រាជធានីភ្នំពេញ ៖ កីឡាករល្បីឈ្មោះរបស់កម្ពុជា កែវ រំចង់ បានទៅដល់ទឹកដីថៃហើយ បន្ទាប់ពីបានធ្វើដំណើរតាមរថយន្តក្រុងចាកចេញពីប្រទេសកម្ពុជា កាលពីព្រឹកថ្ងៃទី១៨ កុម្ភៈម្សិលម៉្ងៃតាមច្រកប៉ោយប៉ែត ។
រាជធានីភ្នំពេញ ៖ កីឡាករល្បីឈ្មោះរបស់កម្ពុជា កែវ រំចង់ បានទៅដល់ទឹកដីថៃហើយ បន្ទាប់ពីបានធ្វើដំណើរតាមរថយន្តក្រុងចាកចេញពីប្រទេសកម្ពុជា កាលពីព្រឹកថ្ងៃទី១៨ កុម្ភៈម្សិលម៉្ងៃតាមច្រកប៉ោយប៉ែត ។ អ្វីដែលលោកអះអាងក្នុងពេលចេញដំណើរ គឺនឹងទទួលបាននូវចំណុចវិជ្ជមាន២ បើទោះជាការប្រកួតជាមួយកីឡាករថៃដ៏ល្បីឈ្មោះនាថ្ងៃទី២២ កុម្ភៈ ស្អែកស្ថិតក្នុងលទ្ធផលដូចម្តេចក្តី ។
នៅសល់មិនច្រើនម៉ោងទៀតនោះទេ វេទិកាផ្សាយបន្តផ្ទាល់ព្រឹត្តិការណ៍ Thai Fight ដែលកីឡាករល្បីឈ្មោះបំផុតរបស់ថៃប្រកួតជាមួយកីឡាករល្បីឈ្មោះផុតលេខរបស់កម្ពុជា នឹងចាប់ផ្តើម ។ នេះជាការប៉ះគ្នាលើកដំបូងដ៏កម្រ និងចាត់ទុកថាជាប្រវត្តិសាស្ត្រ ខណៈដែលកន្លងមកប្រទេសថៃកម្របញ្ចេញកីឡាករ Yodsanklai ដែលជាដៃគូរបស់ កែវ រំចង់ រូបនេះឱ្យឡើងប្រកួតក្នុងស្រុកខ្លាំងណាស់ គឺលើកលែងតែនោះជាការប្រកួតដណ្តើមប្រាក់លាន ឬជាព្រឹត្តិការណ៍អន្តរជាតិខ្នាតយក្សដែលជនជាតិថៃគិតថា មិនអាចដាក់ក្រៅពីកីឡាកររូបនេះបាន ។ ការរៀបចំឱ្យ Yodsanklai ប៉ះ កែវ រំចង់ ត្រូវគេមើលឃើញថា ជាការបំបាក់ភាពល្បីរបស់ កែវ រំចង់ ដែលទើបតែមានសំណាងបានឡើងរេញរបស់ថៃជាលើកដំបូង បុ៉ន្តែក្រុមអ្នកគាំទ្រនិងកីឡាករកែវ រំចង់ ផ្ទាល់បែរជាមើលឃើញពីផលវិជ្ជមានល្អប្រសើរជាងនេះទៅវិញ ។ ព្រឹត្តិការណ៍នេះចាប់ផ្តើមផ្សាយផ្ទាល់នៅលើកញ្ចក់ទូរទស្សន៍បុ៉ស្តិ៍លេខ៣ ថៃ ចាប់ពីម៉ោង៥និង៤៥នាទីល្ងាចតទៅ នៅថ្ងៃសៅរ៍ ទី២២ កុម្ភៈស្អែកនេះ ដោយមានការរំពឹងថា នឹងមានអ្នកទស្សនារហូតដល់រាប់លាននាក់ឯណោះ ដោយសារតែកីឡាករ Yodsanklai របស់ថៃត្រូវគេស្គាល់ថា ជាកីឡាករលំដាប់ពិភពលោក និងធ្លាប់មានមុខនៅលើរេញអន្តរជាតិឡើងជាប់ឈ្មោះជាប្រវត្តិសាស្ត្រច្រើនលើករួចទៅហើយ ។
តាមប្រវត្តិជាក់ស្តែង កីឡាករថៃរូបនេះបានចាប់ផ្តើមប្រដាល់លើកដំបូងក្នុងឆ្នាំ១៩៩៣ និងបានក្លាយខ្លួនជាកីឡាករប្រដាល់លំដាប់ថ្នាក់អន្តរជាតិរបស់ប្រទេសថៃតែម្តងក្នុងបុ៉ន្មានឆ្នាំចុងក្រោយ ព្រោះតែភាពល្បីខ្លាំង ។ គេមានវ័យ២៩ឆ្នាំ កម្ពស់១,៧១ម៉ែត្រ ធ្លាប់ប្រកួតរហូតដល់ទៅ២៦២ដង ឈ្នះ១៨៧ដង និងធ្លាប់ផ្តួលដៃគូឱ្យសន្លប់ប្រមាណ៧២ដង ។ គេជាអតីតម្ចាស់ខ្សែក្រវាត់ពិភពលោក World Boxing Council ក្នុងប្រភេទទម្ងន់១៥៤ផោន និងនៅជាជើងឯក៣ជំនាន់ក្នុងព្រឹត្តិការណ៍ប្រដាល់ថៃប្រចាំកីឡដ្ឋាន Lumpinee Stadium ក្នុងប្រភេទទម្ងន់១១២ ដល់១៤៧ផោន ។ នៅក្នុងប្រទេសថៃ គេត្រូវជនជាតិថៃផ្តល់រហស្សនាមថា «អ្នកប្រដាល់ Computer» ដោយសារតែតិចនិកក្នុងការវាយលុករបស់គេគឺរហ័ស ហើយខ្លាំងដែលមិនខុសពីកណ្តាប់ដៃញញួរដែក ។ គេជាម្ចាស់ខ្សែក្រវាត់ The Contender Asia ផងដែរ ជាមួយនឹងការទទួលបានប្រាក់រង្វាន់រហូតដល់១៥ម៉ឺនដុល្លារអាមេរិកពីការយកឈ្នះកីឡាករលំដាប់ពិភពលោកដូចគ្នានៅក្នុងព្រឹត្តិការណ៍ប្រកួតដ៏ធំប្រចាំឆ្នាំនៅលើសង្វៀនអន្តរជាតិនាពេលថ្មីៗកន្លងទៅនេះ ។
កែវ រំចង់ បានប្រាប់បណ្តាញសារព័ត៌មានក្នុងពេលចេញដំណើេរតាមរថយន្តថា លោកមិនព្រួយបារម្ភចំពោះលទ្ធផលការប្រកួតនោះទេ ។ ផ្ទុយទៅវិញ លោកកំពុងបង្ហាញមោទនភាពដែលខ្លួនបានចេញទៅប្រកួតជាមួយថៃលើកទី១ ហើយបែរជាបានប៉ះជាមួយកីឡាករលំដាប់ជួរទី១ របស់ថៃ ដូចការចង់បាននាពេលកន្លងមកនោះទៀតផង ។ លោកមិនយល់ថា នោះជាការបំបាក់របស់អ្នករៀបចំការប្រកួតនៅថៃនោះទេ ដោយលោកបែរជាយល់ថា នោះជាវិធានការណ៍លើកមុខមាត់របស់លោករបស់ជនជាតិថៃនៅក្នុងព្រឹត្តិការណ៍នេះទៅវិញ ។ តារាកីឡាប្រដាល់ល្បីឈ្មោះរូបនេះនិយាយថា «ខ្ញុំគិតថា ខ្លួនខ្ញុំមានតម្លៃខ្ពស់ណាស់ ទើបប្រទេសគេបញ្ចេញកីឡាករល្បីឈ្មោះរបស់គេឱ្យវ៉ៃជាមួយខ្ញុំ ដូច្នេះសម្រាប់ខ្ញុំ ទោះជាការប្រកួតនោះទទួលលទ្ធផលបែបណា បុ៉ន្តែផលវិជ្ជមាន២នឹងធ្លាក់នៅក្នុងដៃរបស់ខ្ញុំ !» ។ ផលវិជ្ជមានដែលលោកសំដៅនោះរួមមាន កេរ្តិ៍ឈ្មោះដែលទទួលបានពីការផ្គូផ្គងឱ្យប៉ះជាមួយ Yodsanklai និងបទពិសោធន៍ដែលបានពីការប៉ះជាមួយជើងខ្លាំងលំដាប់ពិភពលោករបស់ថៃរូបនោះតែម្តង ។
ដូចគ្នានឹងការបញ្ជាក់ប្រាប់ គេឃើញនៅលើកញ្ចក់ទូរទស្សន៍បុ៉ស្តិ៍លេខ៣ ថៃមានការផ្សព្វផ្សាយពីព្រឹត្តិការណ៍នេះយ៉ាងគគ្រឹកគគ្រេង ខណៈដែលនៅលើបណ្តាញផ្សព្វផ្សាយរបស់ថៃ ក៏មានការសរសេរវិភាគជាច្រើនដើម្បីស្រង់យកការព្យាករណ៍ថា តើការប្រកួតដ៏ធំរបស់ថៃជាមួយ កែវ រំចង់ រូបនេះ កម្ពុជាឬថៃជាអ្នកទទួលបានមោទនភាព ។ ក្រុមអ្នកគាំទ្រ កែវ រំចង់ និយាយថា កម្រិតនៃការយកឈ្នះលើថៃ គឺជារឿងតិចណាស់ដែលសង្ឃឹម បុ៉ន្តែអ្វីដែល កែវ រំចង់ ទទួលបានតាំងពីមុនប្រកួត គឺការចាប់អារម្មណ៍ដ៏ទូលំទូលាយទាំងពលរដ្ឋក្នុងស្រុក និងអន្តរជាតិ ។ យោងតាមការវិភាគនេះមានន័យថា កែវ រំចង់ បានរួចផុតពីការរិះគន់របស់មហាជនខ្មែរបាត់ទៅហើយ បើទោះជាមិនទទួលបានជ័យជម្នះពីការប្រកួតនៅថ្ងៃស្អែកត្រឡប់មកវិញ។ ត្រង់នេះហើយដែលគេប្រាប់ថា នោះជាអ្វីដែលខ្លួនទទួលបានតាំងពីជំហានដំបូង បន្ទាប់ពីដឹងថាដៃគូដែលថៃឱ្យប៉ះ គឺកីឡាករ Yodsanklai ដែលមានឈ្មោះល្បី និងមានតម្លៃខ្លួនលំដាប់លានបាតដែលមិនមែនជាកីឡាករធម្មតា។ កែវ រំចង់ ប្រាប់ថា ក្នុងជីវិតជាកីឡាកររបស់គេចូលចិត្តការឡើងប្រកួតជាមួយកីឡាករល្បី ។ អុីចឹងហើយ ទើបគេនឹងប្រឹងប្រែងឱ្យអស់ពីលទ្ធភាពដើម្បីបានផលវិជ្ជមានមួយផ្សេងទៀតពីកេរ្តិ៍ឈ្មោះ ការចាប់អារម្មណ៍ និងបទពិសោធន៍ប៉ះអ្នកខ្លាំងដែលមាននៅក្នុងដៃស្រាប់។ លោកមិនសង្ឃឹមឈ្នះទេ បុ៉ន្តែបើអាចបំបាក់មុខឱ្យ Yodsanklai ឈ្នះទាំងវេទនា ឬឈ្នះក្នុងរូបភាពប្រផិតប្រផើយនោះមានន័យថា តម្លៃខ្លួនរបស់លោក និងភាពល្បីល្បាញរបស់លោក នឹងកើនឡើងជាក់ជាមិនខាន ។ ក្រុមអ្នកវិភាគនិយាយថា បើ កែវ រំចង់ ពិតជាអាចធ្វើអ្វី Yodsanklai បានមែនមានន័យថា គេនឹងបើកប្រវត្តិសាស្ត្រធ្វើឱ្យពិភពលោកស្គាល់គេជាអន្តរជាតិតែម្តង ដោយមិនចាំបាច់ប្រើពេលឡើងប្រកួតជាមួយកីឡាករលំដាប់ពិភពលោកច្រើននាក់នាំឱ្យខាតពេលច្រើនទេ ។
ទោះបីយ៉ាងណា តាមការអះអាងរបស់កីឡាករ Yodsanklai បានបញ្ជាក់នៅក្នុងបណ្តាញសារព័ត៌មានថៃថា គេនឹងមិនធ្វើឱ្យជនជាតិរបស់គេខកបំណងនោះទេ ជាមួយនឹងការប៉ះគ្នាជាលើកដំបូងជាមួយ កែវ រំចង់ ដែលល្បីថាខ្លាំងផុតលេខរបស់ប្រទេសកម្ពុជានេះ ។ កែវ រំចង់ មិនមែនជាកីឡាករដំបូងរបស់ព្រឹត្តិការណ៍ Thai Fight នោះទេ បុ៉ន្តែមហាជនទាំងកម្ពុជានិងថៃ ហាក់ចាប់អារម្មណ៍ចំពោះគេខ្លាំងខុសពីវត្តមានរបស់កីឡាករកម្ពុជាមុនៗ ដែលនេះ គឺបណ្តាលមកពីថៃបានដាក់កីឡាករលំដាប់កំពូល Yodsanklai ឱ្យប៉ះជាមួយគេនោះតែម្តង ៕
ចែករំលែកព័តមាននេះ