ខេត្តតាកែវ ៖ ជនរងគ្រោះជាម្ចាស់រថយន្ដកាមរីបាឡែនបានរងរបួសយ៉ាងធ្ងន់ ត្រូវបានរថយន្ដសង្គ្រោះនៃស្នងការដ្ឋាននគរបាលខេត្ដដឹកទៅព្យាបាលនៅមន្ទីរពេទ្យបង្អែកខេត្ដ ខណៈដែលបុរសរងគ្រោះជាអ្នករត់តាក់ស៊ីត្រូវពួកចោរមានគ្នាចំនួន៣នាក់ បានធ្វើសកម្មភាពបា.ញ់ប្លន់យករថយន្ដ ហើយជិះគេចខ្លួនបាត់ ។
ខេត្តតាកែវ ៖ ជនរងគ្រោះជាម្ចាស់រថយន្ដកាមរីបាឡែនបានរងរបួសយ៉ាងធ្ងន់ ត្រូវបានរថយន្ដសង្គ្រោះនៃស្នងការដ្ឋាននគរបាលខេត្ដដឹកទៅព្យាបាលនៅមន្ទីរពេទ្យបង្អែកខេត្ដ ខណៈដែលបុរសរងគ្រោះជាអ្នករត់តាក់ស៊ីត្រូវពួកចោរមានគ្នាចំនួន៣នាក់ បានធ្វើសកម្មភាពបាញ់ប្លន់យករថយន្ដ ហើយជិះគេចខ្លួនបាត់ ។ ចំណែកសមត្ថកិច្ចបានត្រឹមតែតាមប្រមាញ់ និងទប់ស្កាត់នៅគ្រប់ច្រកល្ហក តែមិនប្រទះឃើញស្រមោលរថយន្ដទេ ។
ហេតុការណ៍ចោរប្លន់រថយន្ដនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១១ កុម្ភៈ ស្ថិតក្នុងភូមិប្រាំបីមុំ ឃុំប្រាំបីមុំ ស្រុកទ្រាំង ។ លោក ប៉ិច វណ្ណា អធិការរងនគរបាលស្រុកទ្រាំងបានឱ្យដឹងថា អ្នករត់តាក់ស៊ីប្រភេទរថយន្ដទំនើបដែលចោរបាញ់ប្លន់យកទៅបាត់នោះឈ្មោះ ទេព ផល្លី ភេទប្រុស អាយុ ៤៨ឆ្នាំ រស់នៅភូមិសុវណ្ណសាគរ សង្កាត់កំពង់កណ្ដាល ក្រុងកំពត ខេត្ដកំពត ត្រូវចោរបាញ់ចំថ្គាមខាងស្ដាំ១គ្រាប់ រងរបួសធ្ងន់ ហើយត្រូវបានរថយន្ដសង្គ្រោះរបស់ស្នងការដ្ឋាននគរបាលខេត្ដដឹកទៅព្យាបាលនៅមន្ទីរពេទ្យបង្អែកខេត្ដ ។ ចំណែករថយន្ដត្រូវក្រុមចោរប្លន់យក រួចជិះគេចខ្លួនបាត់ស្រមោល ។ លោកអធិការរងស្រុកបន្ដថា រថយន្ដដែលចោរប្លន់ម៉ាកកាមរីបាឡែន ពណ៌ស្ករ ពាក់ស្លាកលេខ បាត់ដំបង2A-8562 ចំណែកក្រុមចោរមានគ្នា៣នាក់ ។ លោកបន្តថា មុនពេលកើតហេតុ ក្រុមចោរបានទូរស័ព្ទហៅរថយន្ដតាក់ស៊ីរបស់ជនរងគ្រោះដែលកំពុងចតនៅចំណតផ្សារដើមគ ឱ្យទៅយកពួកគេនៅមាត់ទន្លេមុខព្រះបរមរាជវាំង ដើម្បីឱ្យជូនពួកគេទៅលេងកាស៊ីណូនៅច្រកទ្វារអន្ដរជាតិភ្នំដិន ស្រុកគិរីវង់។នៅពេលធ្វើដំណើរតាមបណ្ដោយផ្លូវជាតិលេខ២ ដល់ចំណុចគីឡូម៉ែត្រលេខ៩៤និងលេខ៩៥ ក្រុមចោរប្លន់បានឱ្យរថយន្ដឈប់ រួចដកកាំភ្លើងខ្លីមិនស្គាល់ម៉ាកបាញ់អ្នកបើកបរ១គ្រាប់ចំថ្គាមខាងស្តាំ បណ្ដាលឱ្យរបួស រួចធាក់ជនរងគ្រោះទម្លាក់ដី ហើយបើកគេចខ្លួនទៅទិសខាងលិចបាត់ស្រមោល ។
នៅមន្ទីរពេទ្យបង្អែកខេត្ដ លោក ទេព ផល្លី ម្ចាស់រថយន្ដបាឡែនដែលចោរប្លន់យកទៅបាត់និយាយថា គាត់មានមុខរបររត់តាក់ស៊ីរាប់ឆ្នាំមកហើយ ដោយដឹកមនុស្សពីខេត្ដកំពតមកភ្នំពេញ និងពីភ្នំពេញទៅខេត្ដកំពត ។ មុនពេលកើតេហតុ គាត់កំពុងចាប់ម៉ូយនៅចំណតរថយន្ដផ្សារដើមគ ក្រុមចោរបានទូរស័ព្ទមកឱ្យគាត់ទៅយកពួកគេនៅមុខព្រះបរមរាជវាំងសួនច្បារមាត់ទន្លេ ។ នៅពេលគាត់បើករថយន្ដទៅដល់ ពួកគេបានឱ្យជូនទៅលេងកាស៊ីណូនៅច្រកទ្វារអន្ដរជាតិភ្នំដិន ស្រុកគិរីវង់ ខេត្ដតាកែវ ។ ពេលនោះ គាត់ប្រាប់ថា យកតម្លៃ១០០ដុល្លារ តែពួកគេបានធ្វើជាតថ្លៃឱ្យ៦០ដុល្លារ ហើយគាត់ក៏យល់ព្រមជូនពួកគេទៅ ។ នៅពេលធ្វើដំណើរតាមបណ្ដោយផ្លូវជាតិលេខ២ ពួកគេតែងតែសួរនាំពីនេះពីនោះមិនចេះចប់ លុះនៅពេលមកដល់ចំណុចកើតហេតុ ជាទីវាលឆ្ងាយពីផ្ទះអ្នកភូមិ ពួកគេបានឱ្យគាត់ឈប់រថយន្តដោយប្រាប់ថា ចុះបត់ជើង គ្រាន់តែរថយន្តឈប់ភ្លាម ពួកគេបានដកកាំភ្លើងខ្លីបាញ់១គ្រាប់បណ្តាលឱ្យគាត់ត្រូវរបួស រួចធាក់គាត់ទម្លាក់ពីរថយន្ត ហើយបើកគេចខ្លួនទៅទិសខាងលិចបាត់ ពេលនោះគាត់បានខំប្រវេប្រវាងើបដើរមករាយការណ៍ទៅសមត្ថកិច្ចបុ៉ស្តិ៍រដ្ឋបាលឃុំប្រាំបីមុំ ដែលនៅក្បែរនោះ រួចក៏មានការឆោឡោឡើង តែរកមិនឃើញសោះ ។
លោកឧត្តមសេនីយ៍ត្រី អុ៊ក សំណាង ស្នងការនគរបាលខេត្ដឱ្យដឹងថា ក្រុមចោរក្រោយពីប្លន់បានរថយន្តហើយក៏បើកទៅទិសខាងលិច និងដោះស្លាកលេខរថយន្តចោល រួចក៏បើកមកទិសខាងជើងសំដៅចូលទៅរាជធានីភ្នំពេញវិញ ។
ទោះបីជាបែបណា តាមការស្រាវជ្រាវរបស់ប៉ូលិសជំនាញកំណត់មុខសញ្ញាបានហើយ និងកំពុងតែស្វែងរកចាប់ខ្លួនយកមកផ្តន្ទាទោសទៅតាមច្បាប់ ៕
ចែករំលែកព័តមាននេះ