រាជធានីភ្នំពេញ ៖ កាលពីព្រឹកថ្ងៃទី១៤ កុម្ភៈកន្លងទៅ ក្លិបបាល់ទាត់ភ្នំពេញក្រោនបានរៀបចំកម្មវិធីប្រកួតបាល់ទាត់មិត្តភាពជាលក្ខណៈកម្សាន្តមួយនៅក្នុងមូលដ្ឋានរបស់ខ្លួន ដោយមានការចូលរួមពីកីឡាករ-កីឡាការិនីក្មេងៗជាច្រើនមកពីតាមបណ្តាអង្គការ និងសាលារៀនផ្សេងៗគ្នា ។ ស្របពេលជាមួយគ្នានោះ ក្លិបក៏បានប្រគល់បាល់ចំនួន៣០ ជូនដល់អង្គការចំនួន៣ គឺអង្គការ PSE, អង្គការ Cold និងសាលាទឹកល្អក់ ដោយក្នុង១អង្គការ និងសាលាទទួលបានបាល់១០ ។
លោក Sam Schweingruber គ្រូបង្វឹកឈុតធំរបស់ក្រុមភ្នំពេញក្រោន និងជាអ្នកដឹកនាំកម្មវិធីខាងលើនេះ បានថ្លែងឱ្យដឹងថា «ការរៀបចំព្រឹត្តិការណ៍ប្រកួតបាល់ទាត់យុវជនជាលក្ខណៈមិត្តភាពជាតិនេះ គឺលោកចង់ផ្សព្វផ្សាយអំពីបាល់ទាត់កម្ពុជា ហើយក៏ចង់ឱ្យក្មេងៗតាមភូមិ តាមសាលា និងតាមអង្គការផ្សេងៗមានឱកាសចូលរួមលេងកម្សាន្តដោយមិនគិតពីលទ្ធផលឈ្នះចាញ់ឡើយ បុ៉ន្តែសំខាន់នោះគឺចង់ឱ្យក្មេងៗទាំងប្រុស-ស្រីបានចូលរួមលេងកីឡាទាំងអស់គ្នា» ។
គ្រូបង្វឹករូបនេះបានបន្តទៀតថា ការលេងបាល់ទាត់គឺមានប្រយោជន៍ច្រើនណាស់នៅក្នុងសង្គមដូចជា ការរឹតចំណងសាមគ្គីភាព ការរាប់អាន គោរពស្រឡាញ់ និងទទួលបានសុខភាពល្អរៀងៗខ្លួនទៀតផង ។ មិនត្រឹមតែបុ៉ណ្ណោះ បាល់ទាត់អាចធ្វើឱ្យក្មេងៗចេះគោរព និងអធ្យាស្រ័យឱ្យគ្នាទៅវិញទៅមកទាំងលើទីលាន និងក្រៅទីលាន ដែលជាកត្តារួមចំណែកមួយក្នុងការអភិវឌ្ឍវិស័យកីឡាបាល់ទាត់ក្នុងប្រទេសកម្ពុជាឱ្យមានការរីកចម្រើនកាន់តែខ្លាំងឡើងៗ ។
លោកបានសម្តែងអារម្មណ៍សប្បាយរីករាយនៅពេលឃើញវត្តមានក្មេងៗចូលរួមច្រើននៅក្នុងកម្មវិធីនោះ ហើយលោកក៏ត្រេកអរផងដែរនៅពេលដែលក្មេងៗទាំងអស់នោះបានខិតខំប្រឹងប្រែងបញ្ចេញសមត្ថភាពពិតៗរបស់ខ្លួន ដោយគោរពឆន្ទៈនិងការសម្រេចចិត្តខ្លួនឯងបានយ៉ាងល្អប្រសើរ ។ តាមរយៈការបញ្ចេញសមត្ថភាពរបស់ពួកគេពេលប្រកួតអាចឱ្យលោកមើលឃើញនូវទេពកោសល្យយកធ្វើជាថ្នាលសម្រាប់ចូលលេងឱ្យក្រុមរបស់លោក២ទៅ៣នាក់ផងដែរ ។
ដោយឡែក កញ្ញាសូ ដានី មន្ត្រីព័ត៌មាននៃក្លិបភ្នំពេញក្រោន ក៏បានឱ្យដឹងដែរថា នៅក្នុងកម្មវិធីនេះ ក្លិបភ្នំពេញក្រោនបានរៀបចំពិធីប្រគល់បាល់ចំនួន៣០ ដល់អង្គការនិងសាលាចំនួន៣ ខាងលើនេះគឺដើម្បីឱ្យក្មេងៗនៅក្នុងអង្គការ និងសាលាទាំងនេះមានសម្ភារហ្វឹកហាត់បន្ថែមទៀត ។ កញ្ញាបានបន្តទៀតថា នេះគ្រាន់តែជាជំហានដំបូងប៉ុណ្ណោះដែលក្លិបបានរៀបចំពិធីប្រគល់បាល់ដល់អង្គការ ឬសាលា ប៉ុន្តែនៅក្នុងខែមីនា និងមេសាខាងមុខនេះ ក្លិបនឹងមានកម្មវិធីធំៗ២ទៀត គឺពិធីប្រគល់បាល់ជូនដល់បណ្តាអង្គការ និងសាលាជុំវិញរាជធានីភ្នំពេញ និងតាមបណ្តាខេត្តក្នុងប្រទេសកម្ពុជាផងដែរ ៕
ចែករំលែកព័តមាននេះ