ខេត្តបន្ទាយមានជ័យ ៖ នៅសាលាខេត្តបន្ទាយមានជ័យ កាលពីព្រឹកថ្ងៃទី១៧ កុម្ភៈ ២០១៤ មានបើកកិច្ចប្រជុំផ្សព្វផ្សាយអនុវត្តសេចក្តីសម្រេចរបស់រាជរដ្ឋាភិបាល ស្តីពីការបង្កើតក្រុមការងារថ្នាក់ជាតិ ចុះមូលដ្ឋាននៅខេត្តបន្ទាយមានជ័យ។ ពិធីនេះ ប្រព្រឹត្តទៅក្រោមអធិបតីភាព ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងមានសមាជិក សមាជិកា ចូលរួមចំនួន ៣២៦នាក់។
ថ្លែងនៅក្នុងកម្មវិធីបើក នៃអង្គប្រជុំ ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងពីបើកវារៈ នៃកិច្ចប្រជុំ គឺដើម្បីកែសម្រួសសមាសភាពក្រុមការងារថ្នាក់ជាតិ ចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា។
ឯកឧត្តម បានបញ្ជាក់ថា ផែនការយុទ្ធសាស្ត្រអភិវឌ្ឍជាតិ គោលនយោបាយ និងកម្មវិធីនានា របស់រាជរដ្ឋាភិបាល សម្រាប់នីតិកាលទី៥ នៃរដ្ឋសភា រាជរដ្ឋាភិបាលបានដាក់ចេញសេចក្តីសម្រេចបង្កើតក្រុមការងារចុះបំពេញបេសកកម្មតាមមូលដ្ឋាន ក្នុងគោលបំណង ដើម្បីឲ្យកម្មវិធីនយោបាយខាងលើនេះ បានអនុវត្តប្រកបដោយប្រសិទ្ធភាពនៅគ្រប់មូលដ្ឋានទូទាំងប្រទេស។
បន្ទាប់មក ឯកឧត្តម លេង វី អនុរដ្ឋលេខាធិការក្រសួងមហាផ្ទៃ បានអានលិខិតរបស់រាជរដ្ឋាភិបាល លេខ២៦សសរ. ចុះថ្ងៃទី២៧ មករា ២០១៤ ស្តីពីការបង្កើតក្រុមការងារថ្នាក់ជាតិចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលនៅខេត្តបន្ទាយមានជ័យ មាន ៣១រូប ក្នុងនោះមាន ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាប្រធានទី១ និងអនុប្រធានចំនួន ២រូប ព្រមទាំងអានសេចក្តីណែនាំ ស្តីពីតួនាទីភារកិច្ច និងរបៀបរបបការងារសម្រាប់ក្រុមការងារចុះបំពេញបេសកកម្មតាមមូលដ្ឋាន។
ឯកឧត្តម គោ ស៊ុំសារឿត អភិបាល នៃគណៈអភិបាលខេត្តបន្ទាយមានជ័យ បានអានរបាយការណ៍ ស្តីពីលទ្ធផលការងារលើគ្រប់វិស័យរបស់ខេត្តបន្ទាយមានជ័យ បន្ថែមលើរបាយការណ៍ ស្តីពីវឌ្ឍនភាព នៃការងារកម្មវិធីវិសហមជ្ឈការ និងវិមជ្ឈការ និងការងាររសេវារដ្ឋបាលជូនប្រជាជន ក្នុងនោះដែរ ឯកឧត្តម អភិបាលខេត្ត បានជម្រាបជូនប្រធានអង្គប្រជុំពីបញ្ហាប្រឈមខ្លះៗ នៅក្នុងខេត្តបន្ទាយមានជ័យ មានចំនួន ២៦ករណី។
មានប្រសាសន៍បូកសរុបនាឱកាសនោះ ឯកឧត្តម ឧបនាយករដ្ឋមន្ត្រី កែ គឹមយ៉ាន បានបញ្ជាក់ជូនអំពីតួនាទីភារកិច្ចរបស់ក្រុមការងារថ្នាក់ជាតិ ចុះបេសកកម្មនៅមូលដ្ឋាន គឺមានភារកិច្ចផ្សាភ្ជាប់រវាងរាជរដ្ឋាភិបាល ជាមួយប្រជាពលរដ្ឋ តាមរយៈការផ្សព្វផ្សាយឲ្យបានទូលំទូលាយនូវកម្មវិធីនយោបាយយុទ្ធសាស្ត្រចតុកោណដំណាក់កាលទី៣ ផែនការយុទ្ធសាស្ត្រអភិវឌ្ឍជាតិ នយោបាយភូមិ-ឃុំ មានសុវត្ថិភាព កម្មវិធីនយោបាយតាមវិស័យ ក៏ដូចជាសភាពការណ៍រួមរបស់ប្រទេសជាតិ ដោយផ្សាភ្ជាប់ជាមួយសភាពការណ៍នៅមូលដ្ឋាន។
ជាមួយគ្នានោះដែរ ឯកឧត្តមបានណែនាំដល់ក្រុមការងារ ធ្វើយ៉ាងណាត្រូវរកគន្លឹះល្អៗ ធ្វើការផ្សព្វផ្សាយជូនដល់ប្រជាជពលរដ្ឋនៅមូលដ្ឋានឲ្យគាត់ងាយយល់ និងចំគោលដៅ ដែលគាត់ចង់បាន បម្រើឲ្យមូលដ្ឋានរបស់គាត់រស់នៅ។ ជាងនេះទៀត ត្រូវរួមសហការជាមួយក្រុមការងារថ្នាក់ក្រោមជាតិ ដោះស្រាយនូវរាល់បញ្ហាប្រឈមទាំងឡាយនៅក្នុងមូលដ្ឋានផងដែរ៕
ចែករំលែកព័តមាននេះ