ខេត្តប៉ៃលិន ៖ ពលករខ្មែរឆ្លងដែនខុសច្បាប់ចំនួន ៤នាក់ ត្រូវទាហានឈុតខ្មៅថៃ ចាប់បញ្ជូនមកកម្ពុជាវិញតាមច្រកទ្វារអន្តរជាតិព្រំ ខណៈដែលពួកគេបានចាញ់បោកមេខ្យល់ដោយនាំប្តីប្រពន្ធទាំងនោះ បម្រុងទៅរកការងារធ្វើនៅស្រុកថៃ ក៏ត្រូវចាប់ឃាត់ខ្លួនតែម្តង។ ចំណែកមេខុ្យល់ក្រោយពីដឹងខ្លួនទាន់ពេល ក៏ដាក់មេប្រូចរត់បន្តទៅស្រុកថៃបាត់ ដែលហេតុការណ៍ចាប់ឃាត់ខ្លួនពលករខ្មែរនេះ បានកើតឡើងកាលពីវេលាម៉ោង ៧ និង ១០នាទី យប់ថ្ងៃទី១១ កុម្ភៈ ២០១៤ នៅចំណុចស្រុកពោងណាំរ៉ន ខេត្តចាន់បូរី ប្រទេសថៃ។
ពលករឆ្លងដែនខុសច្បាប់ទាំងអស់មាន ទី១. ឈ្មោះ ថា វ៉ាន់ ភេទប្រុស អាយុ ៣១ឆ្នាំ ជាកសិករ និងជាប្តី ទី២. ឈ្មោះ អ៊ុក ហ៊ីម អាយុ ៣៨ឆ្នាំ ជាប្រពន្ធ មានកូនឈ្មោះ រឿន រ័ត្ន ភេទប្រុស អាយុ ១២ឆ្នាំ និងកូនស្រីឈ្មោះ រឿន រតនា អាយុ ៦ឆ្នាំ ទី៣. ឈ្មោះ ព័ន្ធ សាវ ភេទប្រុស អាយុ ៥០ឆ្នាំ ជាកសិករ មានប្រពន្ធឈ្មោះ តែង ធី អាយុ ៤៥ឆ្នាំ និងកូនស្រីម្នាក់ អាយុ ៦ឆ្នាំ ពួកគេមានស្រុកកំណើតរស់នៅភូមិសាំងតាគង់ ឃុំនិទាន ស្រុកបសេដ្ឋ ខេត្តកំពង់ស្ពឺ។
ប្រភពព័ត៌មានពីពលករឆ្លងដែនខុសច្បាប់ម្នាក់ឈ្មោះ ថា វ៉ាន់ បានរៀបរាប់ឲ្យដឹងថា បន្ទាប់ពីរួចការងារស្រែចម្ការ ពួកគាត់ក៏នាំគ្នាជិះរថយន្តឈ្នួលធ្វើដំណើរមកខេត្តប៉ៃលិន កាលពីថ្ងៃទី១០ កុម្ភៈ មកដល់ភូមិផ្សារព្រំ ឃុំស្ទឹងកាច់ ស្រុកសាលាក្រៅ ហើយក៏សម្រាកនៅទីនោះ ១យប់ ទើបឃើញមានស្រ្តីមិនស្គាល់អត្តសញ្ញាណម្នាក់បានបបួលពួកគាត់ទៅរកស៊ីធ្វើការងារនៅស្រុកថៃ។
លុះដល់ពួកគេធ្វើដំណើរដល់កន្លែងចតរថយន្តមួយនៅក្នុងប្រទេសថៃ មានតម្រួតចូលមកសួរនាំ ហើយពួកគេមិនចេះភាសាថៃ ព្រមទាំងអត់មានលិខិតឆ្លងដែន ក៏ត្រូវទាហានឈុតខ្មៅរបស់ថៃ ចាប់បញ្ជូនតាមច្រកព្រំដែនចូលមកស្រុកខ្មែរវិញ។
ចំណែក លោកវរសេនីយ៍ត្រី អេង ភាវ នាយការិយាល័យប្រឆាំងការជួញដូរមនុស្ស និងការពារអនីតិជន បានរៀបរាប់ឲ្យដឹងថា មន្រ្តីទំនាក់ទំនងព្រំដែនបានដឹកពលករចំណាកស្រុកខុសច្បាប់យកមកស្នងការនគរបាលខេត្ត ដើម្បីប្រគល់ជូនដល់ខាងការិយាល័យរបស់លោកធ្វើការអប់រំណែនាំ រួចនៅព្រឹកថ្ងៃទី១២ កុម្ភៈ ២០១៤ ខាងលោកក៏បានអនុញ្ញាតិឲ្យពួកគេរៀបចំយកសម្លៀកបំពាក់ និងរបស់របរត្រលប់ទៅស្រុកកំណើតវិញ។
តែដោយពួកគេអត់មានប្រាក់គ្រប់គ្រាន់ទើបនាំគ្នារករថយន្តជិះទៅសាសាលាខេត្តបាត់ដំបង ដើម្បីរកការងារធ្វើនៅទីនោះ។ លោក អេង ភាវ បន្តទៀតថា មុននឹងអនុញ្ញាតិឲ្យត្រលប់ទៅផ្ទះវិញ ខាងលោកក៏បានធ្វើការអប់រំណែនាំផងដែរ៕
ចែករំលែកព័តមាននេះ