រាជធានីភ្នំពេញ ៖ ថ្ងៃ១៤ កុម្ភៈ ឆ្នាំនេះ ចំថ្ងៃបុណ្យមាឃបូជាដែលប្រជាពលរដ្ឋខ្មែរកាន់ព្រះពុទ្ធសាសនាគោរពបូជាគ្រប់ៗគ្នា ហើយថ្ងៃនេះក៏ចំនឹងថ្ងៃបុណ្យនៃក្តីស្រឡាញ់ផងដែរ ។ អ្វីដែលមានការកត់សម្គាល់នាថ្ងៃនេះ ក្រៅពីទិដ្ឋភាពជាទូទៅនោះ ក្រុមស្ត្រីអ្នកតវ៉ាដីធ្លីដ៏សកម្ម និងស្វិតបំផុត នៅបឹងកក់ប្រមាណជា១០នាក់ដឹកនាំដោយអ្នកស្រីទេព វន្នី បាននាំគ្នាយកចិញ្ចើមមហាវិថីព្រះមុនីវង្ស មុខសាលារាជធានីភ្នំពេញ លក់ផ្កា ព្រមទាំងស្រែកតាមមេក្រូអំពាវនាវឱ្យអ្នកធ្វើដំណើរតាមដងផ្លូវជួយទិញផ្កា ព្រមទាំងអះអាងថា ជួយទិញផ្កា ក៏ដូចជាជួយដល់សហគមន៍បឹងកក់ដែលកំពុងមានបញ្ហា ។
មន្ត្រីសាលាខណ្ឌដូនពេញមួយរូបនិយាយថា នេះជាឆ្នាំទី១ ហើយ ដែលក្រុមស្ត្រីអ្នកតវ៉ានៅតំបន់បឹងកក់នាំគ្នាដាក់តាំងលក់ផ្កាកុលាប និងផ្កាឈូកមុខសាលារាជធានីភ្នំពេញ ព្រមទាំងស្រែកឃោសនាសុំឱ្យអ្នកធ្វើដំណើរឆ្លងកាត់ជួយទិញផ្កា របស់ពួកគាត់ ។ បញ្ហានេះក៏បានធ្វើឱ្យមានការកកស្ទះចរាចរណ៍ផងដែរ ដោយសារតែអ្នកធ្វើដំណើរដែលជិះរថយន្ត និងម៉ូតូនាំគ្នាបង្អង់រថយន្ត និងម៉ូតូមើលមុខក្រុមស្ត្រីដែលខ្លះអង្គុយ ខ្លះឈរ ព្រមទាំងមានសម្រស់ដោយសារស្លៀកពាក់ស្អាតបាត ក្លាយជាអ្នកលក់ផ្កាឈូក និងផ្កាកុលាប ។
មន្ត្រីដដែលនិយាយប្រាប់អ្នកកាសែតថា ពួកគេធ្វើបែបនេះមិនបានសុំការអនុញ្ញាតពីសាលារាជធានីភ្នំពេញ ក៏ដូចជាធ្វើលិខិតជូនដំណឹងនោះឡើយ គឺពួកគេមុខដដែលៗ ធ្វើតាមចិត្តនឹកឃើញ ។
ក្រុមស្ត្រីអ្នកតវ៉ាដីធ្លីនៅបឹងកក់ម្នាក់បានស្រែកតាមមេក្រូថា ការលក់ផ្កានៅថ្ងៃបុណ្យនៃក្តីស្រឡាញ់នាព្រឹកថ្ងៃសុក្រ ១៤ កុម្ភៈនេះ គឺដើម្បីយកថវិកាទៅឧបត្ថម្ភដល់ប្រជាពលរដ្ឋសហគមន៍បឹងកក់ ដែលរងទុក្ខវេទនាដោយសារការរំលោភយកដី និងបណ្តេញចេញដោយអយុត្តិធម៌រហូតដល់ថ្ងៃនេះ ។ ហើយផ្កាដែលលក់នេះមិនដាក់តម្លៃទេ ស្រេចតែបងប្អូនប្រជាពលរដ្ឋផ្តល់ការអាណិតអាសូរតាមទឹកចិត្តបុ៉ណ្ណោះ ។
លោកគឹម វុត្ថា ប្រធានសណ្តាប់ធ្នាប់ខណ្ឌដូនពេញនិយាយថា សាលារាជធានីភ្នំពេញមិនអនុញ្ញាតឱ្យក្រុមស្ត្រីអ្នកតវ៉ាដីធ្លីនៅបឹងកក់យកចិញ្ចើមផ្លូវសាលារាជធានីភ្នំពេញ តាំងផ្កាលក់បែបនេះឡើយ ព្រោះប៉ះពាល់សណ្តាប់ធ្នាប់ ជាពិសេសធ្វើឱ្យកកស្ទះចរាចរណ៍តែម្តង ។ ដូច្នេះសមត្ថកិច្ចបានសំណូមពរឱ្យគាត់ចាកចេញដោយសន្តិវិធីជាបន្ទាន់ទៅកន្លែងផ្សេងទៀត បើរឹងទទឹងនឹងចាត់វិធានការជាក់ស្តែង ។
ក្រោយពីស្តាប់ការណែនាំរបស់ប្រធានសណ្តាប់ធ្នាប់ខណ្ឌដូនពេញរួច ពួកគាត់ក៏នាំគ្នាដើរស្រែកលក់ផ្កាតាមផ្លូវលេខ៩៤ មុខស្ថានទូតអាមេរិក ឆ្ពោះទៅទិសខាងកើតដោយមានក្រុមអ្នកជិះរ៉ឺម៉កម៉ូតូតាមពីក្រោយ ដែលទំនងចាំជួយដឹកជញ្ជូនពេលណាហត់ ។ មន្ត្រីសាលាខណ្ឌដូនពេញនិយាយទៀតថា ក្រុមអ្នកតវ៉ាដីធ្លីនៅបឹងកក់ទាំងនេះមុខដដែលបង្កបញ្ហាដល់សមត្ថកិច្ចមិនចេះអស់នោះទេ ។ ជាក់ស្តែងថ្ងៃបុណ្យនៃក្តីស្រឡាញ់ថ្ងៃទី១៤ កុម្ភៈ មិនមែនជាថ្ងៃបុណ្យជនជាតិខ្មែរយើងឡើយ ហើយស្ត្រីខ្មែរមានតម្លៃខ្លាំងណាស់ ពោលគឺតម្លៃស្ត្រីខ្មែរមិនស្ថិតនៅលើផ្កាកុលាបមួយទងដែលបុរសប្រគល់ឱ្យនៅថ្ងៃទី១៤ កុម្ភៈ នោះទេ៕
ចែករំលែកព័តមាននេះ