សារព័ត៌មានបរទេសបានឱ្យដឹងថា លោក អ៊ែន ដ្រូវីល ប៉ូលិសផ្នែកស៊ើបអង្កេតក្នុងទីក្រុងស៊ីដនីបានថ្លែងពីលទ្ធផលស៊ើបអង្កេតរបស់ខ្លួនក្រោយពីប្រទះគ្រោងឆ្អឹងមនុស្សនៅក្នុងផ្ទះមួយស្ថិតនៅក្បែរ ស្ថានីយរថភ្លើងកណ្តាលក្រុងស៊ីដនីតាំងពីខែមេសា ២០១០ ថាជាគ្រោងឆ្អឹងរបស់លោកយាយ ណាតាលីវូដ ដែលរស់នៅក្នុងផ្ទះម្នាក់ឯង ។ សមត្ថកិច្ចជំនាញសន្និដ្ឋាន ទាក់ទងនឹងការស្លាប់របស់លោកយាយវូដថា អាចកើតឡើងនៅដើមឆ្នាំ២០០៤ ដោយគាត់អាចដួលនៅក្នុងបន្ទប់ទឹក ដែលមិនអាចក្រោកឡើងបាន ខណៈនៅក្នុងផ្ទះគ្មានបន្ទប់សម្រាន្ត ទូរទស្សន៍ និងទូទឹកកក រីឯទ្រព្យសម្បត្តិដ៏មានតម្លៃ គ្មានស្លាកស្នាមអូសបម្លាស់ទីចេញ និងបាត់បង់ទេ ។
អ្នករស់នៅជិតខាងបានរៀបរាប់ប្រាប់ប៉ូលិសក្នុងន័យដូចគ្នាថា លោកយាយវូដជាមនុស្សឯកោ និងប្រកាន់ណាស់ ទើបបានជាគ្មាននរណាម្នាក់ដឹងថា តើមានអ្វីកើតឡើងទៅលើគាត់ដែលរស់នៅក្នុងផ្ទះនោះ ? លោកយាយនោះបើកទ្វារឱ្យចំពោះតែអ្នកគោះទ្វារ ឬផ្តល់សញ្ញាពិសេសប៉ុណ្ណោះ ។ ក្រៅពីនេះមនុស្សគ្រប់រូបស្ទើរតែគិតថា គាត់បានផ្លាស់ផ្ទះទៅហើយ ។
ចំណែកលទ្ធផលនៃការស៊ើបអង្កេតពីជីវប្រវត្តិលើកដំបូងឃើញថា លោកយាយវូដ កើតនៅក្នុងឆ្នាំ១៩២៤ បច្ចុប្បន្ននៅសល់សាច់ញាតិជាប្អូនថ្លៃស្រី គឺអ្នកស្រីអេនីស ដេវីស និងបង ប្អូនចំនួន៤នាក់ ។ អ្នកស្រីអេនីស ដេវីស បានថ្លែងថាបានជួបលោកយាយវូដ លើកចុងក្រោយ កាលពីខែមករា ២០០៤ ។
សមត្ថកិច្ចបញ្ជាក់ថា នឹងស៊ើបអង្កេតបន្តទៀតខណៈបងប្អូន និងសាច់ញាតិរបស់អ្នកស្លាប់ចាប់ផ្តើមធ្វើលិខិត ដើម្បីសុំចែកទ្រព្យសម្បត្តិនៅក្នុងផ្ទះ ៕
ចែករំលែកព័តមាននេះ