អាជ្ញាធររាយការណ៍ថា មនុស្សយ៉ាងតិច១៥នាក់ស្លាប់កាលពីថ្ងៃទី២០ កុម្ភៈ ក្នុងការវាយប្រហារតាមអាកាសរបស់កងយន្តហោះប៉ាគីស្ថានលើបណ្តាទីតាំងរបស់ពួកតាលីបង់នៅភាគពាយ័ព្យប្រទេស ។ ការវាយឆ្មក់តាមអាកាសនោះធ្វើឡើងនៅវ៉ាហ្ស៊ីរីស្ថានខាងជើងមានទីតាំងរឹងមាំរបស់ពួកជីហាដនិយមនោះ ស្ថិតនៅជាប់ព្រំដែនជាមួយប្រទេសអាហ្វហ្គានីស្ថានជិតខាង ខណៈដែលពួកតាលីបង់ប៉ាគីស្ថានស្នើនាពេលមុននេះដល់រដ្ឋាភិបាលឱ្យមានបទឈប់បាញ់គ្នាមួយ ដើម្បីជំរុញការចរចាសន្តិភាពដែលផ្អាកនាសប្តាហ៍នេះ ។
តំបន់រងការវាយប្រហារតាមអាកាសនេះ គឺតំបន់មៀរអាលី និងបណ្តាតំបន់ជិតខាងនៅវ៉ាហ្ស៊ីរីស្ថានខាងជើង ។ អាជ្ញាធរបន្តថា ការវាយប្រហារតម្រង់លើបណ្តាទីតាំងលាក់ខ្លួនរបស់ពួកឧទ្ទាម ។ កន្លែងលាក់អាវុធ និងគ្រាប់រំសេវធំមួយក៏រងការបំផ្លាញដែរ ។កាលពីថ្ងៃទី១៩ កុម្ភៈ ពួកតាលីបង់ ប៉ាគីស្ថានបានស្នើដល់រដ្ឋាភិបាលឱ្យមានបទឈប់បាញ់គ្នាមួយ ដោយទាមទារឱ្យមានការធានាថា កងទ័ពនឹងមិនវាយប្រហារលើបណ្តាទីតាំងពួកគេឡើយ ។
ការចរចាសន្តិភាពត្រូវបានផ្អាកចាប់តាំងពីថ្ងៃទី១៧ កុម្ភៈមក បន្ទាប់ពីក្រុមមួយរបស់ពួកតាលីបង់ប្រកាសពីការសម្លាប់ទាហានប៉ាគីស្ថាន២៣នាក់ដែលត្រូវចាប់ពង្រត់ពីខែមិថុនា ឆ្នាំ២០១០ មក ។ចាប់តាំងពីការប្រកាសពីដំណាច់ខែមករា ពីដំណើរការសន្តិភាពដោយនាយករដ្ឋមន្ត្រីប៉ាគីស្ថានលោកណាវ៉ាស សារីហ្វ មក មនុស្សយ៉ាងតិច៧០នាក់បានត្រូវស្លាប់ក្នុងការវាយប្រហារភេរវកម្មទាំងឡាយរបស់ពួកតាលីបង់នៅប៉ាគីស្ថាន។
ពួកតាលីបង់ប៉ាគីស្ថានទាមទារថា ដើម្បីបង្កើតសន្តិភាព រដ្ឋាភិបាលត្រូវដោះលែងពួកអ្នកទោសជាមនុស្សពួកគេ ដកកងទ័ពចេញពីបណ្តាតំបន់កុលសម្ព័ន្ធ ហើយបង្កើតច្បាប់អ៊ិស្លាមក្នុងប្រទេស ។ សំណើពួកគេពិតណាស់ភាគច្រើនមិនអាចឱ្យរដ្ឋាភិបាលទទួលយកបានឡើយ រួចពួកអ្នកសង្កេតការណ៍យល់ថា ដំណើរការសន្តិភាពត្រូវបរាជ័យ ៕
ចែករំលែកព័តមាននេះ