ខេត្តស្ទឹងត្រែង ៖ ជំនាញរដ្ឋបាលព្រៃឈើថ្នាក់កណ្តាលរួមសហការជាមួយរដ្ឋបាលព្រៃឈើខេត្តស្ទឹងត្រែង និងមានការចូលរួមពីកម្លាំងនគរបាលបានចុះទៅពិនិត្យនៅក្នុងដីក្រុមហ៊ុនសម្បទានសេដ្ឋកិច្ចមួយកន្លែង ស្ថិតនៅតាមបណ្តោយផ្លូវ៧៨A ចាស់ ក្នុងភូមិស្រែគរ ឃុំក្បាលរមាស ស្រុកសេសាន ។ ឈើប្រណីតប្រភេទធ្នង់ នាងនួន ជាង១ពាន់ម៉ែត្រគូប ត្រូវបានគេជីកដីកប់នៅក្នុងក្រុមហ៊ុន ហ្វ័រ យូ គ្រុប (កម្ពុជា) ស៊ីវ ហ្គេចអិុនវេសមេន ខូ អិល ធី ឌី ។
ប្រភពពីសមត្ថកិច្ចបានឱ្យដឹងថា រណ្តៅមានជម្រៅចាប់ពី៤ទៅ៧ម៉ែត្រ និងទំហំជាង១០ម៉ែត្រ រហូតទៅដល់ជិត៤០ម៉ែត្រ ចំនួន៦រណ្តៅ ត្រូវបានជីកដោយគ្រឿងចក្រធំ ។ ហើយយកឈើប្រណីតមានតូច មានធំ មិនក្រោមពីមួយម៉ឺនកំណាត់ ទៅទម្លាក់ក្នុងរណ្តៅទាំងនោះ រួចបញ្ជាគ្រឿងចក្រទាំងនោះកាយដីកប់លុបវិញ ។ ឈើប្រណីតដែលត្រូវគេជីករណ្តៅកប់ទុកក្នុងដីនោះ គឺភាគច្រើនបានប្រមូលទិញពីប្រជាពលរដ្ឋចាប់តាំងពីខែវស្សា រហូតដល់ខែប្រាំងមកម៉្លេះ ។
ប្រភពដដែលបានបន្តថា មូលហេតុដែលគេជីករណ្តៅកប់នេះ គឺដោយសារដឹកយកចេញទៅមិនទាន់ ស្របពេលដែលរដ្ឋាភិបាល និងក្រសួងកសិកម្មបង្កើតគណៈកម្មាធិការចុះកំណត់ព្រំប្រទល់បាតអាងស្តុកទឹកវារីអគ្គិសនីសេសានក្រោម២ ដោយសារតែខ្លាចជំនាញឃើញគំនរឈើគរដូចភ្នំ ទើបជីកដីកប់ទុកបណ្តោះគ្រោះ តែមិននឹកស្មានថា ត្រូវបែកធ្លាយរឿងបែបនេះសោះ ។
ជំនាញរដ្ឋបាលព្រៃឈើស្ទឹងត្រែង បានបញ្ជាក់ប្រាប់កោះសន្តិភាពនៅរសៀលថ្ងៃទី១៤ កុម្ភៈ ២០១៤ ឱ្យដឹងទៀតថា ក្រុមហ៊ុនព្រៃសម្បទានសេដ្ឋកិច្ច ហ្វ័រ យូ គ្រុប (កម្ពុជា) ស៊ីវ ហ្គេចអិុនវេសមេន ខូ អិល ធី ឌី ទទួលសិទ្ធិសម្បទានពីរដ្ឋរយៈពេល៩០ឆ្នាំលើទំហំផ្ទៃដី១ម៉ឺនហិកតា ដើម្បីដាំដំណាំកសិ-ឧស្សាហកម្ម ដើមកៅស៊ូ ចាប់តាំងពីឆ្នាំ២០០៥ គ្រប់គ្រងដោយលោកឧកញ៉ា អាន មារឌី ប៉ុន្តែស្ថិតក្រោមការអភិវឌ្ឍន៍រយៈពេល៣ឆ្នាំនៅក្នុងឆ្នាំ២០០៨ លោកឧកញ៉ា អាន មារឌី បានផ្ទេរភាគហ៊ុនទៅឱ្យជនជាតិចិន ជាអ្នកបន្តការអភិវឌ្ឍន៍វិញ ។ ចាប់តាំងពីទទួលសិទ្ធិតាំងពីឆ្នាំ២០០៥ រហូតមកដល់បច្ចុប្បន្នក្រុមហ៊ុនបានដាំដំណាំកៅស៊ូបាន១.៥០០ហិកតា លើទំហំផ្ទៃដី១ម៉ឺនហិកតានោះ ។
ប្រជាជនដែលទៅស៊ីឈ្នួលធ្វើជាកម្មករនៅក្នុងក្រុមហ៊ុនខាងលើនេះ ធ្លាប់ធ្វើបាតុកម្មតវ៉ាចំពោះការគ្រប់គ្រងដោយជនជាតិចិនដែលទទួលសិទ្ធិបន្តនោះ បានបង្ខិតបង្ខំឱ្យពួកគាត់ធ្វើការលើសម៉ោងកំណត់ និងបើកប្រាក់ខែមិនទៀងទាត់ថែមទៀត និងព្រមទាំងដាក់ទោសទៅលើកម្មកររូបណាដែលចូលធ្វើការយឺតពេលតែបន្តិច គឺត្រូវប្រឈមនឹងការបណ្តេញចេញ និងមិនបើកប្រាក់ខែឱ្យ។ លោកបាក់ ត្រាយ អះអាងថា ខ្លួនជាអ្នកបកប្រែភាសាចិនឱ្យជនជាតិចិនដែលជាម្ចាស់ក្រុមហ៊ុនបន្តនោះ បាននិយាយប្រាប់អ្នកសារព័ត៌មាននៅរសៀលថ្ងៃដដែលនោះដែរថា ឈើទាំងនោះគឺបានបង់ពន្ធជូនរដ្ឋអស់ទៅហើយ ហើយមិនមែនជាឈើប្រណីតទេ គឺជាឈើប្រភេទលេខ១ មានផ្ចិក ត្រាច សុក្រំ ។ លោកបាក់ ត្រាយ បន្តថា ដោយសារទុកក្នុងឃ្លាំងវាប្រេះ ទើបយកទៅកប់ក្នុងដី ប៉ុន្តែវាជាកំហុសត្រង់យកទៅកប់ដី ។ គេមានចម្ងល់ថា បើជាឈើទាំងនោះបានបង់ពន្ធជូនរដ្ឋរួចរាល់អស់ទៅហើយ ចុះមូលហេតុអ្វីមិនដឹកចេញចាំបាច់យកទៅកប់ដីធ្វើអ្វី ហើយបើតាមការពិនិត្យទៅឈើដុំនីមួយៗ ប្រសិនជាមានការបង់ពន្ធជូនរដ្ឋ គឺត្រូវឆ្លងកាត់ជំនាញរដ្ឋបាលព្រៃឈើចុះធ្វើការវាស់វែង និងវាយត្រាសម្គាល់នៅលើដុំឈើនីមួយៗ តែផ្ទុយទៅវិញនៅលើកន្ទុយឈើនីមួយៗមានតែអក្សរសម្គាល់ថា HYH ប៉ុណ្ណោះ ។
មន្ត្រីជំនាញបាននិយាយថា ក្រោយការដាក់គ្រឿងចក្រគាស់កកាយចេញពីរណ្តៅដីទាំងនោះ ឈើដែលឃើញជាក់ស្តែងជាប្រភេទឈើធ្នង់ នាងនួន តែមិនទាន់ប្រាកដថា ជាប្រភេទឈើប្រណីតទាំងអស់នោះទេ ដោយរង់ចាំរហូតគាស់ចេញពីរណ្តៅដីមកអស់ធ្វើការពិនិត្យបន្ត ។ ទាក់ទិនក្នុងករណីខាងលើភ្នាក់ងារកោះសន្តិភាពនៅបន្តការតាមដានថា តើករណីខាងលើ មន្ត្រីជំនាញអនុវត្តការងារដល់កម្រិតណា ហើយឈើដែលគេសង្ស័យថា មានចំនួនរាប់ពាន់ម៉ែត្រគូបនោះ ពិតជាច្រើនដល់ថ្នាក់ហ្នឹងមែនឬទេ?
ចែករំលែកព័តមាននេះ