គណៈកម្មាធិការបោះឆ្នោតថៃបានសម្រេចកាលពីថ្ងៃទី១១ កុម្ភៈ រៀបចំធ្វើការបោះឆ្នោតជាថ្មីនាដំណាច់ខែមេសា ក្នុងបណ្តាការិយាល័យបោះឆ្នោតដែលត្រូវរាំងខ្ទប់ក្នុងការបោះឆ្នោតមុនពេលកំណត់ថ្ងៃទី២៦ មករា និងក្នុងថ្ងៃបោះឆ្នោតទូទៅនាថ្ងៃទី២ កុម្ភៈ ។កាសែតថៃ THE NATION រាយការណ៍ថា ការបោះឆ្នោតថ្មីត្រូវបានកំណត់ធ្វើនាថ្ងៃទី២០ មេសា ខណៈការបោះឆ្នោតថ្មីសម្រាប់បណ្តាការិយាល័យបោះឆ្នោតដែលត្រូវរាំងខ្ទប់ក្នុងពេលបោះឆ្នោតថ្ងៃទី២ កុម្ភៈ នឹងត្រូវរៀបចំជាថ្មីនាថ្ងៃទី២៧ មេសា ។
លោកអាប់ភីស៊ីត វេចាជីវ៉ា មេដឹកនាំរបស់គណបក្សប្រជាធិបតេយ្យដែលធ្វើពហិការការបោះឆ្នោតថ្ងៃទី២ កុម្ភៈ ថ្លែងនាថ្ងៃទី១១ កុម្ភៈថា នាយករដ្ឋមន្ត្រីថៃលោកស្រីយីងឡាក់ ស៊ីណាវ៉ាត្រា ត្រូវទទួលស្គាល់បរាជ័យនៃការបោះឆ្នោតទូទៅ ហើយត្រូវលុបចោលការបោះឆ្នោតថ្មី ។ ប្រធានគណៈកម្មាធិការបោះឆ្នោតថៃលោកស៊ូប៉ាឆៃ សោមចារើុន ណែនាំថា រដ្ឋាភិបាលចាំផ្ទះត្រូវចេញក្រិត្យមួយដើម្បីឱ្យការបោះឆ្នោតថ្មីអាចរៀបចំធ្វើក្នុងមណ្ឌលបោះឆ្នោត២៨ ដែលពុំមានបេក្ខជនណាមួយចុះឈ្មោះ ។ លោកបន្តថា ប្រសិនបើរដ្ឋាភិបាលបដិសេធសំណើនោះគណៈកម្មាធិការបោះឆ្នោតនឹងស្នើដល់តុលាការធម្មនុញ្ញឱ្យសម្រេចថា តើត្រូវដោះស្រាយបញ្ហាបែបណា។
ការស៊ូប៉ាឆៃ បន្តថា គណៈកម្មាធិការបោះឆ្នោតនឹងមិនរៀបចំការបោះឆ្នោតថ្មីក្នុងបណ្តាតំបន់ដែលនៅតែមានការគំរាមកំហែងដោយអំពើហិង្សា និងការរំលោភបំពានច្បាប់ឡើយ ព្រោះពុំចង់ឱ្យមានការចាយវាយប្រាក់ខ្ជះខ្ជាយ និងខាតពេលវេលាឥតប្រយោជន៍ ។
ទន្ទឹមនឹងនេះ រដ្ឋាភិបាលចាំផ្ទះថៃបានអនុម័តកាលពីថ្ងៃទី១១ កុម្ភៈ នូវគម្រោងក្រិត្យមួយដែលគ្រោងកំណត់យកថ្ងៃទី៣០ មីនា ជាថ្ងៃបោះឆ្នោតព្រឹទ្ធសភាដូចការស្នើរបស់គណៈកម្មាធិការបោះឆ្នោត ។
លោកស្រីស៊ូនីសា ឡឺតប៉ាកាវ៉ាត អ្នកនាំពាក្យរងរបស់រដ្ឋាភិបាល ដកស្រង់សម្តីដោយកាសែតបាងកកប៉ុស្តិ៍ឱ្យដឹងថា ការចុះឈ្មោះបេក្ខជនព្រឹទ្ធសភានឹងប្រព្រឹត្តទៅពីថ្ងៃទី៤ ទៅទី៨ មីនា ។ គម្រោងរាជក្រិត្យនេះនឹងដាក់ថ្វាយព្រះមហាក្សត្រទ្រង់ឡាយព្រះហត្ថលេខា ។ ការបោះឆ្នោតនោះសំដៅជ្រើសរើសព្រឹទ្ធសមាជិកថ្មី ខណៈអាណត្តិព្រឹទ្ធសភារយៈពេល៦ឆ្នាំត្រូវផុតថ្ងៃទី៣១ មីនា ។ ព្រឹទ្ធសភាថៃមានកៅអីសរុប១៥០កៅអី៕
ចែករំលែកព័តមាននេះ