អវត្តមានរយៈពេលជាង១ឆ្នាំក្នុងចលនាអូឡាំពិករបស់ឥណ្ឌាត្រូវបានបញ្ចប់ហើយកាលពីថ្ងៃអង្គារសប្តាហ៍នេះ ខណៈគណៈកម្មាធិការអូឡាំពិកអន្តរជាតិ (IOC) បានលើកលែងបម្រាម១៤ខែលើសមាគមអូឡាំពិកឥណ្ឌា (IOA) ។ សេចក្តីសម្រេចនេះបានកើតមានបន្ទាប់ពីសមាជិកអង្កេតការណ៍របស់ IOC ៣រូបដែលបានមកចូលរួមអង្កេតការបោះឆ្នោតជ្រើសរើសប្រធាន IOA សម្តែងក្តីសាទរ
អវត្តមានរយៈពេលជាង១ឆ្នាំក្នុងចលនាអូឡាំពិករបស់ឥណ្ឌាត្រូវបានបញ្ចប់ហើយកាលពីថ្ងៃអង្គារសប្តាហ៍នេះ ខណៈគណៈកម្មាធិការអូឡាំពិកអន្តរជាតិ (IOC) បានលើកលែងបម្រាម១៤ខែលើសមាគមអូឡាំពិកឥណ្ឌា (IOA) ។ សេចក្តីសម្រេចនេះបានកើតមានបន្ទាប់ពីសមាជិកអង្កេតការណ៍របស់ IOC ៣រូបដែលបានមកចូលរួមអង្កេតការបោះឆ្នោតជ្រើសរើសប្រធាន IOA សម្តែងក្តីសាទរចំពោះលទ្ធផលបោះឆ្នោត និងសន្យាធ្វើរបាយការណ៍ជាទីគាប់ចិត្តមួយជូនប្រធាន IOC ។ IOC បានកត់សម្គាល់ថា ៖ «ក្រុមអង្កេតការណ៍របស់ IOCបានប្រាប់ទៅសមាជិកក្រុមប្រឹក្សាប្រតិបត្តិថា ការបោះឆ្នោតត្រូវបានរៀបចំដោយគោរពទៅតាមច្បាប់កំពូលរបស់គណៈកម្មាធិការអូឡាំពិកជាតិឥណ្ឌា»។
សេចក្តីសម្រេចលុបចោលបម្រាមនេះនឹងអនុញ្ញាតឱ្យអត្តពលិកឥណ្ឌាមានលទ្ធភាពចូលរួមក្នុងព្រឹត្តិការណ៍ប្រកួតអន្តរជាតិនានាក្រោមទង់ប្រទេសរបស់ខ្លួន ។ IOC បាននិយាយថា ៖ «វាគឺជាលើកដំបូងនៅក្នុងប្រវត្តិសាស្រ្តកីឡាអូឡាំពិកដែលការព្យួរលើគណៈកម្មាធិការអូឡាំពិកជាតិមួយត្រូវបានគេលើកលែងក្នុងអំឡុងពេលប្រកួតកីឡាអូឡាំពិក ហើយការសម្រេចចិត្តនេះនឹងចូលជាធរមាន ភ្លាមតែម្តង ។ អំឡុងពិធីបើកការប្រកួតអូឡាំពិកក្រុងសូជីកាលពីថ្ងៃទី៧ ខែកុម្ភៈ ឆ្នាំ២០១៤អត្តពលិកឥណ្ឌាទាំងអស់បានចូលរួមនៅក្រោមទង់គណៈកម្មាធិការអូឡាំពិកអន្តរជាតិ ហើយពួកគេបានចូលរួមប្រកួតប្រជែងក្នុងនាមជាអត្តលិកអូឡាំពិកឯករាជ្យ
ការសម្រេចចិត្តរបស់ ក្រុមប្រឹក្សាប្រតិបត្តិមានន័យថា ឥឡូវនេះពួកគេ (អត្តពលិកឥណ្ឌា) អាចចូលប្រកួតប្រជែង ក្រោមទង់គណៈកម្មាធិការអូឡាំពិកជាតិឥណ្ឌាហើយពួកគេនឹងដើរពីក្រោយទង់ជាតិរបស់ខ្លួនអំឡុងពិធីបិទការប្រកួតនៅថ្ងៃទី២៣ ខែកុម្ភៈ ។ ដើម្បីទុកជានិមិត្តរូបនៃការលើកលែងបម្រាម ក៏ដូចជាការទទួលស្គាល់អត្តពលិកឥណ្ឌា៣រូបដែលបានចូលរួមប្រកួតប្រជែងនៅក្នុងអូឡាំពិកក្រុងសូជី ទង់ឥណ្ឌានឹងត្រូវបានបង្ហូតឡើងនៅក្នុងភូមិគ្រឹះអូឡាំពិក » ។
សូមរំលឹកថា ឥណ្ឌាត្រូវបានហាមចូលពាក់ព័ន្ធក្នុងរាល់សកម្មភាពដែលជាចលនាអូឡាំពិកកាលពីថ្ងៃទី៤ ខែធ្នូ ឆ្នាំ២០១២ បន្ទាប់ពី IOC រកឃើញថា សមាគម IOA រងការជ្រៀតជ្រែកពីរដ្ឋាភិបាល និងការប្រព្រឹត្តអំពើពុករលួយពីសំណាក់មន្ត្រីជាន់ខ្ពស់សមាគមនេះ ៕
ចែករំលែកព័តមាននេះ