ខេត្តតាកែវ ៖ សាលាដំបូងខេត្ដនឹងលើកសំណុំរឿងបុរសពិការដែលទៅឃាត់គេកុំឱ្យឆក់ត្រីក្នុងប្រឡាយរបស់ខ្លួន ត្រូវគេឆក់សន្លប់ក្នុងទឹក ហើយត្រូវគេប្ដឹងនោះមកសួរនាំជាលើកទី២ នៅថ្ងៃទី១៨ កុម្ភៈ វេលាម៉ោង២និង៣០នាទីរសៀលខាងមុខនេះ ដែលសំណុំរឿងនេះបានធ្លាក់មកលើចៅក្រមសាលាដំបូងខេត្ដលោក ប្លង់ ឆ្លាម ។
ខេត្តតាកែវ ៖ សាលាដំបូងខេត្ដនឹងលើកសំណុំរឿងបុរសពិការដែលទៅឃាត់គេកុំឱ្យឆក់ត្រីក្នុងប្រឡាយរបស់ខ្លួន ត្រូវគេឆក់សន្លប់ក្នុងទឹក ហើយត្រូវគេប្ដឹងនោះមកសួរនាំជាលើកទី២ នៅថ្ងៃទី១៨ កុម្ភៈ វេលាម៉ោង២និង៣០នាទីរសៀលខាងមុខនេះ ដែលសំណុំរឿងនេះបានធ្លាក់មកលើចៅក្រមសាលាដំបូងខេត្ដលោក ប្លង់ ឆ្លាម ។
គួររំលឹកថា កាលពីថ្ងៃទី២៩ មករា ២០១៣វេលាម៉ោង៨និង៣០នាទីយប់មានករណីលួចឆក់ត្រីក្នុងប្រឡាយជីកក្នុងដីស្រែមួយកន្លែងហើយខណៈពេលម្ចាស់ទៅឃាត់មិនឱ្យឆក់ ក៏ត្រូវជនល្មើសយកឧបករណ៍ឆក់ត្រីនោះឆក់ដួលសន្លប់តែម្ដង ដែលហេតុការណ៍នេះបានកើតឡើងក្នុងប្រឡាយមួយបែកចេញពីប្រឡាយមេលេខ៩២ ស្ថិតក្នុងឃុំរមិញ ស្រុកកោះអណ្ដែត ។ ក្នុងសភាពទ្រុឌទ្រោមទាំងខ្លួនពិការជើងម្ខាង ជនរងគ្រោះបានរៀបរាប់ថា គាត់ឈ្មោះ សា វុធ អាយុ ៤១ឆ្នាំ បានចូលហ៊ុនគ្នា៣នាក់ទិញប្រឡាយទឹកមួយពីឪពុកក្មេក មានទីលំនៅភូមិចំបក់អែម ឃុំរមិញ ស្រុកកោះអណ្ដែត ។
នៅយប់ថ្ងៃកើតហេតុ គាត់បានទទួលដំណឹងពីបងប្អូនដែលស្នាក់នៅលើភ្លឺប្រឡាយនោះទូរស័ព្ទប្រាប់ថា មានគេលួចឆក់ត្រីក្នុងប្រឡាយ ភ្លាមនោះគាត់បានបបួលប្អូនថ្លៃប្រុស២នាក់ដែលចូលហ៊ុនជាមួយគ្នាជិះម៉ូតូទៅមើល ។ ដោយសារស្ថានភាពផ្លូវមិនអាចជិះម៉ូតូទៅដល់ ក៏ទុកម៉ូតូរួចដើរកាត់ទឹកបន្ដ ទើបទៅដល់ប្រឡាយរបស់ខ្លួន ខណៈពេលទៅដល់មាត់ប្រឡាយ ស្រាប់តែឃើញមនុស្សម្នាក់កំពុងឆក់ត្រីដូចដែលបងប្អូនបានទូរស័ព្ទប្រាប់មែន ភ្លាមនោះគាត់ក៏ចុះទៅឃាត់កុំឱ្យឆក់ ស្រាប់តែត្រូវជននោះយកឧបករណ៍ឆក់ត្រីមកឆក់គាត់បណ្ដាលឱ្យដួលផ្កាប់មុខទៅក្នុងទឹកតែម្ដង ។
ក្នុងស្ថានភាពនោះ ឈ្មោះ ង៉ែត បញ្ញា ត្រូវជាប្អូនថ្លៃបានយកដងឈឹបវាយផ្ដាច់ខ្សែអាគុយ ហើយជួយលើករូបគាត់ ស្រាប់តែមានជនម្នាក់ទៀតចេញពីក្នុងស្រែប្រាំងស្ទុះមកកៀក.កឈ្មោះ ង៉ែត បញ្ញា តែត្រូវប្អូនថ្លៃរបស់គាត់វាយមួយដៃចំមុខ ទើបបែកចេញពីគ្នារៀងខ្លួន ។ ពេលនោះជនល្មើសទាំង២នាក់ក៏គេចខ្លួនបាត់ ហើយប្អូនថ្លៃបានស្ទុះលើកគាត់ ដែលត្រូវជនល្មើសឆក់ដួលផ្កាប់មុខក្នុងទឹកយកមកផ្ទះ រួចបញ្ជូនទៅព្យាបាលនៅមន្ទីរពេទ្យបង្អែកស្រុកកោះអណ្ដែត ។ លុះព្រឹកឡើង មន្ដ្រីនគរបាលប៉ុស្ដិ៍រដ្ឋបាលឃុំរមិញ បានចុះទៅពិនិត្យកន្លែងកើតហេតុ និងស្រាវជ្រាវករណីនេះដែរ ស្រាប់តែរំលងបាន២-៣ថ្ងៃក៏ឃើញលោកអធិការស្រុកកោះអណ្ដែតមកកោះហៅរូបគាត់ដែលជាជនរងគ្រោះ និងកំពុងព្យាបាលក្នុងមន្ទីរពេទ្យទៅវិញ ដោយមានពាក្យបណ្ដឹងពីឈ្មោះ ភឹម អឿន ភេទប្រុស អាយុ ៣២ឆ្នាំ រស់នៅភូមិប្រឡាយមាស ឃុំរមិញ ស្រុកកោះអណ្ដែត បានប្ដឹងរូបគាត់ពីករណីវាយតប់នៅក្នុងប្រឡាយបណ្ដាលឱ្យជាំភ្នែក និងក្ដោងច្រមុះ ដោយឈ្មោះ ង៉ែត បញ្ញា ជាអ្នកវាយ ។
ចំណែកមន្ដ្រីនគរបាលប៉ុស្ដិ៍រដ្ឋបាលឃុំរមិញបានបញ្ជាក់ប្រាប់ថា ពេលលោកទៅពិនិត្យកន្លែងកើតហេតុ ពិតជាមានស្នាមជើងនៅមាត់ប្រឡាយខាងកើតមែន តែពេលលោកសួរឈ្មោះ ឡឹម តុង នៅកន្លែងកើតហេតុ គេឆ្លើយថា ខ្លួនពុំមែនឆក់ត្រីនៅខាងកើតប្រឡាយទេ គឺគេឆក់នៅក្នុងទឹកពីខាងលិចប្រឡាយ ។ អ្នកតាមដានកំពុងរង់ចាំមើលពីចំណាត់ការរបស់សាលាដំបូងខេត្ដលើសំណុំរឿងនេះ ហើយសង្ឃឹមថា លោកតុលាការនឹងរកដំណោះស្រាយជូនភាគីទាំងពីរឱ្យទទួលបានយុត្ដិធម៌រៀងៗខ្លួន និងបញ្ចប់រឿងក្ដីដោយតម្លាភាព ៕
ចែករំលែកព័តមាននេះ