រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរលីអូ ក្នុងប្រភេទទម្ងន់៦០គីឡូក្រាមនៅលើសង្វៀន CTN ថ្ងៃសៅរ៍ ទី២២ កុម្ភៈ ស្អែកឈានចូលដល់សប្តាហ៍ទី៣ហើយ ។
រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរលីអូ ក្នុងប្រភេទទម្ងន់៦០គីឡូក្រាមនៅលើសង្វៀន CTN ថ្ងៃសៅរ៍ ទី២២ កុម្ភៈ ស្អែកឈានចូលដល់សប្តាហ៍ទី៣ហើយ ។ កីឡាករដែលជាបេក្ខភាពឡើងប្រកួតនៅពេលនោះមាន ខុន ស៊ីចាន់ មកពីក្លិបកងពលធំអន្តរាគមន៍លេខ៣ ព្រះវិហារ ត្រូវជួបជាមួយ នឿន សាវឌី មកពីក្លិបអេភូថងកីឡា ចំណែក ផាន់ គ្រាន់ មកពីក្លិបកងរាជអាវុធហត្ថលើផ្ទៃប្រទេស ជួបជាមួយ ឡៅ ចន្ទ្រា មកពីក្លិបទ័ពពិសេសឆត្រយោង
៩១១ ។
កាលពីសប្តាហ៍ទី១ ខុន ស៊ីចាន់ ប្រកួតចាញ់ពិន្ទុ ឡៅ ចន្ទ្រា ដាច់រួចម្តងមកហើយ តែពេលមកប៉ះ នឿន សាវឌី លើកនេះបែបមិនអីទេ ព្រោះបើប្រៀបធៀបសមត្ថភាពប្រកួតរវាងពួកគេទាំងពីរអាចស៊ីសងគ្នាបាន ។ ខុន ស៊ីចាន់ បើទោះជាគេមិនសូវពូកែស្នៀតកែង និងជង្គង់មែន តែស្នៀតជើងទាត់ និងកណ្តាប់ម៉ាត់ពេលវាយ និងទាត់ចេញម្តងៗចំគោលដៅល្អណាស់ ថែមទាំងមានកម្លាំងខ្លាំងទៀតផង ឯចិត្តក៏សឿងទៀត។ ជាពិសេស គេជាកីឡាករដែលមិនចេះមើលស្រាលលើគូប្រកួតឡើយ ។ ទោះបីយ៉ាងណា គេមិនហ៊ានអះអាងទុកមុនថា ឈ្នះមួយរយភាគរយនោះដែរ គ្រាន់តែគេមានជំនឿចិត្តច្រើន ព្រោះ នឿន សាវឌី អត់មានស្នៀតអីដែលពូកែធ្វើឱ្យគេពិបាកទប់ទល់ឡើយ ។ នឿន សាវឌី អន់ស្នៀតកែងនិងជង្គង់ ឯចិត្តក៏មិនសូវសឿងទៀត ។ បើនិយាយពីស្នៀតជើង និងស្នៀតកណ្តាប់ដៃអាចប្រើការបាន ទាស់តែមិនសូវរហ័សរហួន និងពេលវាយចេញម្តងៗមានកម្លាំងខ្សោយបន្តិច ទើបជួប ខុន ស៊ីចាន់ លើកនេះគេមិនសូវមានជំនឿចិត្តឈ្នះបុ៉ន្មានឡើយ ។
នឿន សាវឌី កាលពីប្រកួតនៅជុំទី១ គេបានចាញ់សន្លប់ក្រោមស្នៀតជើងរបស់ ផាន់ គ្រាន់ នៅត្រឹមទឹកទី៤ ដូច្នេះការស្វែងរក៣ពិន្ទុពីការប្រកួតលើកនេះបែបមិនសូវមានសង្ឃឹមទេ ។ ផាន់ គ្រាន់ និង ឡៅ ចន្ទ្រា សុទ្ធតែជាអ្នករកបាន៣ពិន្ទុមុនដូចគ្នា បុ៉ន្តែពួកគេនៅតែមានមហិច្ឆតាចង់បាន៣ពិន្ទុបន្ថែមសម្រាប់ការប្រកួតលើកនេះ ។ ផាន់ គ្រាន់ ចាញ់ប្រៀបកម្ពស់ ឡៅ ចន្ទ្រា បន្តិច បុ៉ន្តែគេអាចមានស្នៀតប្រយុទ្ធល្អខ្លាំងណាស់ ។ ស្នៀតជើងរបស់គេអាចធ្វើការទាត់ចេញបានយ៉ាងរហ័ស និងមានទម្ងន់ធ្ងន់ទៀតផង រីឯស្នៀតកណ្តាប់ដៃ និងស្នៀតកែងក៏បង្កគ្រោះថ្នាក់ខ្លាំងណាស់ដែរ បើគូប្រកួតហ៊ានតែប្រហែសបន្តិចច្បាស់ជាវីវរមិនខាន ។ យ៉ាងណាក៏ដោយការមកប៉ះ ឡៅ ចន្ទ្រា លើកនេះបើចង់បាន៣ពិន្ទុទៀត គឺជារឿងមិនងាយស្រួលនោះឡើយព្រោះ ឡៅ ចន្ទ្រា មិនមែនជាជើងអន់ទេ ។
ក្រៅពីមានប្រៀបខាងកម្ពស់ គេចេះប្រើគ្រប់ស្នៀតទាំងអស់កែង-ជង្គង់ កណ្តាប់ដៃម៉ាត់ និងការទាត់ចេញពោរពេញទៅដោយសក្តានុពលបំផុត តែឡៅ ចន្ទ្រា មិនហ៊ានអួតក្អេងក្អាងទុកមុនថា គេពិតជាអាចយកឈ្នះ ផាន់ គ្រាន់ បានមួយរយភាគរយនោះទេ គ្រាន់តែក្តីសង្ឃឹមរបស់គេច្រើនជាងគូប្រកួតបុ៉ណ្ណោះ ៕
ចែករំលែកព័តមាននេះ