ប៉ូលិសថៃម្នាក់បានត្រូវស្លាប់ដោយត្រូវគ្រាប់កាំភ្លើងត្រង់ក្បាល រួចប៉ូលិស១៤នាក់ទៀតត្រូវរបួសកាលពីថ្ងៃទី១៨ កុម្ភៈ ក្នុងប្រតិបត្តិការដ៏ធំមួយសំដៅដណ្តើមត្រួតត្រាវិញបណ្តាទីតាំងរបស់ពួកបាតុករប្រឆាំងរដ្ឋាភិបាលនៅក្រុងបាងកក ។ការស្លាប់ប៉ូលិសរូបនេះត្រូវបានប្រកាសដោយមេប៉ូលិសជាតិលោកអាប់ឌុល សាអេងស៊ីញកាអេវ ។ លោកបញ្ជាក់ថា ប៉ូលិសរូបនោះស្លាប់តាមផ្លូវពេលបញ្ជូនទៅមន្ទីរពេទ្យ ។
ការប៉ះទង្គិចគ្នាបានផ្ទុះនៅជិតវិមានរដ្ឋាភិបាល ជាទីតាំងមួយក្នុងចំណោមទីតាំងដែលប៉ូលិសបុ៉នប៉ងដណ្តើមកាន់កាប់ ។ ប៉ូលិសបានប្រើឧស្ម័នបង្ហូរទឹកភ្នែកតបតនឹងពួកបាតុករ ។ប្រមុខក្រុមប្រឹក្សាសន្តិសុខជាតិថៃ លោកប៉ារ៉ាឌន ប៉ាតាណាថាប៊ូត្រ បានចោទប្រកាន់ពួកបាតុករថា បាញ់គ្រាប់ឧស្ម័នបង្ហូរទឹកភ្នែកដោយអះអាងថា ប៉ូលិសមានតែដំបងនិងខែល ហើយពុំប្រើគ្រាប់កៅស៊ូឡើយ ។ បណ្តាអ្នកកាសែតបានស្តាប់ឮស្នូរបាញ់ ហើយឃើញពួកជនប្រដាប់អាវុធក្នុងជួរប៉ូលិស និងពួកបាតុករ ។
ទិសដៅរបស់អាជ្ញាធរគឺបើកច្រកចូលទៅកាន់អគាររដ្ឋសំខាន់ៗស្ថិតនៅភាគកណ្តាល និងភាគខាងជើងក្រុងបាងកក ។ ចំណុចប្រមូលផ្តុំរបស់ពួកបាតុករឯទៀតៗក្នុងបណ្តាសង្កាត់ពាណិជ្ជកម្មពុំត្រូវបានប៉ូលិសលើកទៅរុះរើកម្ទេច ឬដណ្តើមកាន់កាប់ឡើយ ។
យោងតាមប្រភពសន្តិសុខថា ប៉ូលិសប្រមាណជា១៥.០០០នាក់ត្រូវបានកេណ្ឌប្រមូលសម្រាប់ធ្វើប្រតិបត្តិការនេះដែលមានឈ្មោះថា «បេសកកម្មសន្តិភាពសម្រាប់ក្រុងបាងកក» ។ ប៉ូលិសប្រកាសពីការចាប់ខ្លួនពួកប្រឆាំងប្រមាណជា១០០នាក់នាព្រឹកព្រលឹមនៅជិតក្រសួងថាមពល។
លោកបារ៉ាឌន ប៉ាតាណា ថាប៊ូត្រ ថ្លែងប្រាប់រ៉យទ័រថា យើងដណ្តើមកាន់កាប់ទីតាំងពួកបាតុករមួយកន្លែង ក្នុងចំណោមទីតាំង៥ ដែលយើងគ្រោងធ្វើប្រតិបត្តិការនោះគឺទីតាំងនៅក្រសួងថាមពល ។ក្រៅពីចាប់ខ្លួនពួកបាតុករប្រមាណជា១០០នាក់ ប៉ូលិសថៃនាថ្ងៃទី១៨ កុម្ភៈនោះ ក៏បានចាប់ខ្លួនមេខ្លោងបាតុករម្នាក់លោករ៉ាវី ម៉ាស្មាដូល ក្នុងប្រតិបត្តិការមួយសំដៅទីតាំងពួកបាតុករនៅក្រុងបាងកក ។ កាសែតបាងកកបុ៉ស្តិ៍រាយការណ៍ថា ប៉ូលិសអាចដណ្តើមកាន់កាប់ទីតាំងតាមដងវិថីវីបហាវ៉ាឌី រ៉ង់ស៊ីត ។ ពួកបាតុករបានប៉ះទង្គិចគ្នាជាមួយប៉ូលិសនៅឯវិមានរដ្ឋាភិបាល ។
នៅវិមានរដ្ឋាភិបាល មេខ្លោងបាតុកម្មលោកស៊ូថេប ធឿកស៊ូបាន បុ៉នប៉ងបញ្ចុះបញ្ចូលប៉ូលិសកុំឱ្យធ្វើអន្តរាគមន៍ ។ លោកនិយាយថា យើងកុំប្រយុទ្ធគ្នាដើម្បីយើងអាចដណ្តើមអំណាច។ ការកែទម្រង់ដែលយើងនឹងជំរុញនឹងផ្តល់ផលប្រយោជន៍ដល់លោកអ្នក និងកូនៗ ព្រមទាំងចៅៗរបស់លោកអ្នក ។ សត្រូវតែមួយគត់របស់ប្រជាជន គឺរបបថាក់ស៊ីន ។ជាលើកទីមួយហើយតាំងពីចាប់ផ្តើមចលនាតវ៉ាមក ដែលអាជ្ញាធរចាប់ខ្លួនបាតុករដែលកាន់កាប់ ឬឡោមព័ទ្ធអគាររដ្ឋបាល និងក្រសួងនានាជាច្រើននាក់បែបនេះ ។ មុននេះរដ្ឋាភិបាលប្រកាន់ជំហរចៀសវាងការប៉ះទង្គិចគ្នារវាងប៉ូលិស និងពួកបាតុករដើម្បីកម្រិតអំពើហិង្សា ។
ក៏បុ៉ន្តែរដ្ឋាភិបាលហាក់ដូចជាផ្លាស់ប្តូរយុទ្ធសាស្ត្រកាលពីថ្ងៃទី១៤ កុម្ភៈ ពេលដែលប៉ូលិសប្រឆាំងកុបកម្មជាច្រើនរយនាក់បានលើកទៅបំផ្លាញចោលតង់ទាំងឡាយរបស់ពួកបាតុករនៅជុំវិញវិមានរដ្ឋាភិបាល ដែលលោកស្រីយីងឡាក់ ស៊ីណាវ៉ាត្រា ពុំអាចប្រើប្រាស់ចាប់តាំងពីជិត២ខែមកហើយ ។ ក៏ប៉ុន្តែបន្តិចក្រោយមកពួកបាតុករដឹកនាំដោយលោកស៊ូថេប បានលើកមកកាន់ទីនោះវិញកសាងរបាំងពីសម្បកកង់រថយន្ត និងបាវខ្សាច់ ហើយបាតុករជាច្រើនពាន់នាក់បានឡោមព័ទ្ធវិមានរដ្ឋាភិបាលជាថ្មី ដើម្បីរារាំងរដ្ឋាភិបាលកុំឱ្យចូលធ្វើការបាន ។ ពួកបាតុករចាប់ផ្តើមកសាងជញ្ជាំងស៊ីម៉ងត៍ពីមុខរបងដែកនៃប្លុកវិមានរដ្ឋាភិបាល ។ ព្រឹកថ្ងៃទី១៨ កុម្ភៈ ប៉ូលិសដាក់ពង្រាយជាថ្មីនៅជិតទីតាំងនោះ ៕
ចែករំលែកព័តមាននេះ