រាជធានីភ្នំពេញ ៖ យោងតាមរបាយការណ៍របស់សាលារាជធានីភ្នំពេញ បានឱ្យដឹងថា សំណង់បេតិកភណ្ឌប្រវត្ដិសាស្រ្ដនៅរាជធានីភ្នំពេញ មានចំនួន៥២៣ ក្នុងនោះសំណង់បេតិកភណ្ឌដែលចាត់ជាចំណាត់ថ្នាក់លេខ១ មានចំនួន៣៤ទីតាំង (បើប្រៀបធៀបស្មើឆ្នាំមុន) ចំណាត់ថ្នាក់លេខ២ ចំនួន២៤ទីតាំង(ស្មើឆ្នាំមុន) ចំណាត់ថ្នាក់លេខ៣ ចំនួន១៧ទីតាំង(ស្មើឆ្នាំមុន)និងចំណាត់ថ្នាក់លេខ៤ គឺសំណង់លំនៅឋានមានលក្ខណៈជាប្រវត្ដិសាស្រ្ដមានចំនួន៤៤៨ទីតាំង ។
ទាក់ទិនទៅនឹងរបាយការណ៍ខាងលើនេះ មន្ដ្រីមន្ទីរវប្បធម៌ និងវិចិត្រសិល្បៈ រាជធានីភ្នំពេញ បានឱ្យកោះសន្ដិភាពដឹងតាមទូរស័ព្ទនៅព្រឹកថ្ងៃទី១៧ កុម្ភៈ ថា អាជ្ញាធររាជធានីភ្នំពេញ ដោយមានកិច្ចសហការពីក្រុមអ្នកជំនាញឯកទេសបារាំង បានធ្វើការសិក្សាស្រាវជ្រាវ និងវាយតម្លៃទៅលើសំណង់បេតិកភណ្ឌ និងសំណង់ប្រវត្ដិសាស្រ្ដនៅរាជធានីភ្នំពេញ ។ ការសិក្សាស្រាវជ្រាវ និងវាយតម្លៃនោះ យើងបានអនុវត្ដទៅតាមច្បាប់ស្ដីពីកិច្ចការពារសម្បត្ដិបេតិកភណ្ឌវប្បធម៌ ឆ្នាំ១៩៩៦ ។ មន្ដ្រីមន្ទីរវប្បធម៌និងវិចិត្រសិល្បៈដដែលបានឱ្យដឹងទៀតថា អ្វីដែលច្បាប់បានកំណត់មានពីរ ទី១-គឺស្នាដៃរបស់មនុស្ស ឬធម្មជាតិដែលមានតម្លៃជាប្រវត្ដិសាស្រ្ដ ជាសិល្បៈ សាសនា វិទ្យាសាស្រ្ដ ហើយបានបង្ហាញឱ្យឃើញអំពីវប្បធម៌របស់សង្គម ។ ទី២-គឺអាយុកាលចាប់ពី៥០ឆ្នាំទៅ១០០ឆ្នាំឡើង តែក្នុងនោះត្រូវនិយាយអំពីសម័យកាលដែលចែកជា៤គឺ សម័យបុរេប្រវត្ដិសាស្រ្ដ ,សម័យមុនអង្គរ ពីសតវត្សទី១ដល់ចុងសតវត្សទី៨ ,សម័យអង្គរ ចាប់ពីសតវត្សទី៩ដល់សតវត្សទី១៥ និងសម័យក្រោយអង្គរ ពីសតវត្សទី១៥ រហូតដល់បច្ចុប្បន្ន ។
មន្ដ្រីរូបនោះបញ្ជាក់ថា ការរាប់បញ្ចូលជាសំណង់បេតិកភណ្ឌប្រវត្ដិសាស្រ្ដនោះ អាចមិនគិតពីអាយុកាលក៏មានដូចជា សារមន្ទីរប្រល័យពូជសាសន៍ទួលស្លែង មានអាយុកាលមិនដល់៥០ឆ្នាំទេ តែវាជាតឹកតាងប្រវត្ដិសាស្រ្ដ ។ ចំណែកសំណង់ផ្ទះចាស់ពីសម័យអាណានិគមបារាំង មានអាយុកាលប្រហែលពី៧០ទៅ៨០ឆ្នាំ តែមិនអាចរក្សាបាន ព្រោះវាជាសំណង់ឯកជន ។ ទាក់ទិនទៅលើបញ្ហាសំណង់បេតិកភណ្ឌប្រវត្ដិសាស្រ្ដវិញ មន្ដ្រីនៃមន្ទីររៀបចំដែនដីនគរូបនីយកម្ម សំណង់និងសុរិយោដីរាជធានីភ្នំពេញ បានឱ្យដឹងដែរថា ការវាយតម្លៃទៅលើសំណង់បេតិកភណ្ឌ និងសំណង់ប្រវត្ដិសាស្រ្ដនៅរាជធានីភ្នំពេញ ត្រូវផ្អែកទៅលើគោលការណ៍៤ចំណុច ១-ត្រូវគិតពីប្រវត្ដិសាស្រ្ដ ឬអាយុកាលនៃអគារ ។
២-ស្ថាបត្យកម្មនៃអគារល្អ ឬក៏អត់ ។ ៣-លក្ខណៈនគរូបនីយកម្ម តើការសាងសង់លើទីតាំងល្អដែរឬទេ និង៤-ត្រូវគិតពីវប្បធម៌ប្រទេសណាមួយមានលក្ខណៈល្អឬក៏អត់ ដែលទាក់ទងទៅនឹងវប្បធម៌ និងប្រជាជននោះ ៕
ចែករំលែកព័តមាននេះ