ខេត្តសៀមរាប ៖ ក្រុមមន្រ្តីនគរបាលបាននិយាយថា បុរសជនជាតិវៀតណាមចំនួន០២នាក់ត្រូវបានកម្លាំងចម្រុះប្រចាំអាកាសយានដ្ឋានអន្តរជាតិសៀមរាប ធ្វើការចាប់ខ្លួន កាលពីយប់ថ្ងៃទី១៦ កុម្ភៈ ខណៈជនទាំងពីរបានព្យាយាមនាំចូលភ្លុកដំរីចំនួនបីវ៉ាលីមានទម្ងន់ជិត៨០គីឡូក្រាម ពីទ្វីបអាហ្វ្រិក ឆ្លងកាត់ច្រកទ្វារទេសចរណ៏ដ៏សំខាន់របស់ព្រះរាជាណាចក្រកម្ពុជាមួយនេះ
ខេត្តសៀមរាប ៖ ក្រុមមន្រ្តីនគរបាលបាននិយាយថា បុរសជនជាតិវៀតណាមចំនួន០២នាក់ត្រូវបានកម្លាំងចម្រុះប្រចាំអាកាសយានដ្ឋានអន្តរជាតិសៀមរាប ធ្វើការចាប់ខ្លួន កាលពីយប់ថ្ងៃទី១៦ កុម្ភៈ ខណៈជនទាំងពីរបានព្យាយាមនាំចូលភ្លុកដំរីចំនួនបីវ៉ាលីមានទម្ងន់ជិត៨០គីឡូក្រាម ពីទ្វីបអាហ្វ្រិក ឆ្លងកាត់ច្រកទ្វារទេសចរណ៏ដ៏សំខាន់របស់ព្រះរាជាណាចក្រកម្ពុជាមួយនេះ ដើម្បីចម្លងទៅកាន់ទីផ្សារងងឹតដែលកំពុងមានរឿងចម្រូងចម្រាសយ៉ាងក្តៅគគុក។
ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត លោកវរសេនីយ៍ឯក សឿន សេន បានថ្លែងប្រាប់ថា ប្រតិបត្តិការបង្ក្រាបនេះធ្វើឡើងនៅវេលាម៉ោង៩និង៣០នាទីយប់ថ្ងៃទី១៦ កុម្ភៈ ក្រោមការដឹកនាំដោយលោកជួន សុបញ្ញា ព្រះរាជអាជ្ញារងអមសាលាដំបូងខេត្ត និងមានការចូលរួមផ្ទាល់ដោយកម្លាំងប៉ូលិសស្នងការដ្ឋានខេត្ត និងប៉ូលិសអន្តោប្រវេសន៏ប្រចាំអាកាសយានដ្ឋានផងដែរ។
ជនសង្ស័យទាំង០២នាក់ ដែលត្រូវបានចាប់ខ្លួននោះម្នាក់ឈ្មោះផាម ខ្វានទ្រៀង(Pham Quang Truong) ភេទប្រុស អាយុ២៣ឆ្នាំ កាន់លិខិតឆ្លងដែនលេខ B5480684 និងម្នាក់ទៀតឈ្មោះបួយវាន់ ទៀង (Bui Van Tuan ) ភេទប្រុស អាយុ៤៥ឆ្នាំ កាន់លិខិតឆ្លងដែនលេខ B5381992។ ជនទាំង០២នាក់ជាជនជាតិវៀតណាម បានធ្វើដំណើរចេញពីប្រទេសអង់កូឡា (ទ្វីបអាហ្រ្វិ) ឆ្លងកាត់ព្រលានយន្តហោះប្រទេសកូរ៉េ ចូលមកកាន់ព្រលានយន្តហោះសៀមរាប ជាមួយវត្ថុតាងភ្លុកដំរីទម្ងន់៧៩,៥ គីឡូក្រាម ដាក់ក្នុងវ៉ាលីចំនួន០៣ ។
លោកបានបន្ថែមថា តាមការសាកសួរឃើញថា វត្ថុតាងភ្លុកដំរីទាំងនេះទំនងជាមិនត្រូវបាននាំចូលសំរាប់ជួញដូរនៅក្នុងប្រទេសកម្ពុជាទេ តែទំនងជាត្រូវបាននាំទៅកាន់ប្រទេសវៀតណាម និងប្រទេសចិន ដើម្បីធ្វើជាគ្រឿងលម្អ ឬក៏គ្រឿងអលង្ការផ្សេងៗ ដែលមានតំលៃខ្ពស់។
ក្រុមមន្រ្តីបានអះអាងថា នេះជាករណីដំបូងហើយដែលសមត្ថកិច្ចចម្រុះប្រចាំនៅច្រកអន្តរជាតិខាងលើធ្វើការបង្រ្កាបបានភ្លុកដំរី នាំចូលពីបរទេស នៅគ្រាប្រទេសវៀតណាមនិងប្រទេសមួយចំនួននៅលើពិភពលោកត្រូវបានគេរាយការណ៏ថា បានធ្វើការចាប់និងដុតបំផ្លាញចោលនូវភ្លុកដំរី រាប់ពាន់គូកាលពីពេលថ្មីៗកន្លងទៅនេះ៕
ចែករំលែកព័តមាននេះ