ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ផ្ទះស្ត្រីមេម៉ាយចិញ្ចឹមចៅស្រីកំព្រាម្នាក់ ត្រូវកូនស្រីមានជំងឺដុតបំផ្លាញផ្ទះក្លាយជាផេះផង់ បង្កភ្ញាក់ផ្អើលកាលពីព្រឹកថ្ងៃទី11 ខែសីហា ឆ្នាំ2019 ស្ថិតក្នុងភូមិប្រាសាទត្បែង ឃុំបន្ទាយឆ្មា ស្រុកថ្មពួក។
សេចក្តីរាយការណ៍បន្តថា ម្ចាស់ផ្ទះរងគ្រោះឈ្មោះឡាយ ហោម ភេទស្រី អាយុ52ឆ្នាំ ចិញ្ចឹមកូនស្រីវិកលចរិកម្នាក់អាយុ30ឆ្នាំ និងចៅស្រីកំព្រាអាយុ8ឆ្នាំម្នាក់ រស់នៅក្នុងភូមិ-ឃុំកើតហេតុខាងលើ ហើយផ្ទះកើតហេតុនេះធ្វើអំពីឈើប្រក់ស័ង្កសី ជញ្ជាំងក្តារទំហំ5ម×7ម។
ប្រភពដដែលថា មុនកើតហេតុ កាលពីយប់ថ្ងៃទី9 ខែសីហា កូនស្រីមានជំងឺវិកលចរិករូបនេះបានដុតសម្ភារៈក្នុងផ្ទះឆេះផ្អើលម្តងហើយ តែត្រូវអ្នកស្រុកជួយពន្លត់ទាន់ពេលវេលា។
បើតាមស្ត្រីម្ចាស់ផ្ទះរៀបរាប់ថា គ្រួសារគាត់ក្រលំបាកណាស់ បច្ចុប្បន្នគាត់អាស្រ័យដើរស៊ីឈ្នួលលាងចានឆ្នាំង ឬបោកខោអាវឲ្យគេ ដើម្បីយកប្រាក់ចិញ្ចឹមកូនស្រីវិកលចរិកខាងលើ និងចៅស្រីកំព្រាដែលឱពុកម្តាយរបស់គេលែងលះគ្នា ហើយចុះចោលផ្ទះជាយូរឆ្នាំមិនដែលឃើញវិលត្រឡប់ឡើយ។
ហើយករណីអគ្គិភ័យនេះ ត្រូវបានកម្លាំងជួរមុខ រួមមាននគរបាលការពារព្រំដែនគោកលេខ807និងយោធាវរ01 សហការជាមួយអាជ្ញាធរ ព្រមទាំងអ្នកស្រុកជួយពន្លត់ដែរ ប៉ុន្តែមិនអាចជួយបាន ព្រោះពេលដែលដឹងនោះ គឺអណ្តាតភ្លើងកំពុងឆាបឆេះពេញបន្ទុកទៅហើយ។
យ៉ាងណាក៏ដោយ ករណីនេះលោក ហ៊ិប សាមៀត មេភូមិប្រាសាទត្បែង បានប្រាប់កោះសន្តិភាពតាមទូរស័ព្ទថា លោកបានធ្វើរបាយកាណ៍ជូនថ្នាក់លើហើយៗថា កម្លាំងជួរមុខទាំងនគរបាលការពារព្រំដែន និងយោធាគ្រោងនឹងជួយគ្រួសារនេះជាបឋមផងដែរ។
លោកមេភូមិបញ្ជាក់ថា ដោយសារឃើញសភាពគ្រួសារនេះក្រីក្រខ្លាំង លោកនឹងបង្កើតគណៈកម្មការមួយរ៉ៃអង្គាសរកថវិកាពីអ្នកស្រុកដើម្បីជួយគ្រួសារនេះដូចគ្នា។ ហើយចុងក្រោយស្ត្រីរងគ្រោះក៏បានអំពាវនាវសុំសប្បុរសជនទាំងក្នុង និងក្រៅប្រទេស មេត្តាជួយដល់គ្រួសារគាត់ផង ព្រោះពេលនេះគ្មានសល់អ្វីទៀតទេ ម្យ៉ាងក៏គ្មានមុខរបរផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ