែពួកគេបញ្ចេញសកម្មភាពមិនសូវវាយតប់គ្នា ហើយក៏ត្រូវគណៈកម្មការ និងលោកអាជ្ញាកណ្តាលបណ្តេញចុះពីលើរេញក្នុងពេលមិនទាន់កំណត់បានដឹងចាញ់ឈ្នះ ។
ចាន់ ស៊ីណាត និយាយថា ទោះជាការប្រកួតលើកទី២ ធ្វើឱ្យលេចឡើងនូវការរិះគន់ច្រើនពីសំណាក់អ្នកទស្សនា ក៏ការប្រកួតនាល្ងាចនេះនឹងមិនអាចធ្វើឱ្យមានការអាម៉ាស់មុខ ហើយក្លាយជាអ្នកបរាជ័យក្រោមដៃកីឡាករអ៊ុង ស៊ីណា បានឡើយ បើទោះជាភាគីម្ខាងទៀតមានជំនឿថា អាចយកឈ្នះគេបានក្តី ។ មុននេះបន្តិច ចាន់ ស៊ីណាត ទទួលបរាជ័យក្រោមដៃកីឡាករថន វាសនា មកពីក្លិបនាគមានជ័យដោយពិន្ទុ ក្នុងការប្រកួតលើកចុុងក្រោយ ប៉ុន្តែគេនៅតែមានជំនឿចិត្តខ្ពស់ថា ការយកឈ្នះរបស់កីឡាករអ៊ុង ស៊ីណា ក្នុងជំនួបប៉ះគេគឺជារឿងដ៏លំបាក ។ ការប្រកួតលើកចុងក្រោយរបស់កីឡាករអ៊ុង ស៊ីណា បានយកឈ្នះកីឡាករឯម ស៊ីថុង មកពីក្លិបឫទ្ធីពោធិ៍សែនជ័យក្នុងទឹកទី៣ ប្រកបដោយកិត្តិយស ។ បុ៉ន្តែក្រុមអ្នកទស្សនានៅតែយល់ថា ក្រេឌីតរបស់កីឡាកររូបនេះមិនទាន់ដល់កម្រិតដែលអាចយកឈ្នះកីឡាករចាន់ ស៊ីណាត បានទេសម្រាប់ការប៉ះគ្នានាលើកទី៣ នេះ ។ មនុស្សជាច្រើនកំពុងចាំមើលថា តើកីឡាករចាន់ ស៊ីណាត នឹងឈ្នះដូចការសម្តែងអំនួត ឬក៏ត្រូវបាក់មុខក្រោមដៃកីឡាករភាគីម្ខាងទៀត ?
សម្រាប់កីឡាករចៅ ផលឌឿ មកពីក្លិបសំរោងកោងវិញ ក្នុងថ្ងៃដដែលនោះក៏នឹងដល់ថ្ងៃត្រូវឡើងប្រកួតជាមួយកីឡាករផង់ សុភាព មកពីក្លិបប្រដាល់ខេត្តរតនគិរីជាលើកដំបូង ដើម្បីបើកប្រវត្តិសាស្ត្រនៅក្នុងពិភពប្រដាល់នោះផងដែរ ។ រវាងកីឡាករទាំងពីរមិនធ្លាប់ជួបគ្នានោះទេ ហើយក៏មានកម្រិតនិងបទពិសោធន៍ខុសគ្នាឆ្ងាយណាស់ដែរ ខណៈដែលកីឡាករចៅ ផលឌឿ គឺជាកីឡាករស៊េរីមុខដែលត្រូវគេកត់សម្គាល់ថា មានសមត្ថភាពខ្លាំងជាង ។ កន្លងមក ផង់ សុភាព បានយកឈ្នះ នន់ ជំនិត មកពីមជ្ឈមណ្ឌលសកម្មភាពកម្ចាត់មីនកម្ពុជា ធ្លាប់ឈ្នះកីឡាករឡេះ តើក មកពីក្លិបពុទ្ធសេរីវង្សកីឡា និងធ្លាប់ឈ្នះកីឡាករឈិន ក្វាន់ងុ៉យ មកពីក្លិបមកុដរាជសីហ៍ ។ ការប្រកួតលើកចុងក្រោយ ផង់ សុភាព បានក្លាយជាអ្នកចាញ់ សូយ យក្សតឿ មកពីក្លិបពោធិជ័យកីឡាក្នុងទឹកទី៤ ។ ក្រេឌីតចុងក្រោយបានជំរុញឱ្យកីឡាកររូបនេះហ៊ានឡើងប្រកួតជាមួយ ចៅ ផលឌឿ ដោយធ្វើឱ្យមហាជនភាគច្រើនចាប់អារម្មណ៍ថា គេជាកីឡាករចិត្តធំ ។ យ៉ាងណាមិញ ចៅ ផលឌឿ និយាយថា គឺមិនអាចចាញ់ក្រោមដៃកីឡាករផង់ សុភាព បានទេ បើទោះជា ផង់ សុភាព ត្រូវគេសម្គាល់ថា មានសមត្ថភាពល្អប្រសើរនាពេលចុងក្រោយ។ ចៅ ផលឌឿ បញ្ជាក់ថា ការប្រកួតល្ងាចនេះត្រូវតែឈ្នះ ផង់ សុភាព ១០០% ដោយមិនអាចបរាជ័យក្រោមដៃរបស់កីឡាកររូបនេះបានឡើយ ។ ចៅ ផលឌឿ បានទាំងអះអាងថា ការចង់ឈ្នះរូបគេរបស់ ផង់ សុភាព គឺជាមហិច្ឆតាហួសប្រមាណដែលកើតពីការថ្លើមធំ ដោយមិនប៉ាន់ប្រមាណពីខ្លួនឯងទៀតផង ។ ក្រុមមនុស្សជាច្រើនយល់ថា ការអះអាងនេះគឺជារឿងសមទំនងដោយសំអាងថា ចៅ ផលឌឿ ធ្លាប់មានស្នាដៃច្រើនជាង ។
ម្នាក់ៗនិយាយថា ចៅ ផលឌឿ ត្រូវគេមើលឃើញថា មានភាពទំនងគួរឱ្យជឿជាក់បាន ដោយសារតែគេជាកីឡាករជើងខ្លាំង និងមានស្នៀតប្រដាល់ដែលមិនអាចមើលរំលងបាន ។ នៅក្នុងសង្វៀនដដែលនេះ កីឡាករឯម ម៉ូលី មកពីក្លិបឫទ្ធីពោធិ៍សែនជ័យ ក៏នឹងឡើងប្រកួតជាមួយកីឡាករវីវ៉ា សាមីត មកពីក្លិបមហិទ្ធិឫទ្ធិតាដំបងដែក ដែលគូនេះក៏ទទួលការចាប់អារម្មណ៍ខ្លាំងណាស់ដែរ ៕
ចែករំលែកព័តមាននេះ