រាជធានីភ្នំពេញ ៖ អបអរសាទរ អាកាសយានដ្ឋានអន្តរជាតិភ្នំពេញតេជោ នៅថ្ងៃទី៩ ខែកញ្ញា ឆ្នាំ២០២៥ បានចាប់ផ្តើមដំណើរការបម្រើសេវាកម្មហោះហើរជូនភ្ញៀវជាតិ និងអន្តរជាតិ តភ្ជាប់ជើងមេឃកម្ពុជា…
រាជធានីភ្នំពេញ ៖ អបអរសាទរ អាកាសយានដ្ឋានអន្តរជាតិភ្នំពេញតេជោ នៅថ្ងៃទី៩ ខែកញ្ញា ឆ្នាំ២០២៥ បានចាប់ផ្តើមដំណើរការបម្រើសេវាកម្មហោះហើរជូនភ្ញៀវជាតិ និងអន្តរជាតិ តភ្ជាប់ជើងមេឃកម្ពុជា ទៅកាន់ពិភពលោកកាន់តែធំ និងទូលាយជាងមុន ។ នេះបើយោងតាមបណ្តាញសង្គមរបស់ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល ។
ឯកឧត្តមបានលើកឡើងថា វិស័យអាកាសចរ គឺជាមធ្យោបាយធ្វើដំណើរដឹកជញ្ជូនមួយ ក្នុងចំណោមមធ្យោបាយជាច្រើនដែលអាចភ្ជាប់ទំនាក់ទំនងរបស់អ្នកទេសចរណ៍ធុរកិច្ច នយោបាយ និងបេសកកម្មពហុបំណង និងជាប្រភពសេដ្ឋកិច្ចយ៉ាងសំខាន់សម្រាប់ប្រទេស ពិសេសឈរលើគោលនយោបាយយ៉ាងជាក់លាក់ក្នុងការទាក់ទាញការវិនិយោគ ទំនាក់ទំនង ការទូត និងគោលដៅផ្សេងៗរាប់មិនអស់ ។
អាស្រ័យហេតុនេះ កម្ពុជាក៏បានពង្រឹង និងពង្រីកខ្លួនយ៉ាងសកម្មក្នុងការកសាងអាកាសយានដ្ឋានកម្រិតអន្តរជាតិនេះ ដើម្បីចូលរួមចំណែកក្នុងការបម្រើដល់សេចក្តីត្រូវការ កំណើននៃការធ្វើដំណើរតភ្ជាប់ទំនាក់ទំនងយ៉ាងសកម្មរបស់អ្នកដំណើរ ពិសេសការតម្រង់គោលដៅមកកាន់កម្ពុជា ។
យន្តហោះរបស់ក្រុមអាកាសចរណ៍ជាតិ Air Cambodia ដឹកភ្ញៀវទេសចរមកពីប្រទេសចិនបានក្លាយជាជើងហោះហើរដំបូងបង្អស់ដែលបានទម្លាក់កង់ចុះចតនៅអាកាសយានដ្ឋានអន្តរជាតិតេជោ ខណៈដែលអាកាសយានដ្ឋានថ្មីសន្លាងមួយនេះបានដាក់ឱ្យដំណើរការនៅព្រឹកថ្ងៃទី០៩ ខែកញ្ញា ឆ្នាំ២០២៥ បន្ទាប់ពីអាកាសយាន្តដ្ឋានអន្តរជាតិភ្នំពេញ ដែលមានអាយុកាល៦៦ឆ្នាំ ត្រូវបិទលែងដំណើរការទាំងស្រុង កាលពីវេលាម៉ោង១២ រំលងអធ្រាត្រ ថ្ងៃទី០៨ ខែកញ្ញា ឆ្នាំ២០២៥ ដោយរាល់ប្រតិបត្តិការទាំងអស់ត្រូវផ្ទេរទាំងស្រុងទៅអាកាសយានដ្ឋានអន្តរជាតិតេជោដែលទើបសាងសង់ថ្មីសន្លាង ។
ការសាងសង់អាកាសយានដ្ឋានអន្តរជាតិតេជោនេះ ត្រូវបានប្រកាសឡើងកាលពីខែមករា ឆ្នាំ២០១៨ ដែលការសាងសង់អាកាសយានដ្ឋានអន្តរជាតិថ្មីនេះ គឺជាសក្ខីកម្មនៃភាពរីកចម្រើនរបស់កម្ពុជាដែលត្រូវធ្វើការពង្រីកនូវអាកាសយានដ្ឋានជាចាំបាច់ ដើម្បីទទួលជើងហោះហើរទាំងក្នុង និងក្រៅប្រទេសដោយ អាកាសយានដ្ឋានអន្តរជាតិតេជោនេះ ជាប្រភេទអាកាសយានដ្ឋាន 4F ដែលមានសមត្ថភាពទទួលយន្ត ហោះធុនធំចុះចតបាន ។
ជាមួយគ្នានេះ អាកាសយានដ្ឋានអន្តរជាតិតេជោ មានសមត្ថភាពក្នុងការទទួល អ្នកដំណើរប្រមាណ១៣លាននាក់ក្នុង១ឆ្នាំសម្រាប់ដំណាក់កាលទី១ ហើយអាចទទួលអ្នកដំណើររហូតដល់ ៣០លាននាក់ ក្នុង១ឆ្នាំ នៅដំណាក់កាលទី២ និងដំណាក់កាលទី៣ នៃការសាងសង់ត្រូវបានបញ្ចប់អាចទទួលអ្នកដំណើរបាន៥០លាននាក់ក្នុង១ឆ្នាំ ចាប់ពីឆ្នាំ២០៥០តទៅ។
សូមជម្រាបជូនថា អាកាសយានដ្ឋានអន្តរជាតិតេជោ មានទីតាំងស្ថិតនៅឃុំព្រែកស្លែង ស្រុកកណ្តាល ស្ទឹង ខេត្តកណ្តាល និងមួយផ្នែកស្ថិតក្នុងស្រុកបាទី ខេត្តតាកែវ មានផ្ទៃដីជាង២៦០០ហិកតា ដែលគ្រោងសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ សម្រាប់ដំណាក់កាលទី១ ដើម្បីទទួលអ្នកដំណើរផ្លូវអាកាសចេញ-ចូលប្រទេសកម្ពុជា៕
ចែករំលែកព័តមាននេះ