ខេត្តប៉ៃលិន ៖ មានករណីគ្រោះថ្នាក់ចរាចរណ៍មួយរវាងរថយន្តកាមរីស៊េរីចាស់ បើកវ៉ាជែងរថយន្តកាមរីស៊េរីថ្មីបាឡែន មិនផុត ព្រោះវ៉ានៅត្រង់ស្ថានភាពផ្លូវកោង និងគេចរថយន្តផ្សេង ដែលកំពុងតែបើកបរមកពីមុខ បណ្តាលឲ្យប៉ះគ្នាជាមួយបាឡែន រងការខូចខាតស្រាលទាំងសងខាង តែម្ចាស់ជជែកគ្នារកខុសត្រូវរៀងខ្លួន។ ហេតុការណ៍នេះ បានកើតឡើងកាលពីវេលាម៉ោង ៤ និង ៣០នាទី រសៀលថ្ងៃទី១៨ កុម្ភៈ ២០១៤ នៅលើបណ្តោយផ្លូវជាតិលេខ៥៧A ស្ថិតក្នុងភូមិសួស្តី សង្កាត់អូរតាវ៉ៅ ក្រុងប៉ៃលិន។
ជនបង្កឈ្មោះ នូវ ភារម្យ ភេទប្រុស អាយុ ២៥ឆ្នាំ ជាអ្នកបើកបររថយន្តឈ្នួល រស់នៅភូមិកាប់គោថ្មី ឃុំអូរចា ស្រុកបាត់ដំបង ខេត្តបាត់ដំបង បើកបររថយន្តម៉ាកកាមរីគូទស្វិតស៊េរីចាស់ ពណ៌ឈាមជ្រូក ពាក់ស្លាកលេខ ប.0043 ភព2 រងការខូចខាតក្រពិតខាងក្រោយផ្នែកខាងស្តាំតិចតួច។ ចំណែកអ្នកបើកបររថយន្តរងគ្រោះឈ្មោះ ណុប សុភាព ភេទប្រុស អាយុ ៤៤ឆ្នាំ អ្នកបើកបររថយន្តឈ្នួល រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន បើកបររថយន្តម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ បាត់ដំបង 2A-7509 រងការខូចខាតរលាត់ថ្នាំផ្នែកឆ្វេងខាងមុខស្រាល។
ប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេឃើញមានរថយន្តកាមរីបាឡែន ពណ៌ទឹកប្រាក់ ១គ្រឿង បើកបរក្នុងទិសដៅពីកើតទៅលិច លុះដល់ចំណុចផ្លូវកោង ស្រាប់តែមានរថយន្តកាមរីស៊េរីចាស់គូទស្វិត ១គ្រឿងទៀត ដឹកអ្នកដំណើរក្នុងទិសដៅស្របគ្នា ក៏បានបើកយ៉ាងលឿនវ៉ារថយន្ត ១គ្រឿង ខាងមុខ។
តែដោយសាររថយន្តបាឡែនបើកបរក្នុងល្បឿនលឿនដែរ ហើយស្របពេលដែលមានរថយន្តតូចធំបើកបរមកពីមុខទៀត ស្រាប់តែម្ចាស់រថយន្តកាមរីស៊េរីចាស់ បានបួងចង្កូតទៅខាងស្តាំដៃ ដើម្បីគេចរថយន្តមកពីមុខបណ្តាលឲ្យកៀរគ្នានឹងរថយន្តបាឡែន រងការខូចខាតស្រាលទាំងសងខាង តែម្ចាស់រថយន្តទាំង ២គ្រឿង និងអ្នករួមដំណើរព្រលឹងចុងសក់។
ក្រោយពេលកើតហេតុ ម្ចាស់រថយន្តកាមរីបាឡែន ទាមទារឲ្យម្ចាស់រថយន្តបង្កហេតុបង់សងថ្លៃការខូចខាតចំនួន ១០០ដុល្លារ តែដោយម្ចាស់រថយន្តកាមរីមិនព្រម ក៏ជជែកគ្នាអស់រយៈពេលយ៉ាងយូរ និងហៅសមត្ថកិច្ចចរាចរណ៍ជើងគោកក្រុងប៉ៃលិន មកជួយដោះស្រាយ ដើម្បីបញ្ចប់រឿង៕
ចែករំលែកព័តមាននេះ