ខេត្តកំពង់ចាម ៖ នៅទីបំផុតពិតជាឈាមស្រែកស្បែកហៅមែន ជនសង្ស័យជាឃាតករឈ្មោះ ហេង ម៉ារ៉ែន ភេទប្រុស អាយុ ៤២ឆ្នាំ មានតួនាទីជាវរសេនីយ៍ត្រី ឋានៈអនុប្រធានគណនេយ្យនៅស្នងការដ្ឋាននគរបាលខេត្តកំពង់ចាម ត្រូវបានចាប់ខ្លួននៅវេលាម៉ោង ១ និង ៣០នាទី រសៀលថ្ងៃទី១៤ កុម្ភៈ ២០១៤ ត្រង់ចំណុចស្រែសង្កែ ភូមិស្រែនន ឃុំកន្តួត ស្រុកចិត្របូរី ខេត្តក្រចេះ ជាប់សង្ស័យសម្លាប់បុរសពោះម៉ាយឈ្មោះ ធុច សាថាត អាយុ ៤៩ឆ្នាំ ដោយបានចាក់សាំងដុតទាំងរស់សម្លាប់ប្លន់យកខ្សែ.ក ទម្ងន់ ២តម្លឹង នាពេលកន្លងទៅថ្មីៗ ស្ថិតនៅភូមិទី៦ សង្កាត់វាលវង់ ក្រុងកំពង់ចាម។
លោកវរសេនីយ៍ទោ សាន សុភា នាយការិយាល័យព្រហ្មទណ្ឌកម្រិតធ្ងន់ខេត្ត បានប្រាប់ឲ្យដឹងថា ក្រោយពីមានហេតុការណ៍ចាក់សាំងដុតសម្លាប់មនុស្ស កាលពីវេលាម៉ោង ១១ និង ៣០នាទី យប់ថ្ងៃទី០៩ កុម្ភៈ រូបលោកបានចុះទៅដល់កន្លែងកើតហេតុ ជាមួយនិងកម្លាំងក្រោមឱវាទ សហការជាមួយនិងនគរបាលក្រុងកំពង់ចាម ដើម្បីតាមប្រមាញ់ជនសង្ស័យ។ ជាមួយនោះដែរ លោកឧត្តមសេនីយ៍ បែន រ័ត្ន ស្នងការនគរបាលខេត្ត ក៏ដូចជា លោកវរសេនីយ៍ឯក ជឹម សេងហុង ស្នងការរងនគរបាលខេត្ត ទទួលផែនព្រហ្មទណ្ឌ ឲ្យបើកកិច្ចប្រតិបត្តិការស្រាវជ្រាវក្តៅគគុក និងតាមរយៈសាក្សីរហូតស្គាល់អត្តសញ្ញាណជនសង្ស័យ ដែលបានចាក់សាំងដុតសម្លាប់មន្រ្តីធនាគារជាតិ សាខាខេត្តកំពង់ចាម។
រូបលោកទទួលដំណឹងថា ជនសង្ស័យបានរត់គេចទៅផ្ទះនៅរាជធានីភ្នំពេញ ក៏បានទៅតាមឃ្លាំមើលចំនួន ៣ថ្ងៃ តែមិនបានឃើញនៅផ្ទះនោះទេ ហើយនៅទីបំផុតដឹងថា បានបន្តរត់គេចទៅកាន់ខេត្តក្រចេះ។ ក្រោមកិច្ចសហការជាមួយនិងនគរបាលខេត្តក្រចេះ ជនសង្ស័យឈ្មោះ ហេង ម៉ារ៉ែន ត្រូវបានចាប់ខ្លួនតាមដីការបស់សាលាដំបូងខេត្ត រួចបានបញ្ជូនមកកាន់ស្នងការដ្ឋាននគរបាលខេត្ត ដើម្បីសួរនាំ។
សមត្ថកិច្ចបានប្រាប់ឲ្យដឹងថា នៅថ្ងៃទី០៧ កុម្ភៈ ឈ្មោះ ម៉ារ៉ែន បានសុំច្បាប់ឈប់សម្រាកថ្ងៃចុងសបា្តហ៍ ដើម្បីទៅលេងផ្ទះនៅភ្នំពេញ រហូតមកដល់ព្រឹកថ្ងៃចន្ទ បានទូរស័ព្ទមកសុំច្បាប់លោកប្រធានគណនេយ្យនៅស្នងការដ្ឋាននគរបាលខេត្ត។ ចាប់តាំងពីពេលដែលមានករណីប្លន់សម្លាប់បុរសពោះម៉ាយខាងលើ គេមិនដែលឃើញជនសង្ស័យមកកន្លែងធ្វើការនោះទេ គឺបាត់មុខរហូតតែម្តង ដោយគ្មាននរណាម្នាក់ដឹងទៅទីណានោះទេ។
នៅពេលមុនករណីសម្លាប់បុរសពោះម៉ាយខាងលើ ជនសង្ស័យរូបនេះ បានទៅរករឿងប្រពន្ធនៅផ្ទះឯរាជធានីភ្នំពេញ រកលុយ ហើយមានទឹកមុខខ្មៅខុសពីធម្មតា។ សូមបញ្ជាក់ថា នៅថ្ងៃទី១៣ កុម្ភៈ ជនសង្ស័យរូបនេះ បានទូរស័ព្ទទៅសួរកូនប្រុសសពបុរសពោះម៉ាយនៅស្រុកព្រៃឈរ ដោយធ្វើលេសសួរថា ឪពុករបស់ឯងទៅណាហើយ? គ្រាន់តែកូនប្រុសសពឆ្លើយតបថា ឪពុករបស់ខ្ញុំស្លាប់ហើយ ក៏បិទទូរស័ព្ទលែងទាក់ទងបាន។
គួររំលឹកថា បុរសពោះម៉ាយកូន២ ឈ្មោះ ធុច សាថាត អាយុ ៤៩ឆ្នាំ បម្រើការងារនៅធនាគារជាតិសាខាខេត្តកំពង់ចាម ត្រូវបានមិត្តភក្តិចាក់សាំងដុតទាំងរស់នៅក្នុងបន្ទប់ផ្ទះជួលមួយកន្លែងស្ថិតនៅភូមិទី៦ សង្កាត់វាលវង់ ក្រុងកំពង់ចាម បណ្តាលឲ្យរលាករលេះរលួយពេញខ្លួនប្រាណប្លន់យកខ្សែ.កមាស ១ខ្សែ ហើយរត់គេចខ្លួនបាត់ នៅវេលាម៉ោង ១១ និង ៣០នាទី យប់ថ្ងៃទី០៩ កុម្ភៈ បន្ទាប់មកបានស្លាប់ពេលបញ្ជូនទៅសង្រ្គោះនៅរាជធានីភ្នំពេញ។
តាមម្ចាស់ផ្ទះជួលឈ្មោះ កើត គឹមស៊្រី ភេទប្រុស អាយុ ៥២ឆ្នាំ បានប្រាប់ឲ្យដឹងថា នៅវេលាម៉ោងជាង ៧យប់ ថ្ងៃទីខាងលើ ត្រូវបានមិត្តភក្តិប្រុសរបស់អ្នករងគ្រោះបានទូរស័ព្ទហៅទៅផឹកស៊ីជាមួយនៅកន្លែងមួយក្នុងក្រុងកំពង់ចាម រហូតដល់វេលាម៉ោងជាង ៩យប់ បានត្រលប់មកវិញរួមទាំងមិត្តប្រុសម្នាក់អាយុប្រហាក់ប្រហែលគ្នាមកអង្គុយនិយាយលេងក្នុងបន្ទប់។ បុរសម្ចាស់ផ្ទះបន្តថា រូបលោកមិនបានស្គាល់មិត្តភក្តិរបស់អ្នករងគ្រោះជានរណាទេ គ្រាន់តែឃើញអង្គុយលេងរហូតដល់វេលាម៉ោង ១១ និង ៣០នាទីយប់ ស្រាប់តែប្រពន្ធរបស់លោក (គឹមស្រ៊ី ) បានឃើញភ្លើងឆេះចេញពីបន្ទប់លេខ៦ នៅជាន់ក្រោមនោះ និងបានឃើញបុរសដែលមកជាមួយបានរត់គេចខ្លួនចេញទៅខាងក្រៅផ្ទះបាត់។
ភ្លាមៗនោះ រូបលោកបានស្ទុះទៅយកបំពង់ពន្លត់អគ្គីភ័យ ១បំពង់ មកបាញ់ និងទាញទុយោទឹកនៅមុខផ្ទះមកបាញ់លើភ្លើង ក្នុងពេលដែលបាញ់ទឹករលត់ភ្លើង ស្រាប់តែឃើញបុរសរងគ្រោះដើរចេញពីបន្ទប់ទឹកមានស្នាមរបួសរលាកពេញខ្លួនប្រាណតែម្តង ចំណែកខ្សែ.កមាស ១ខ្សែ ពាក់នៅនឹង.កថ្មីៗ បានបាត់ ដូច្នេះ ពិតជាត្រូវមិត្តភក្តិមកជាមួយប្លន់យកទៅបាត់ហើយ។ សពបុរសពោះម៉ាយត្រូវបានយកទៅធ្វើបុណ្យនៅស្រុកកំណើតឯស្រុកព្រៃឈរ។
លោកវរសេនីយ៍ត្រី សំ ផាត អធិការនគរបាលក្រុងកំពង់ចាម បានប្រាប់ឲ្យដឹងថា នៅល្ងាចថ្ងៃទី១៤ កុម្ភៈ សមត្ថកិច្ចមិនទាន់បានសួរចម្លើយជនសង្ស័យនេះ នៅឡើយទេ និងបន្តសួរនៅព្រឹកស្អែក៕
ចែករំលែកព័តមាននេះ