ប្រភពពីបរទេសនាពេលថ្មីៗនេះបានបង្កនូវភាពភ្ញាក់ផ្អើល ខណៈដែលអ្នករចនាម៉ូដគ្រឿងអលង្ការម្នាក់ឈ្មោះ Sruli Recht ជាអ្នករស់នៅក្នុងប្រទេសអង់គ្លេស បានច្នៃចិញ្ចៀនមាសមួយវង់ធ្វើពីមាស ហើយផ្នែកខាងក្រៅស្រោបដោយស្បែករបស់គាត់ផ្ទាល់ ។ ការច្នៃចិញ្ចៀនដ៏អស្ចារ្យនេះ គឺពិតជាកម្របំផុតក្នុងចំណោមអ្នកច្នៃម៉ូដទាំងអស់នៅលើពិភពលោកដែលហ៊ានវះកាត់ស្បែករបស់ខ្លួនមករចនាម៉ូដពីលើចិញ្ចៀនបែបនេះ ។
លោក Sruli បាននិយាយថា «ការច្នៃនូវម៉ូដចិញ្ចៀនដែលស្រោបស្បែកដោយស្បែកគាត់ពីលើមាស មានអ្នកខ្លះបានកោតសរសើរយ៉ាងខ្លាំងពីទេពកោសល្យក្នុងការច្នៃម៉ូដគ្រឿងអលង្ការដ៏អស្ចារ្យ តែក៏មានអ្នកខ្លះគិតថា ជារឿងឆ្កួតលីលា។ សម្រាប់គាត់វិញ នេះគឺជាការលះបង់នូវសាច់ឈាមដោយផ្ទាល់ ពោលគឺគាត់បានវះកាត់ស្បែកពោះរបស់គាត់មួយចំនួន ហើយយកទៅស្រោបពីលើចិញ្ចៀនតែម្តង។ បើយើងមើលទៅវាប្រហាក់ប្រហែលទៅនឹងស្បែករបស់អ្នកដទៃផងដែរ ។ នេះជាលើកដំបូងដែលគាត់វះកាត់ស្បែកពោះខ្លួនឯង ដើម្បីយកមកច្នៃម៉ូដគ្រឿងអលង្ការ ។ ស្បែករបស់គាត់បានយកមកអ៊ុតស្រោបពីលើចិញ្ចៀន គឺបានត្រឹមតែចំនួនពីរតែប៉ុណ្ណោះ ។
ចិញ្ចៀនទាំងពីរនោះ គាត់មានគំរោងនឹងយកទៅដាក់តាំងពិព័រណ៍ជូនសាធារណជនទស្សនាសិន បន្ទាប់មកគាត់នឹងយកវាទៅដាក់ដេញថ្លៃ ។ គាត់អះអាងថា ចិញ្ចៀនដែលមានម៉ូដប្លែកពីចិញ្ចៀនដទៃៗទៀត យ៉ាងហោចណាស់ក៏មានតម្លៃយ៉ាងទាបបំផុតត្រឹម៥០០.០០០ដុល្លារដែរ» ។
លោក Sruli បាននិយាយបន្តទៀតថា «ដើមចមដែលនាំឱ្យគាត់ហ៊ានវះកាត់ប្រថុយនឹងគ្រោះថ្នាក់បែបនេះ គឺមិនមែនចង់បានតែលុយនោះទេ ក៏ប៉ុន្តែសំខាន់បំផុតគឺទទួលបានជោគជ័យក្នុងជំនាញជាអ្នកច្នៃម៉ូដគ្រឿងអលង្ការដែលមានកេរ្តិ៍ឈ្មោះល្បីល្បាញម្នាក់ ។ យ៉ាងណាមិញ គាត់នឹងខិតខំច្នៃប្រឌិតបែបណា ដើម្បីឱ្យគ្រឿងអលង្ការមានម៉ូដប្រកបដោយភាពស្រស់ស្អាត និងទាក់ទាញអតិថិជន» ៕
ចែករំលែកព័តមាននេះ