ខេត្តប៉ៃលិន ៖ ស្រ្ដីម្នាក់បានរងរបួសធ្ងន់ហើយត្រូវបងប្អូន និងអ្នកជិតខាងដឹកយកទៅសង្គ្រោះនៅមន្ទីរពេទ្យបង្អែកខេត្ដ ក្រោយពីត្រូវអតីតប្ដីដែលទើបលែងលះគ្នាបានប្រមាណ៤ខែយកពូថៅកាប់ពីក្រោយ ខណៈនាងអង្គុយម្នាក់ឯងនៅផ្ទះម្ដាយបង្កើតរបស់ខ្លួន ។ អំពើហិង្សានេះ បណ្ដាលឱ្យស្រ្ដីរងគ្រោះរងរបួសក្បាលផ្នែកខាងស្ដាំដេរ៣ថ្នេរ របួសដៃខាងស្ដាំដេរ៥ថ្នេរ (ម្រាមដៃ២ថ្នេរ) រយះជង្គង់ខាងស្ដាំ និងហើមពោរក្បាលផ្នែកខាងក្រោយ សន្លប់ជាច្រើនម៉ោង ។
ហេតុការណ៍អតីតប្ដីលួចកាប់ប្រហារប្រពន្ធនេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី១៧ កុម្ភៈ នៅក្នុងភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ។ ទោះបីជាបែបណា អតីតប្ដីរូបនេះក៏ត្រូវនគរបាលប៉ុស្ដិ៍រដ្ឋបាលសង្កាត់អូរតាវ៉ៅចាប់ឃាត់ខ្លួន កាលពីវេលាម៉ោង៤រសៀលថ្ងៃដដែល ។ ស្រ្ដីរងគ្រោះឈ្មោះ មាស ស្រីមុំ អាយុ ៣២ឆ្នាំ មានស្រុកកំណើតនៅភូមិព្រះម្លូ ឃុំបឹងខ្នារ ស្រុកបាកាន ខេត្ដពោធិ៍សាត់ មានកូនចំនួន២នាក់ ម្នាក់ឈ្មោះ មាស វិច្ឆិកា ភេទស្រី អាយុ ១២ឆ្នាំ និងម្នាក់ទៀតឈ្មោះ មាស សីលា ភេទប្រុស អាយុ ១១ឆ្នាំ។ ចំណែកអតីតប្ដីឈ្មោះ ជូ សារី អាយុ ៤៩ឆ្នាំ ជាជាងផ្ទះ មានស្រុកកំណើតនៅភូមិខ្នារ ខេត្ដបាត់ដំបង ។ ២នាក់ប្ដីប្រពន្ធនេះមករស់នៅខេត្ដប៉ៃលិនអស់រយៈពេល១៤ឆ្នាំមកហើយ ។ ប្រភពព័ត៌មានពីសាក្សីនៅក្បែរកន្លែងកើតហេតុបានរៀបរាប់ឱ្យដឹងថា ២នាក់ប្ដីប្រពន្ធនេះតែងតែរកាំរកូសរស់នៅមិនចុះសម្រុងនឹងគ្នាអស់រយៈពេលជាច្រើនខែមកហើយ ដោយសារតែប្ដីប្រចណ្ឌជ្រុលពេក ដែលការប្រចណ្ឌបែបនេះ វាដើរហួសពីការស្រឡាញ់ទៅជាការធ្វើបាបបុកម្នេញផ្លូវចិត្ដផ្លូវកាយទៅវិញ រហូតឈានដល់ការលែងលះគ្នាអស់រយៈពេលប្រមាណ៤ខែមកហើយ ។
ប្រភពព័ត៌មានបន្ដទៀតថា បន្ទាប់ពីការចែកផ្លូវគ្នាដោយដឹងឮត្រឹមតែមេភូមិនោះ ស្រ្ដីជាប្រពន្ធក៏នាំកូន២នាក់ទៅរស់នៅផ្ទះម្ដាយបង្កើតនៅក្នុងភូមិក្បាលព្រលាន សង្កាត់អូរតាវ៉ៅ។ លុះនៅរសៀលថ្ងៃកើតហេតុ ខណៈស្រ្ដីរងគ្រោះកំពុងអង្គុយម្នាក់ឯងនៅក្រោមផ្ទះ ស្រាប់តែអតីតប្ដីចិត្ដមារយកពូថៅលួចកាប់ពីក្រោយពេញទំហឹង បណ្ដាលឱ្យរងរបួសដួលសន្លប់នៅនឹងកន្លែង ហើយត្រូវបានក្មេងស្រីម្នាក់ឈ្មោះ មាស ស្រីពៅ អាយុ១៨ឆ្នាំ ឃើញទាន់ក៏ស្រែកប្រាប់អ្នកជិតខាង និងម្ដាយរបស់នាងឱ្យរត់ទៅជួយចាប់យកពូថៅចេញ ។ ពេលនោះ ម្ដាយរបស់នាងចូលទៅចាប់ចេញ ស្រាប់តែបុរសជាប្ដីបានខាំដៃស្ដាំរបស់គាត់ បណ្ដាលឱ្យរងរបួសផងដែរ ។ ប្រភពនៅកន្លែងកើតហេតុបានបញ្ជាក់ទៀតថា មុនពេលអតីតប្ដីយកពូថៅទៅកាប់ប្រហារអតីតប្រពន្ធនេះ រូបគេបាននិយាយថា នឹងសម្លាប់ប្រពន្ធ ព្រមទាំងកូនជាមុនសិន ទើបសម្លាប់ខ្លួនឯងតាមក្រោយ ។ ទាក់ទិននឹងបញ្ហានេះ លោក គង់ សំណាង នាយប៉ុស្ដិ៍នគរបាលរដ្ឋបាលសង្កាត់អូរតាវ៉ៅ បានឱ្យដឹងថា មូលហេតុឈានដល់អតីតប្ដីយកពូថៅកាប់ប្រហារប្រពន្ធប៉ងសម្លាប់នេះ ដោយសារតែភ្លើងប្រចណ្ឌបានដុតរោលបុរសជាប្ដីឱ្យក្លាយទៅជាជនអគតិ ព្រោះមុនពេលកើតហេតុ ប្ដីរបស់នាងតែងតែរករឿងវាយដំប្រពន្ធ និងរស់នៅមិនចុះសម្រុងនឹងគ្នា រហូតដល់ប្រពន្ធប្ដឹងមេភូមិសុំលែងលះប្ដីអស់រយៈពេល៤ខែកន្លងមកហើយ តែមិនបានធ្វើតាមផ្លូវតុលាការទេ ។
លោក គង់ សំណាង បន្ដថា ក្រោយពីលែងលះរួច បុរសជាប្ដីបានចោទប្រពន្ធរបស់ខ្លួនថា មានទាក់ទងជាមួយបុរសផ្សេង ទើបទៅលួចកាប់ប្រពន្ធពីក្រោយនឹងពូថៅ បណ្ដាលឱ្យរងរបួស ហើយត្រូវបានអ្នកជិតខាងជួយអន្ដរាគមន៍ និងប្ដឹងមកសមត្ថកិច្ចប៉ុស្ដិ៍ឃាត់ខ្លួនភ្លាមៗតែម្ដង។ បន្ទាប់ពីចាប់ឃាត់ខ្លួន ខាងនគរបាលប៉ុស្ដិ៍ក៏បានរៀបចំសំណុំរឿងបញ្ជូនទៅការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ដ ដើម្បីចាត់ការតាមនីតិវិធី ៕
ចែករំលែកព័តមាននេះ