ខេត្តកណ្តាល ៖ មនុស្សចំនួន៣នាក់ បានបាត់ខ្លួន ខណៈផ្ទះ៣ខ្នង ដែលសង់លើច្រាំងទន្លេមេគង្គ បានបាក់ដីស្រុតចូលទៅក្នុងទឹកទន្លេ កាលពីវេលាម៉ោង១០ និង៣០នាទីយប់ ថ្ងៃទី១៨ កុម្ភៈ នៅចំណុចភូមិព្រះប្រសប់ ឃុំព្រះប្រសប់ ស្រុកខ្សាច់កណ្តាល ដែលមូលហេតុបណ្តាលមកពីការបាក់ច្រាំងទន្លេ ។
ខេត្តកណ្តាល ៖ មនុស្សចំនួន៣នាក់ បានបាត់ខ្លួន ខណៈផ្ទះ៣ខ្នង ដែលសង់លើច្រាំងទន្លេមេគង្គ បានបាក់ដីស្រុតចូលទៅក្នុងទឹកទន្លេ កាលពីវេលាម៉ោង១០ និង៣០នាទីយប់ ថ្ងៃទី១៨ កុម្ភៈ នៅចំណុចភូមិព្រះប្រសប់ ឃុំព្រះប្រសប់ ស្រុកខ្សាច់កណ្តាល ដែលមូលហេតុបណ្តាលមកពីការបាក់ច្រាំងទន្លេ ។
មន្ត្រីនគរបាលស្រុកខ្សាច់កណ្តាល ឱ្យដឹងថា គ្រោះបាក់ច្រាំងទន្លេនេះ បណ្តាលឱ្យលំនៅឋានអ្នកភូមិចំនួន៣ខ្នង ក្នុងនោះមាន១ខ្នង បានស្រុតលិចបាត់ចូលទៅក្នុងទន្លេមេគង្គ និង២ខ្នងទៀត បានស្រុតបាក់ដាច់មួយកំណាត់ក្រោយចូលទៅក្នុងទឹកទន្លេ ។ ក្នុងឧប្បទ្ទវហេតុដ៏សោកសៅនេះ បានប៉ះពាល់ដល់មនុស្សចំនួន៥នាក់ ក្នុងនោះមាន២នាក់សង្គ្រោះទាន់ពេលវេលា ។ ចំណែក៣នាក់ទៀត មិនទាន់រកឃើញនៅឡើយ គឺបាត់ខ្លួនក្នុងទឹកទន្លេជាមួយលំនៅឋានលិចបាត់ ដែលសន្មត់ថាអាចនឹងស្លាប់ ។
មន្ត្រីនគរបាលស្រុក ឱ្យដឹងទៀតថា មនុស្ស៣នាក់ដែលបាត់ខ្លួននៅក្នុងទឹកទន្លេនោះមាន ១-ឈ្មោះ ប៉ុក សំអុល ភេទស្រី អាយុ៣៩ឆ្នាំ ជាម្តាយ ២-ឈ្មោះ ចេក ព្រិល ភេទប្រុស អាយុ២ឆ្នាំ ជាកូន និង៣-ឈ្មោះ ចេក ឈួយ ភេទប្រុស អាយុ១ឆ្នាំ ត្រូវជាចៅ ។
ទាំង៣នាក់ដែលសន្មត់ថាស្លាប់ គឺជាគ្រួសាររស់នៅក្នុងផ្ទះដែលស្រុតបាក់លិចបាត់ចូលក្នុងបាតទន្លេ ហើយផ្ទះ១ខ្នងនេះធ្វើពីឈើខាងលើ និងថ្មខាងក្រោម ដែលមានទំហំ៥ម៉ែត្រ គុណ១០ម៉ែត្រ លិចបាត់ក្នុងទឹក ។ ចំណែក២ខ្នងទៀត ដែលប្រេះបាក់ដាច់មួយកំណាត់នោះ គឺធ្វើពីថ្ម និងមានម៉ូតូសេ១២៥ ស៊េរីឆ្នាំ១៩៩៩ មួយគ្រឿង លិចបាត់ក្នុងទន្លេផងដែរ ព្រមទាំងខូចខាត និងបាត់បង់សម្ភារអស់ជាច្រើន ។ ច្រាំងទន្លេដែលបាក់ស្រុតនោះមានប្រវែងបណ្តោយ៦០ម៉ែត្រ និងទទឹង១០ម៉ែត្រ ។ មន្ត្រីអាជ្ញាធរស្រុកខ្សាច់កណ្តាល ឱ្យដឹងថា ការបាក់ច្រាំងទន្លេមេគង្គនៅត្រង់ចំណុចភូមិព្រះប្រសប់នេះ គឺជាគ្រោះធម្មជាតិ ដែលចំណុចនេះជាមុខទឹករបស់ទន្លេមេគង្គ ដែលហូរមកពីចំណុចឃុំស្វាយរមៀត ឃុំព្រែកតាមាក់ បុកចំមកត្រង់ចំណុចព្រះប្រសប់នេះតែម្តង និងបានបាក់ច្រាំងរៀងរាល់ឆ្នាំ ។
មានការរិះគន់ថា បើដឹងថាចំណុចនោះជាមុខទឹកដែលបុកអាចបង្កគ្រោះថ្នាក់បែបនេះ ហេតុអ្វីអាជ្ញាធរបណ្តោយឱ្យមានការសង់ផ្ទះប្រឈមនឹងគ្រោះថ្នាក់បែបនេះ ?
មន្ត្រីអាជ្ញាធរស្រុក ឱ្យដឹងទៀតថា គ្រោះថ្នាក់ខាងលើនេះ អាជ្ញាធរមូលដ្ឋានភូមិ ឃុំ ស្រុក សហការជាមួយសមត្ថកិច្ច បានចុះទៅជួួយអន្តរាគមន៍ភ្លាមៗផងដែរ និងជួយសង្គ្រោះបានមនុស្ស២នាក់រួចផុតពីគ្រោះថ្នាក់ដល់ជីវិត ។ ដោយឡែក មនុស្ស៣នាក់មានម្តាយ កូន និងចៅ ដែលបាត់ខ្លួនក្នុងទឹកទន្លេនោះ កំពុងរាវរក តែមិនទាន់ឃើញនៅឡើយទេ ។ ហើយក្នុងនាមអាជ្ញាធរមូលដ្ឋាន ជាពិសេសសាខាកាកបាទក្រហមកម្ពុជាស្រុក បាននិងកំពុងរៀបចំអំណោយមនុស្សធម៌ ដើម្បីយកទៅផ្តល់ជូនក្រុមគ្រួសាររងគ្រោះនៅរសៀលថ្ងៃទី១៩ កុម្ភៈ នេះហើយ ។
ការរាវរកអ្នកបាត់ខ្លួនតាំងពីព្រឹករហូតមកដល់ម៉ោង១រសៀល រកពុំទាន់ឃើញនៅឡើយទេ ។ អាជ្ញាធរនិយាយថា មានតែរង់ចាំទាល់តែសពអណ្តែតហើយមើលទៅ ៕
ចែករំលែកព័តមាននេះ