រាជធានីភ្នំពេញ ៖ លោក តែ សំអាង ចៅក្រម នៃសាលាដំបូងរាជធានីភ្នំពេញ កាលពីព្រឹកថ្ងៃទី១២ កុម្ភៈ ២០១៤ បានប្រកាសសាលក្រម និងសម្រចលើកការចោទប្រកាន់ និងដោះលែងជនជាប់ចោទឈ្មោះ យិន ទូច ភេទប្រុស អាយុ ៣៥ឆ្នាំ មានមុខរបរជាកសិករ ដែលសាហាយស្មន់ជាមួយប្រពន្ធមន្រ្តីសាលាខេត្តក្រចេះ និងបានពង្រត់គ្នាទៅរួមរ័ក្សស្នេហាអស់រយៈពេល ២១ថ្ងៃ នៅក្នុងស្រុកអូររាំងឪ ខេត្តកំពង់ចាម ប្រព្រឹត្តកាលពីកំឡុងខែតុលា ឆ្នាំ២០១៣ នោះ ឲ្យមានសេរីភាព។
លោក តែ សំអាង បានអានសាលក្រមដោយបានបញ្ជាក់ថា ពុំមានពិរុទ្ធភាពចំពោះជនជាប់ចោទឈ្មោះ យិន ទូច ពីបទ ”កំហែងដោយមានបញ្ជាដោយដាក់លក្ខខណ្ឌអ្វីមួយ“ ដូចការចោទប្រកាន់របស់តំណាងអយ្យការនោះទេ។ ហេតុដូច្នេះ តុលាការសម្រេចលើកការចោទប្រកាន់ទៅលើឈ្មោះ យិន ទូច ភេទប្រុស អាយុ ៣៥ឆ្នាំ មុខរបរជាកសិករ ទីលំនៅស្នាក់នៅភូមិសូយ ឃុំមៀន ស្រុកអូររាំងឪ ខេត្តកំពង់ចាម ឲ្យរួចផុតពីការចោទប្រកាន់ខាងលើ និងសម្រេចដោះលែងគាត់ឲ្យមានសេរីភាពវិញចាប់ពីពេលនេះតទៅ។
តុលាការសម្រេចផ្តន្ទាទោសជនជាប់ចោទឈ្មោះ យិន ណៃភឿង ភេទស្រី អាយុ ៤៥ឆ្នាំ មុខរបរជាកសិករ ទីលំនៅស្នាក់នៅភូមិសូយ ឃុំមៀន ស្រុកអូររាំងឪ ខេត្តកំពង់ចាម ដាក់ពន្ធនាគាររយៈពេល ១ឆ្នាំ ប៉ុន្តែ ការអនុវត្តន៍ទោសនេះ ត្រូវព្យួរទាំងអស់ពីបទ «លួច»។ ឈ្មោះ យិន ទូច ត្រូវបានចោទប្រកាន់ពីតំណាងអយ្យការពីបទ «កំហែងដោយមានបញ្ជា ដោយដាក់លក្ខខណ្ឌអ្វីមួយ» តាមច្បាប់ព្រហ្មទណ្ឌ នៃព្រះរាជាណាចក្រកម្ពុជា។
ក្នុងសវនាការជាប់ពាក់ព័ន្ធនឹងករណីតាមញ៉ែបានសម្រេចអ្នកគ្រូបង្រៀនម្នាក់ឈ្មោះ ហេង វណ្ណដេត អាយុ ៤៥ឆ្នាំ ដែលជាប្រពន្ធរបស់មន្រ្តីសាលាខេត្តក្រចេះម្នាក់ តាមរយៈច្រឡំលេខទូរស័ព្ទរហូតដល់បានខ្លួនប្រាណស្រ្តីរងគ្រោះ គឺបានរួមភេទជាមួយជនរងគ្រោះជិត ១ខែ (២១ថ្ងៃ) និងបានពង្រត់ស្ត្រីវ័យ ៤៥ឆ្នាំ រូបនោះ ទៅរួមរ័ក្សមេត្រីអស់រយៈពេល ២១ថ្ងៃ ថែមទៀត នៅក្នុងស្រុកអូររាំងឪ ខេត្តកំពង់ចាម កាលថ្ងៃទី១១ តុលា ២០១៣។ ចំណែកឯឈ្មោះ យិន ណៃភឿង ត្រូវបានចោទប្រកាន់ពីបទ «លួចលុយរបស់ជនរងគ្រោះ»។
យោងតាមតុលាការ បានឲ្យដឹងថា នៅក្នុងការចុះចេញពីគ្រួសារនោះ ជនរងគ្រោះឈ្មោះ ហេង វណ្ណដេត ដែលមានប្តី និងកូនជាច្រើននាក់នៅក្នុងបន្ទុកនោះ បានវេចខ្ចប់យកលុយដុល្លារចំនួន ៣០០០០$ លុយខ្មែរ ចំនួន ១១លានរៀន និងគ្រឿងអលង្កាមានតម្លៃជាច្រើនទៀត ដោយមិនឲ្យកូន ឬប្តីបានដឹងឡើយ និងបានមករួមរស់ជាមួយ យិន ទូច នៅផ្ទះឈ្មោះ យិន ណៃភឿង ស្ថិតនៅដូចអាសយដ្ឋានខាងលើ។
ជនជាប់ចោទឈ្មោះ យិន ទូច ត្រូវបានចាប់ខ្លួនដោយសមត្ថកិច្ចនគរបាលព្រហ្មទណ្ឌ ក្រសួងមហាផ្ទៃ តាមពាក្យបណ្តឹងរបស់ឪពុកបង្កើតរបស់ជនរងគ្រោះ កាលពីថ្ងៃទី៣១ តុលា ២០១៣ ល្ងាច ខណៈពេលដែលគាត់កំពុងតែរួមរស់ជាមួយជនរងគ្រោះ។ ក្នុងហេតុការណ៍ឃាត់ខ្លួននោះ នៅពេលដែល យិន ទូច និង ហេង វណ្ណដេត ត្រូវបានសមត្ថកិច្ចនគរបាលប៉ុស្តិ៍រដ្ឋបាលឃុំមៀន បាននាំខ្លួនសាកសួរ ជនជាប់ចោទឈ្មោះ យិន ណៃភឿង បានលួចយកកេសដែក ដែលក្នុងនោះ មានលុយ ២៦០០០$ លុយខ្មែរ ១លាន ៥សែនរៀល និងគ្រឿងអលង្កាមួយចំនួនទៀតទៅលាក់ទុកនៅផ្ទះអ៊ុំរបស់គាត់នៅក្នុងភូមិ។
តែក្រោយមក ក៏បានយកមកប្រគល់ឲ្យជនរងគ្រោះវិញ បន្ទាប់ពីជនរងគ្រោះបានប្តឹងទៅសមត្ថកិច្ចនគរបាល។ ជនជាប់ចោទនៅពេលសវនាការកាលពីថ្ងៃទី០៥ មករា ២០១៤ កន្លងទៅ ឈ្មោះ យិន ទូច បានបដិសេធចំពោះការចោទប្រកាន់ពីសំណាក់តំណាងអយ្យការ ប៉ុន្តែ បានសារភាពថា ខ្លួនពិតមានទំនាក់យ៉ាងស្អិតរមួតជាមួយស្រ្តីឈ្មោះ ហេង វណ្ណដេត និងបានទាក់ទងតាមទូរស័ព្ទអស់រយៈពេលជាង ២ឆ្នាំ មុនបានខ្លួនប្រាណ និងសម្រេចមករួមរស់ជាមួយគ្នា កាលពីកំឡុងខែតុលា ២០១៣។
ជនជាប់ចោទឈ្មោះ យិន ទូច បាននិយាយក្នុងពេលសវនាការថា «មូលហេតុដែលខ្ញុំឧស្សាហ៍ទូរស័ព្ទទៅគាត់ ពីព្រោះតែគាត់ប្រាប់ខ្ញុំថា គាត់នៅលីវ និងមិនមានកូន ឬប្តីនោះទេ។ ដោយតែការជួបគ្នាតាមទូរស័ព្ទជាញឹកញាប់នោះ បានធ្វើឲ្យពួកយើងទាំង ២នាក់ បានចាប់ចិត្តស្រឡាញ់ ហើយរូបគាត់ក៏បានបាក់ចិត្តស្រឡាញ់រូបគាត់យ៉ាងងុបងល់ផងដែរ ទើបធ្វើឲ្យពួកយើងបានស្កាត់រកជួបមុខគ្នា និងស្គាល់មុខគ្នានៅក្នុងខេត្តក្រចេះ កាលពីឆ្នាំមុន។
ឈ្មោះ យិន ទូច បានបន្ថែមថា គាត់មិនបានបង្ខិតបង្ខំ ឬចាប់ពង្រត់ (ហេង វណ្ណដេត) ឲ្យមករស់នៅជាមួយខ្លួនដូចការចោទប្រកាន់នោះទេ គឺគាត់បានមករួមរស់ជាមួយដោយសេចក្តីសម្រេចចិត្តរបស់ ហេង វណ្ណដេត៕
ចែករំលែកព័តមាននេះ