រាជធានីភ្នំពេញ ៖ យុវជនម្នាក់រងរបួសធ្ងន់ ក្នុងអំពើបា.ញ់ប្រហារបំណងប្លន់យកម៉ូតូម៉ាកសេ១២៥ស៊េរីឆ្នាំ២០១៤ ពណ៌ខ្មៅ គ្មានស្លាកលេខមួយគ្រឿង នៅចំណុចផ្លូវបេតុងក្បែររបងសាលាបឋមសិក្សាដំបូកខ្ពស់ ស្ថិតក្នុងភូមិត្នោតជ្រុំទី២ សង្កាត់បឹងទំពុន ខណ្ឌមានជ័យ កាលពីវេលាម៉ោង៨និង៣០នាទីយប់ថ្ងៃទី១២ កុម្ភៈ ។
រាជធានីភ្នំពេញ ៖ យុវជនម្នាក់រងរបួសធ្ងន់ ក្នុងអំពើបាញ់ប្រហារបំណងប្លន់យកម៉ូតូម៉ាកសេ១២៥ស៊េរីឆ្នាំ២០១៤ ពណ៌ខ្មៅ គ្មានស្លាកលេខមួយគ្រឿង នៅចំណុចផ្លូវបេតុងក្បែររបងសាលាបឋមសិក្សាដំបូកខ្ពស់ ស្ថិតក្នុងភូមិត្នោតជ្រុំទី២ សង្កាត់បឹងទំពុន ខណ្ឌមានជ័យ កាលពីវេលាម៉ោង៨និង៣០នាទីយប់ថ្ងៃទី១២ កុម្ភៈ ។
តាមប្រភពព័ត៌មានពីកន្លែកើតហេតុបានឱ្យដឹងថា យុវជនរងគ្រោះក្នុងអំពើបាញ់ប្រហារខាងលើនេះឈ្មោះបេ រស្មី អាយុ២៧ឆ្នាំ មានទីលំនៅក្នុងសង្កាត់ទួលទំពូងទី១ ខណ្ឌចំការមន និងមានមុខរបរជាជាងជួសជុលទូរស័ព្ទនៅផ្សារឃ្លាំងរំសេវ ។ មុនជួបហេតុការណ៍ចោរប្លន់ប្រដាប់អាវុធនោះឈ្មោះបេ រស្មី បានទូរស័ព្ទណាត់គ្នាជាមួយសង្សារដែលមានទីលំនៅជិតកន្លែងកើតហេតុបំណងឌុបគ្នាដើរលំហែកាយខាងក្រៅ បន្ទាប់ពីទិញបានម៉ូតូថ្មីដើម្បីបង្អួតរាត្រីកាល ។ ពេលឈ្មោះបេ រស្មី ជិះម៉ូតូចេញពីលំនៅឋានរបស់ខ្លួន ឆ្ពោះទៅផ្ទះសង្សារ លុះមកដល់ចំណុចកើតហេតុ ស្រាប់តែមានក្រុមចោរប្លន់ប្រដាប់អាវុធ២នាក់ស្លៀកពាក់សីុវិល ជិះម៉ូតូម៉ាកនិច ពណ៌ស មិនចាំស្លាកលេខបានតាមកៀរឱ្យឈប់ហើយសំឡុតប្លន់យកម៉ូតូ ។ ប៉ុន្តែពេលនោះឈ្មោះបេ រស្មី ដោយស្រឡាញ់ម៉ូតូថ្មីលើសពីជីវិតខ្លួនឯងនោះមិនបានឱ្យម៉ូតូទៅក្រុមចោរតាមសម្រួលទេ ទើបកើតមានការប្រទូស្ដរ៉ាយគ្នាឡើង ជាហេតុធ្វើឱ្យក្រុមចោរប្លន់ដែលមានអាវុធជាប់ដៃបានបាញ់គំរាមចំនួន៣គ្រាប់ ផ្ទួនៗគ្នា ។
ការបាញ់ប្រហារដ៏ព្រៃផ្សៃនេះបណ្ដាលឱ្យគ្រាប់កាំភ្លើងមួយគ្រាប់ត្រូវចុងដោះខាងឆ្វេងហើយបេ រស្មី បានព្យាយាមរត់គេចចេញពីម៉ូតូរហូតដល់ដួលដេក ។ បន្ទាប់ពីក្រុមចោរប្លន់បាញ់ហើយនោះក៏បានយកម៉ូតូជិះគេចខ្លួនទៅបាត់ដោយសុវត្ថិភាព ។ រីឯជនរងគ្រោះត្រូវបានសមត្ថកិច្ចនគរបាលមូលដ្ឋាននិងប្រជាពលរដ្ឋនៅជិតកន្លែងកើតហេតុជួយដឹកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ។ គ្រូពេទ្យនៃមន្ទីរពេទ្យមិត្តភាពខ្មែរ-សូវៀតបានឱ្យដឹងថា បេ រស្មី បានរួចផុតពីគ្រោះថ្នាក់ដល់អាយុជីវិតហើយ បន្ទាប់ពីក្រុមគ្រូពេទ្យវះកាត់រួចរាល់ ។ ទោះបីជាយ៉ាងណាក៏ដោយក៏ឈ្មោះបេ រស្មី ចាំបាច់ត្រូវសម្រាកព្យាបាលរបួសនៅក្នុងមន្ទីរពេទ្យមួយរយៈដែរ ។ សូមរំឭកថា មួយរយៈនេះអំពើឆក់ប្លន់នៅក្នុងភូមិសាស្ត្រសង្កាត់បឹងទំពុន និងសង្កាត់ស្ទឹងមានជ័យ ដែលជាសង្កាត់ពីរមានព្រំប្រទល់ជាប់គ្នា និងមានភូមិសាស្ត្រស្មុគស្មាញជាងគេនៅក្នុងខណ្ឌមានជ័យ កើតមានបទល្មើសលួច ឆក់ ប្លន់ ញឹកញាប់គួរឱ្យកត់សម្គាល់បំផុតជាក់ស្ដែងដូចករណីខាងលើនេះជាដើម ដែលអាជ្ញាធរគួរតែពង្រឹងឱ្យខ្លាំងនូវសន្ដិសុខក្នុងតំបន់នោះ ។
ដូច្នេះដើម្បីរឹតបន្ដឹងសន្ដិសុខសណ្ដាប់ធ្នាប់សាធារណៈក្នុងតំបន់ឡើងវិញ មានតែសមត្ថកិច្ចនិងអាជ្ញាធរពាក់ព័ន្ធពង្រឹងការល្បាតពួនស្ទាក់តាមច្រកនានាក្នុងមូលដ្ឋានឱ្យបានជាប់ជាប្រចាំ គ្រប់ចំណុចឆ្ពោះឡើងមកផ្លូវធំ ទើបអាចលុបបំបាត់បាតុភាពដូចខាងលើបាន ទោះបីមិនអាចទប់ស្កាត់បាន១០០%ក្ដី ៕
ចែករំលែកព័តមាននេះ