ខេត្តស្វាយរៀង ៖ ប្រជាពលរដ្ឋជាង១០០គ្រួសារ រស់នៅភូមិគោកតែក និងភូមិចន្ទ្រា ឃុំចន្ទ្រា ស្រុកចន្ទ្រា បានខឹងសម្បាយ៉ាងខ្លាំង និងសុំឱ្យអ្នកសារព័ត៌មានជួយផ្សព្វផ្សាយ ដោយពួកគាត់ចោទថា មានប៉ូលិស ទាហាន វរកាពារព្រំដែនព្រមទាំងអាជ្ញាធរឃុំចន្ទ្រា គាបសង្កត់ និងទារយកប្រាក់ពីប្រជាពលរដ្ឋដែលធ្វើស្រែប្រាំងតាមបណ្តោយព្រំដែនកម្ពុជា-វៀតណាម ក្នុង១ហិកតាចំនួន៤០ដុល្លារ និងសូមឱ្យលោកអភិបាលខេត្ត មេត្តាជួយដោះស្រាយករណីនេះ ។
បើតាមតំណាងប្រជាពលរដ្ឋម្នាក់សុំមិនបញ្ចេញឈ្មោះប្រាប់ឱ្យដឹងថា ប្រជាពលរដ្ឋរស់នៅភូមិគោកតែក និងភូមិចន្ទ្រាដែលមានដីស្រែជិតព្រំដែន បានធ្វើស្រែប្រាំងប្រមាណជា១.០០០ហិកតា ដោយសុំបូមទឹកប្រឡាយពីប្រទេសវៀតណាម ហើយភាគីវៀតណាមគេពុំដែលទារយកប្រាក់ទេ ។ ប៉ុន្តែសមត្ថកិច្ចនគរបាលការពារព្រំដែន ទាហានវរការពារព្រំដែន និងអាជ្ញាធរឃុំចន្ទ្រា បានមកទារប្រាក់ពីប្រជាពលរដ្ឋយ៉ាងតឹងរុឹងបំផុត ដោយតម្រូវឱ្យប្រជាពលរដ្ឋបង់ប្រាក់ឱ្យពួកគេទាំង៣ស្ថាប័នខាងលើ សរុបក្នុង១ហិកតា៤០ដុល្លារ សរុបទាំងអស់១.០០០ហិកតា គឺត្រូវបង់៤មុឺនដុល្លារ ។ ករណីនេះបានកើតឡើងអស់រយៈពេល១សប្តាហ៍មកហើយ គិតរហូតមកដល់ថ្ងៃទី១១ កុម្ភៈ ។
ប្រភពដដែលបន្តទៀតថា ក្នុងនោះប៉ូលិសការពារព្រំដែនយក១ហិកតា២៥ដុល្លារ យោធាវរការពារព្រំដែនយក១ហិកតា១០ដុល្លារ ចំណែកលោកមេឃុំចន្ទ្រាយក១ហិកតា៥ដុល្លារ ។ ឯពួកគាត់ធ្វើស្រែប្រាំងចំណាយដើមទុនអស់ជាច្រើនទៅលើពូជ ជី ទឹក និងថ្នាំកសិកម្ម ពិសេសអ្នកបច្ចេកទេសថែទាំ ក្នុង១គ្រួសារៗធ្វើស្រែ១ហិកតាទៅ២ហិកតាប៉ុណ្ណោះ គ្រាន់បានផ្គត់ផ្គង់ជីវភាព និងមានប្រាក់ចំណូលសម្រាប់គ្រួសារ ។ ចំណែកអ្នកខ្លះពេលចុងរដូវ ប្រាក់ក៏ចង់អស់ បណ្តាលឱ្យខ្វះប្រាក់សម្រាប់ច្រូតកាត់ និងផ្គត់ផ្គង់ជីវភាពទៀតផង ស្រាប់តែមានគេនាំគ្នាមកជំរិតទារប្រាក់ក្នុង១ហិកតា៤០ដុល្លារយ៉ាងស្រួលទៅ វិញ ។ ចំពោះប្រជាពលរដ្ឋបានច្រូតកាត់ផលស្រូវ រួចដឹកយកទៅលក់ដើម្បីយកប្រាក់សងថ្លៃពូជស្រូវ ជី ថ្នាំកសិកម្ម ថ្លៃច្រូតបោកបែន ក៏ត្រូវសមត្ថកិច្ចនគរបាលវរការពារព្រំដែនប៉ុស្តិ៍ចន្ទ្រា ទារលុយក្នុង១គោយន្ត១សែនដុង រថយន្តកែច្នៃ១គ្រឿង១៥មុឺនដុងទៀត ។ តើការជំរិតទារប្រាក់នេះ យកទៅកសាងហេដ្ឋារចនាសម្ព័ន្ធ ឬយកទៅដាក់ហោប៉ៅ ?
ប្រជាពលរដ្ឋបានសំណូមពរទៅរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ មេត្តាជួយអន្តរាគមន៍ដល់គណៈកម្មាធិការកំណែទម្រង់ថ្នាក់ជាតិ មេត្តាអញ្ជើញចុះមកជួបប្រជាពលរដ្ឋរងគ្រោះនៅឃុំចន្ទ្រា ស្រុកចន្ទ្រា ដើម្បីឱ្យទទួលបានយុត្តិធម៌ផង កុំឱ្យជនឆ្លៀតឱកាស និងមន្ត្រីខិលខូចធ្វើព្យុះធ្វើភ្លៀង រកមានបានលើទឹកភ្នែកអ្នកស្រែ នៅជនបទ ។ ទាក់ទិននឹងការចោទប្រកាន់នេះ យើងពុំអាចរកការបំភ្លឺពីស្ថាប័នទាំង៣ខាងលើបាននៅឡើយទេ ។
លោក ជា យឿង អភិបាលស្រុកចន្ទ្រា បានមានប្រសាសន៍តាមទូរស័ព្ទនៅថ្ងៃទី១២ កុម្ភៈ វេលាម៉ោង១០ព្រឹកថា រូបលោកពុំបានដឹងរឿងនេះទេ ហើយលោកនឹងចុះទៅពិនិត្យស្រាវជ្រាវករណីចោទប្រកាន់ខាងលើតើវាជាការពិតឬបែបណា ព្រោះនេះជាទង្វើប៉ះពាល់ដល់គោលនយោបាយរបស់រាជរដ្ឋាភិបាលធ្ងន់ធ្ងរណាស់ ដែលតែងលើកឡើងថារដ្ឋមិនយកពន្ធលើដីស្រែពីកសិករនោះ ៕
ចែករំលែកព័តមាននេះ