ការចរចារវាងគណៈប្រតិភូរបស់ពួកប្រឆាំង និងគណៈប្រតិភូរបស់រដ្ឋាភិបាលស៊ីរី ក្រោមការធ្វើអាជ្ញាកណ្តាលរបស់តំណាងអ.ស.ប និងសម្ព័ន្ធអារ៉ាប់លោកឡាក់ដាប្រាហ៊ីមី បានបញ្ចប់កាលពីថ្ងៃទី១៥ កុម្ភៈ នៅក្រុងហ្សឺណែវ ដោយទទួលបរាជ័យព្រោះពុំសម្រេចបានការរីកចម្រើនទៅមុខឡើយ ។
ការចរចារវាងគណៈប្រតិភូរបស់ពួកប្រឆាំង និងគណៈប្រតិភូរបស់រដ្ឋាភិបាលស៊ីរី ក្រោមការធ្វើអាជ្ញាកណ្តាលរបស់តំណាងអ.ស.ប និងសម្ព័ន្ធអារ៉ាប់លោកឡាក់ដាប្រាហ៊ីមី បានបញ្ចប់កាលពីថ្ងៃទី១៥ កុម្ភៈ នៅក្រុងហ្សឺណែវ ដោយទទួលបរាជ័យព្រោះពុំសម្រេចបានការរីកចម្រើនទៅមុខឡើយ ។
ក្នុងសន្និសីទសារព័ត៌មានមួយក្រោយការចរចាកាលពីថ្ងៃទី១៥ កុម្ភៈ នៅឯវិមានអ.ស.ប ក្រុងហ្សឺណែវ លោកប្រាហ៊ីមី បានសម្តែងការសោកស្តាយចំពោះការចរចាវគ្គទី២ នោះ ដែលពុំសម្រេចបានលទ្ធផល ដោយលោកស្នើដល់ភាគីស៊ីរីទាំង២ គិតទៅដល់ប្រជាជនស៊ីរី ហើយធ្វើការពិចារណាឱ្យបានល្អិតល្អន់ដើម្បីទទួលខុសត្រូវក្នុងការដោះស្រាយវិបត្តិក្នុងប្រទេសពួកគេ។
លោកប្រាហ៊ីមី បន្តថា ខ្ញុំពិតជាខកចិត្តខ្លាំងណាស់ដែលក្តីសង្ឃឹមរបស់យើងត្រូវរលាយ រួចឱ្យខ្ញុំសុំទោសចំពោះប្រជាជនស៊ីរី ។ ខ្ញុំចង់ឱ្យភាគីម្ខាងៗពេលវិលត្រឡប់ទៅវិញពិចារណាពីការទទួលខុសត្រូវហើយនិយាយថា តើម្ខាងៗចង់បន្តដំណើរការសន្តិភាពបន្តទៀតឬអត់ ។
លោកប្រាហុីមី ធ្វើការកត់សម្គាល់ថា ការចរចាគ្នាលើកនេះពិតជាសំខាន់ជាងការចរចាលើកមុនៗ ព្រោះបានលើកឡើងពីរបៀបវារៈ៤ចំណុចគឺ អំពើហិង្សា ភេរវកម្ម ការឆ្លងកាត់ខាងនយោបាយ វិធានការទំនុកចិត្តគ្នា ព្រមទាំងការបង្រួបបង្រួមជាតិ ។ ក៏ប៉ុន្តែការខ្វែងគំនិតគ្នានានានៅតែពុំអាចជម្នះបានរវាងភាគីស៊ីរីទាំងពីរ។
លោកក៏អំពាវនាវផងដែរដល់បណ្តាភាគីទាក់ទិនឱ្យរួមចំណែកជួយដល់ប្រទេសស៊ីរី ប្រឈមមុខទល់នឹងការឈឺចាប់របស់ប្រជាជន ដោយលោកអំពាវនាវថា លោកនឹងទៅកាន់ក្រុងញូវយ៉កនាពេលខាងមុខនេះដើម្បីរាយការណ៍ជូនអគ្គលេខាធិការអ.ស.ប និងក្រុមប្រឹក្សាសន្តិសុខអ.ស.ប ។
ការចរចាវគ្គទី២ ស្តីពីស៊ីរីក្នុងក្របខណ្ឌនៃសន្និសីទហ្សឺណែវ-២ ចាប់ផ្តើមពីថ្ងៃទី១០ កុម្ភៈ មកក្នុងគោលបំណងស្វែងរកដំណោះស្រាយនយោបាយមួយចំពោះវិបត្តិអូសបន្លាយនៅស៊ីរី។ ប៉ុន្តែដោយសារការខ្វែងគំនិតគ្នាខ្លាំងបំផុតរវាងភាគីស៊ីរីទាំង២ ការចរចានៅតែទ័លច្រកជានិច្ច ។
ជម្លោះក្នុងប្រទេសនេះ តាមអង្គការក្រៅរដ្ឋាភិបាលស៊ីរីមួយរាយការណ៍កាលពីថ្ងៃទី១៥ កុម្ភៈ ថា មានមនុស្សស្លាប់ដល់ជាង១៤០.០០០នាក់ហើយ ។
យោងតាមអង្គការ OSDH នោះមានមូលដ្ឋាននៅអង់គ្លេសថា មនុស្សយ៉ាងតិច១៤០.០៤១នាក់ ក្នុងនោះមានជនស៊ីវិល៤៩.៩៥១នាក់ ដែលមានកុមារ៧.៦២៦នាក់ និងនារី៥.០៦៤នាក់ បានត្រូវស្លាប់ក្នុងជម្លោះនោះរវាងពួកឧទ្ទាម និងរបបស៊ីរី រួចសង្គ្រាមកាន់តែស្មុគស្មាញថែមទៀតជាមួយការប្រយុទ្ធគ្នាផងដែររវាងពួកឧទ្ទាម និងក្រុមជីហាដនិយមមានពួកបរទេសភាគច្រើន ។
ក្នុងជួរពួកប្រឆាំងប្រធានាធិបតីលោកបាចា អាល់អាសាដ យុទ្ធជនឧទ្ទាម២៤.១៦៧នាក់បានត្រូវស្លាប់ បន្ថែមពួកជីហាដនិយម៨.៩៧២នាក់នៃក្រុមរណសិរ្ស FRONT AL NOSRA និងក្រុមរដ្ឋអ៊ិស្លាមនៅអីុរ៉ាក់ និង LEVANT (EIIL) ។
ខាងកងកម្លាំងរៀបរយស៊ីរី ទាហាននិងសមាជិកកងជីវពលរដ្ឋាភិបាល៥៤.១៩៩នាក់បានត្រូវស្លាប់ ព្រមទាំងសមាជិកក្រុមហេសប៊ុលឡាហ៍លីបង់២៧៥នាក់ និងសមាជិកក្រុមស៊ីអីុតបរទេសស្និទ្ធរដ្ឋាភិបាលដទៃៗទៀត៣៦០នាក់។
តុល្យការនេះរួមបញ្ចូលផងដែរជនរងគ្រោះពុំស្គាល់អត្តសញ្ញាណ២.៨៣៧នាក់ ។ OSDH អះអាងថា តុល្យការពិតប្រាកដតាមពិតទៅមានខ្ពស់ជាងនេះ ៕
ចែករំលែកព័តមាននេះ