រាជធានីភ្នំពេញ ៖ ក្រុមអ្នករស់នៅក្នុងប្លុកបុរីកីឡាប្រមាណជា១០០គ្រួសារ ដែលអះអាងថា កន្លងមកអាជ្ញាធរបានសន្យាខ្យល់ កាលពីថ្ងៃទី១២ កុម្ភៈ បាននាំគ្នារើអីវ៉ាន់ពីខាងក្រោមឡើងទៅនៅអគារទី៩ ដែលក្រុមហ៊ុនផានអីុមិុច សាងសង់មិនទាន់រួចរាល់ បើទោះបីមានការរារាំងពីសមត្ថកិច្ចយ៉ាងណាក្តី ។
រាជធានីភ្នំពេញ ៖ ក្រុមអ្នករស់នៅក្នុងប្លុកបុរីកីឡាប្រមាណជា១០០គ្រួសារ ដែលអះអាងថា កន្លងមកអាជ្ញាធរបានសន្យាខ្យល់ កាលពីថ្ងៃទី១២ កុម្ភៈ បាននាំគ្នារើអីវ៉ាន់ពីខាងក្រោមឡើងទៅនៅអគារទី៩ ដែលក្រុមហ៊ុនផានអីុមិុច សាងសង់មិនទាន់រួចរាល់ បើទោះបីមានការរារាំងពីសមត្ថកិច្ចយ៉ាងណាក្តី ។
សូមបញ្ជាក់ថា តាមគម្រោងវិនិយោគរបស់ក្រុមហ៊ុនផានអុីមុិច គឺសាងសង់អគារចំនួន១០សម្រាប់ផ្តល់ឱ្យអ្នកដែលរស់នៅក្នុងប្លុកបុរីកីឡា តែក្រុមហ៊ុនសាងសង់បានតែ៨អគារប៉ុណ្ណោះ ដោយសារថាក្រុមហ៊ុនគ្មានលទ្ធភាពបន្តធ្វើអគារ២ទៀតទេ ។ ដោយសារតែការតវ៉ារបស់អ្នកមិនទាន់ទទួលបានការស្នាក់នៅលើអគារទី៩ និងទី១០ នោះក៏តែងកើតមានរឿងរ៉ាវឈឺក្បាលមិនឈប់ឈររហូតមក ទើបមានការសាងសង់អគារទី៩មួយទៀត ប៉ុន្តែអគារទី៩នេះសាងសង់មិនទាន់ហើយនោះទេ ក៏ស្រាប់តែពួកគេនាំគ្នារៀបបង្វេចទៅចាប់នៅខ្លួនឯងតែម្តង ។ ក្រុមអ្នករស់នៅក្នុងប្លុកបុរីកីឡា ដែលខ្លះស្នាក់នៅទីនោះច្រើនឆ្នាំហើយ និយាយថាពួកគាត់មិនត្រូវបានអាជ្ញាធរប្រគល់ផ្ទះសង់ថ្មី ឱ្យបានស្នាក់នៅនោះទេ ផ្ទុយទៅវិញបានបោះបង់ពួកគាត់ចោលឱ្យរស់នៅតែលតោលក្រោមអគារដែលសាងសង់បានខ្លះមកនោះ ។ ដោយសារទ្រាំនឹងការលំបាកច្រើនឆ្នាំមកហើយ ទើបនៅព្រឹកថ្ងៃទី១២ កុម្ភៈ ពួកគាត់សម្រេចចិត្តវេចបង្វេចឡើងទៅនៅអគារលេខ៩ ជាន់ទី១ គឺចែកគ្នានៅតាមបន្ទប់រៀងៗខ្លួន ។
ខណៈពេលដែលក្រុមអ្នកស្នាក់នៅក្នុងប្លុកបុរីកីឡា សង្កាត់វាលវង់ ខណ្ឌ៧ មករា ធ្វើដូច្នេះ សមត្ថកិច្ច និងអាជ្ញាធរបានរារាំង និងហាមឃាត់តែពួកគាត់មិនស្តាប់ និងនាំគ្នាទៅស្នាក់នៅតាមបន្ទប់នីមួយៗ ទោះដេញយ៉ាងណាក៏មិនចេញដែរ ។ គួរបញ្ជាក់ថា អគារទី៩ នៅបុរីកីឡា ដែលក្រុមហ៊ុនផានអុីមិុច សាងសង់កន្លងមកនៅមិនទាន់រួចរាល់ជាស្ថាពរនៅឡើយទេ ពោលគឺគ្រាន់តែមានជាគ្រោង និងបន្ទប់ សូម្បីឥដ្ឋការ៉ូក៏មិនទាន់បានក្រាលផង ។ ក្រុមអ្នករស់នៅក្នុងប្លុកបុរីកីឡាប្រមាណជា១០០គ្រួសារ បានឡើងទៅបោសសម្អាតក្រាលកន្ទេលដេក ដោយពួកគាត់និយាយថា ប្រសើរជាងអត់កន្លែងស្នាក់នៅ ។ បន្ទាប់ពីក្រុមអ្នកបុរីកីឡាឡើងទៅស្នាក់នៅលើអគារដែលសង់មិនទាន់រួចដូច្នេះ អាជ្ញាធរខណ្ឌនិងប្រជាពលរដ្ឋទាំងនោះ ត្រូវបានសាលារាជធានីភ្នំពេញហៅទៅដោះស្រាយនៅថ្ងៃទី១៣ កុម្ភៈ ។
តំណាងសហគមន៍ប្រជាបុរីកីឡា៥នាក់ រួមជាមួយលោកអភិបាលរងខណ្ឌ៧មករា មួយរូបបានចូលជួបលោក ប៉ា សុជាតិវង្ស អភិបាលរាជធានីភ្នំពេញ តាមការកំណត់នៅព្រឹកថ្ងៃទី១៣ កុម្ភៈ នេះ ។ ប៉ុន្តែក្នុងនោះ គេឃើញអ្នកដែលទៅគាំទ្រតំណាងរបស់ពួកគេប្រមាណពី៤០ទៅ៦០នាក់ជិះរឺុម៉កម៉ូតូ៦គ្រឿង ដើម្បីជាការជួយលើកទឹកចិត្ត ។
រយៈពេលជាច្រើនម៉ោង ក្នុងការជួបជុំរកដំណោះស្រាយនោះ ត្រូវបានប្រភពឱ្យដឹងថា លោកអភិបាលរាជធានីបានជម្រាបជូនទៅតំណាងសហគមន៍ឱ្យស្រង់ស្ថិតិអ្នកដែលគ្មានជម្រកស្នាក់នៅឱ្យបានច្បាស់លាស់ ។ បន្ទាប់មកលោកអភិបាលបានកំណត់ ៖
១-តើប៉ុន្មាននាក់ដែលចង់ស្នាក់នៅបណ្តោះអាសន្ន ?
២-តើប៉ុន្មាននាក់ចង់ស្នាក់នៅរហូត ?
វិធានការដែលលោកអភិបាលរាជធានីមានអនុសាសន៍ត្រូវបានតំណាងអ្នករស់នៅបុរីកីឡាប្រមាណជាង១០០គ្រួសារ ទទួលយកទៅពិភាក្សាគ្នា តែមិនទាន់សម្រេចជាផ្លូវការនៅឡើយទេ ។
អ្នកអត់ផ្ទះស្នាក់នៅ ក្នុងអតីតបុរីកីឡា និយាយដោយកត់សម្គាល់ថា ការសន្យាដូចនេះមានមកច្រើនដងហើយ ពួកគាត់មិនសូវមានជំនឿទេ ។ គួរបញ្ជាក់ថា អ្នករស់នៅបុរីកីឡាដែលអះអាងថា នៅប្រមាណជាង១០០គ្រួសារ មិនទាន់មានទីជម្រកឱ្យបានសមរម្យទេ តាំងតែពីមានការឈូសឆាយតំបន់នោះកាលពីឆ្នាំកន្លង ទៅ ។ ពួកគេប្រមាណជា១០០គ្រួសារនោះ ខ្លះសុំស្នាក់នៅក្នុងអគារថ្មី ខ្លះសង់រោងនៅជាប់របងដីទំនេររបស់ក្រុមហ៊ុនផានអុីមុិច ដោយរង់ចាំដំណោះស្រាយពីសាលារាជធានីភ្នំពេញ ដែលថានឹងសង់អគារថ្មីឱ្យពួកគេស្នាក់នៅ និងមានទីជម្រកត្រឹមត្រូវ ។ អ្វីដែលបានធ្វើឱ្យអ្នកបុរីកីឡារំជើបរំជួល ហើយនាំគ្នាវេចបង្វេចឡើងទៅស្នាក់នៅលើអគារថ្មីដែលសង់មិនទាន់រួចនោះ ដោយសារមានការប្រកាសជូនបងប្អូនថា អាជ្ញាធរនឹងរៀបចំអគារឱ្យបងប្អូនស្នាក់នៅបណ្តោះអាសន្នសិន ទម្រាំរកដំណោះស្រាយឱ្យបានច្បាស់លាស់ ។
ការសង់អគារបណ្តោះអាសន្ននេះ ដំបូងគ្រោងថា១បន្ទប់ទំហំ៤ម៉ែត្រx៦ម៉ែត្រ ប៉ុន្តែលុះពេលរៀបចំសង់ បែរជាចេញទៅទំហំ៣ម៉ែត្រx៤ម៉ែត្រទៅវិញ ដូច្នេះហើយដែលធ្វើឱ្យមានប្រតិកម្មពីសំណាក់អ្នករង់ចំា ដែលម្នាក់ៗស្រែកថាអ្នកណារស់នៅកើតទៅ ? ទីបញ្ចប់ពួកគាត់បាននាំគ្នាវេចបង្វេចឡើងទៅនៅអគារដែលសង់មិនទាន់ហើយនោះតែម្តង ទោះបីជាត្រូវដំបងសមត្ថកិច្ចខ្លះក៏ដោយ ក៏ពួកគាត់ត្រូវតែធ្វើបែបនេះដែរ ដែលជាជម្រើសចុងក្រោយ ៕
ចែករំលែកព័តមាននេះ