ការចរចាវគ្គទី២ស្តីពីសុីរីក្នុងក្របខណ្ឌនៃសន្និសីទហៅហ្សឺណែវ-២ បានចាប់ផ្តើមកាលពីថ្ងៃទី១០ កុម្ភៈ នៅវិមាន អ.ស.ប ប្រចាំក្រុងហ្សឺណែវ ។ តំណាងរួមរបស់ អ.ស.ប និងសម្ព័ន្ធអារ៉ាប់ទទួលបន្ទុកបញ្ហាសុីរី លោកឡាខាដា ប្រាហុីមី បានជួបនាព្រឹកថ្ងៃទី១០ កុម្ភៈ នោះជាមួយគណៈប្រតិភូរបស់ពួកប្រឆាំងសុីរីមុនពេលជួបជាមួយគណៈប្រតិភូរបស់រដ្ឋាភិបាល ។ គណៈប្រតិភូទាំង២ត្រូវជួបគ្នាជាលើកទី២ ចាប់តាំងពីពាក់កណ្តាលខែមករាមក ដើម្បីប៉ុនប៉ងស្វែងរកដំណោះស្រាយមួយនៃវិបត្តិអូសបន្លាយក្នុងប្រទេសពួកគេ។
ការចរចាវគ្គទីមួយដែលធ្វើពីថ្ងៃទី២២ ទៅ៣១ មករា នៅប្រទេសស្វ៊ីស ពុំអាចទទួលបានការរីកចម្រើននានាឡើយ ។ ភាគីទាំង២បានពិភាក្សាគ្នាពីសភាពការណ៍នៅសុីរី ដែលហែកហួរដោយសង្គ្រាម ពិសេសសភាពការណ៍នៅទីក្រុងហូម ។ក្រោយការចរចាវគ្គទីមួយ លោកប្រាហុីមី ចាត់ការចរចានោះថា ជាការចាប់ផ្តើមដ៏លំបាកលំបិនមួយ ។ ចំណែកនៅលើទីលានវិញ អគ្គបញ្ជាការដ្ឋានកងទ័ពសុីរី ថ្លែងកាលពីថ្ងៃទី១០ កុម្ភៈ ថា ការវាយប្រហារនាពេលមុននេះរបស់ពួកឧទ្ទាមប្រឆាំងភូមិមួយក្នុងខេត្តហាម៉ា ភាគកណ្តាលប្រទេស បណ្តាលឱ្យមនុស្សស្លាប់៤២នាក់ ។
ក្នុងសេចក្តីប្រកាសមួយកងទ័ពសុីរីថ្លែងថា ក្រុមរណសិរ្សអាល់ណូស្ត្រា មានទំនាក់ទំនងជាមួយអាល់កៃដា បានសម្លាប់មនុស្ស៤២នាក់ ក្រោយការវាយលុករបស់គេកាលពីថ្ងៃទី៩ កុម្ភៈ ក្នុងទីក្រុងម៉ាអាន ។ ពួកឧទ្ទាមបានវាយប្រហារលើទីក្រុងនោះដោយប្រើមនុស្សច្រើន និងអាវុធគ្រប់ធុន ហើយដោយដើរដុត និងធ្វើការបំផ្លិចបំផ្លាញ ។ លើសពីនេះទៀត ពួកវាយប្រហារបានចាប់បង្ខំប្រជាជនឱ្យចេញពីផ្ទះសម្បែង ៕
ចែករំលែកព័តមាននេះ