រាជធានីភ្នំពេញ ៖ ការចុះផ្សាយព្រោងព្រាតនៅលើគេហទំព័រនានា ហាក់ធ្វើឱ្យមន្ត្រីល្បុក្កតោទាំងមូលមិនសប្បាយចិត្ត ក៏បានចេញមុខបញ្ជាក់ថា ការមិនជាប់លេខក្នុងវេទិកាបង្ហាញជាអន្តរជាតិនៅក្នុងប្រទេសបារាំង កាលពីយប់ថ្ងៃទី១៤ កុម្ភៈកន្លងទៅ គឺជារឿងមិនទទួលបានទាំងអស់គ្នាសម្រាប់គ្រប់ប្រទេសបុ៉ណ្ណោះ ។
រាជធានីភ្នំពេញ ៖ ការចុះផ្សាយព្រោងព្រាតនៅលើគេហទំព័រនានា ហាក់ធ្វើឱ្យមន្ត្រីល្បុក្កតោទាំងមូលមិនសប្បាយចិត្ត ក៏បានចេញមុខបញ្ជាក់ថា ការមិនជាប់លេខក្នុងវេទិកាបង្ហាញជាអន្តរជាតិនៅក្នុងប្រទេសបារាំង កាលពីយប់ថ្ងៃទី១៤ កុម្ភៈកន្លងទៅ គឺជារឿងមិនទទួលបានទាំងអស់គ្នាសម្រាប់គ្រប់ប្រទេសបុ៉ណ្ណោះ ។
បន្ថែមពីលើនោះ មន្ត្រីដដែលបានទាំងប្រាប់ដោយមោទនភាពថា ល្បុក្កតោកម្ពុជាបានទទួលការចាប់អារម្មណ៍ណាស់ បើធៀបនឹងការបង្ហាញមុខនៅក្នុងប្រទេសបារាំងមុនៗ ។ យោងតាមលទ្ធផលចុងក្រោយដែលកោះសន្តិភាពទទួលបានបង្ហាញថា ការសម្តែងក្បាច់គុនល្បុក្កតោប្រចាំឆ្នាំដែលមានការចូលរួមពីសំណាក់ប្រទេសចំនួន៣៤ នៅក្នុងប្រទេសបារាំងឆ្នាំនេះ កម្ពុជាមិនទទួលបានលទ្ធផលនោះទេ បើទោះជាមុនការបង្ហាញជាអន្តរជាតិ មន្ត្រីប្រចាំសហព័ន្ធនេះហាក់មានជំនឿចិត្តថា នឹងបានមុខមាត់លេចធ្លោត្រឡប់មកវិញក្តី ។ អ្នកស្រីអុ៊ក ពង្សបុប្ផា ភរិយារបស់លោកគ្រូតាក្រមាមាស សាន គឹមស៊ាន និងជាអ្នកចាត់តាំងកីឡាការិនី២រូប គឺកញ្ញាអេង ស៊ូម៉ាឡា និងកញ្ញាខៀវ ចិន្តារ័ត្ន ឱ្យចេញប្រកួតនៅក្នុងប្រទេសបារាំង បានប្រាប់ឱ្យដឹងថា ការបង្ហាញក្បាច់គុនខ្មែរនៅក្នុងព្រឹត្តិការណ៍ “Festival Des Arts Martiaux” ដែលបានធ្វើឡើងក្នុងខេត្ត Bercy របស់បារាំង កាលពីថ្ងៃទី១៤ កុម្ភៈ នោះមិនមែនជាការប្រកួតនោះទេ គឺគ្រាន់តែជាការប្រមូលផ្តុំប្រទេសដែលមានក្បាច់គុនចំណាស់ៗពីបុរាណឱ្យឡើងមកបង្ហាញគ្នាជាសាធារណៈ ដែលមិនខុសពីការផ្លាស់ប្តូរបទពិសោធន៍រវាងប្រទេស និងប្រទេសនៅលើពិភពលោកបុ៉ណ្ណោះ ដោយមិនមានការផ្តល់ឱ្យជាចំណាត់ថ្នាក់អ្វីឡើយ ។
យោងតាមវីដេអូរយៈពេលជិត៤នាទី គេឃើញកីឡាករ-កីឡាការិនីល្បុក្កតោកម្ពុជាមានគ្នាចំនួន៥នាក់ឡើងបង្ហាញក្បាច់គុនរបស់ជាតិ ដោយ២នាក់ជានារី គឺកញ្ញាខៀវ ចិន្តារ័ត្ន និងអេង ស៊ូម៉ាឡា ដែលបានឡើងទៅពីស្រុកខ្មែរតាំងពីពាក់កណ្តាលខែមករា និង៣នាក់ទៀតគឺជាសិស្សគុនរស់នៅប្រទេសបារាំង ។ ក្នុងចំណោមអ្នកជំនួយទាំង៣នោះ ២នាក់ជាកូនកាត់ខ្មែរ និងម្នាក់ទៀតជាជនជាតិបារាំងសុទ្ធ ។ ក្នុងនោះក៏មានម្នាក់ទៀតជាអ្នកលើកទង់ជាតិគ្រវីចុះឡើងៗ ជួយឱ្យការបង្ហាញរបស់អ្នកទាំង៥ មានភាពអ៊ូអរ មិនសោះកក្រោះនៅលើវេទិកាផងដែរ ។ ក្នុងការបង្ហាញនោះ កីឡាករ និងកីឡាការិនីកម្ពុជា បានសម្តែងនូវគុនដំបង និងគុនដៃច្រើនក្បាច់ បុ៉ន្តែចំពោះការរស់រវើក និងភាពទាក់ទាញមិនដូចកាលកម្ពុជាចេញទៅបង្ហាញនៅក្នុងព្រឹត្តិការណ៍មុនៗ ដែលទទួលបានចំណាត់ថ្នាក់ត្រឡប់មកវិញនោះទេ ។ នោះអាចបណ្តាលមកពីការបង្ហាញក្បាច់គុនលើកនេះមិនមានការដឹកនាំពីគ្រូតាក្រមាមាស សាន គឹមស៊ាន ដែលជាគ្រូក្បាច់គុនទៅជួយរៀបក្រឡាឱ្យ ។
អ្នកស្រីអ៊ុក ពង្សបុប្ផា បញ្ជាក់ថា ការបង្ហាញរបស់កម្ពុជាពិតជាមិនសូវមានភាពគគ្រឹកគគ្រេងនៅលើវេទិកា ប៉ុន្តែចំពោះការចាប់អារម្មណ៍គឺមានច្រើន ។ ជាក់ស្តែង គ្រាន់តែការបង្ហាញរបស់ប្រទេសទាំង៣៤ចប់សព្វគ្រប់ភ្លាម មានគេទាក់ទងឱ្យកម្ពុជាបន្តបង្ហាញក្បាច់គុនល្បុក្កតោបែបនេះទៀតភ្លាម បើទោះជាក្នុងរយៈពេល១ខែមុនព្រឹត្តិការណ៍បង្ហាញ សិស្សគុនរបស់អ្នកស្រី ដើរស្ទើរតែទូទាំងប្រទេសបារាំងដើម្បីបង្ហាញក្បាច់គុននេះរួចទៅហើយក្តី ។ អ្នកស្រីប្រាប់ថា ការបង្ហាញនោះមិនមានការផ្តល់ចំណាត់ថ្នាក់ទេ គេគ្រាន់តែផ្តល់ការលើកទឹកចិត្ត និងកោតសរសើរចំពោះក្រុមណាដែលបានបង្ហាញហើយមានភាពកន្ត្រាក់អារម្មណ៍ចំពោះអ្នកទស្សនាបុ៉ណ្ណោះ។ ក្នុងនោះការបង្ហាញរបស់កម្ពុជាគឺស្ថិតនៅក្នុងចំណុចទាក់ទាញដែលអ្នកស្រីបញ្ជាក់ថា គឺទទួលបានមោទនភាពខ្លាំងណាស់ ។
យោងតាមវីដេអូដែលបានបង្ហោះឡើងនៅក្នុង Profile Facebook របស់កម្មវិធី Festival Des Arts Martiaux បានបង្ហាញថា ក្បាច់គុនបណ្តាប្រទេសទាំងអស់សុទ្ធតែបានបង្ហាញនូវភាពទាក់ទាញរបស់ខ្លួនដោយឡែកពីគ្នាទាំងអស់។ ប្រទេសខ្លះត្រូវគេឃើញបង្ហាញក្បាច់គុនតាមលំនាំរូបភាពជាសៀករហស្សកម្មដែលមានទិដ្ឋភាពបែបរន្ធត់ និងបែបសាហាវដូចជាយកដាវចាក់គ្នាដូចមែនទែន និងប្រើកម្លាំងដៃវាយបំបែកថ្មច្រើនជាន់ជាដើម ។ នៅលើគេហទំព័ររបស់បារាំងដដែល គេឃើញបង្ហោះក្បាច់គុនដែលមានភាពរស់រវើក និងមានអ្នកបោះឆ្នោតឱ្យច្រើនជាងតាមលំដាប់លំដោយ ដោយល្បុក្កតោខ្មែរស្ថិតនៅលំដាប់កៀកនឹងលេខរៀងទី២០ ។ អុីចឹងទើបគេយល់ថា ការអះអាងថា កម្មវិធីនោះមិនមានផ្តល់នូវចំណាត់ថ្នាក់ ហាក់ខុសគ្នាទាំងស្រុងនឹងកម្មវិធីដែលព្រឹត្តិការណ៍នេះធ្លាប់ធ្វើមុនៗ។
ជាក់ស្តែង ក្នុងការបង្ហាញក្បាច់គុននេះដូចគ្នា នៅទីក្រុងហូជីមិញកាលពីឆ្នាំ២០១២ ល្បុក្កតោកម្ពុជាជាប់ចំណាត់ថ្នាក់លេខ១ ក្នុងចំណោម២៣ប្រទេស, ឆ្នាំ២០០៥ ជាប់ចំណាត់ថ្នាក់លេខ៣ នៅហ្វ៊ីលីពីន, ឆ្នាំ២០១២ ជាប់ចំណាត់ថ្នាក់លេខ២ នៅប្រទេសកូរ៉េខាងត្បូង និងចំណាត់ថ្នាក់លេខ៣ម្តងទៀតក្នុងព្រឹត្តិការណ៍ MMA នៅប្រទេសម៉ាឡេស៊ី លើកលែងតែក្នុងឆ្នាំ២០១៣ និងឆ្នាំ២០១៤ នេះទេ ដែលកម្ពុជាទៅចូលរួមប្រកួតប្រជែងដែរ តែមិនទទួលបានផ្លែផ្កា ៕
ចែករំលែកព័តមាននេះ