រាជធានីភ្នំពេញ ៖ បុរសជាអតីតប្តីម្នាក់ត្រូវសមត្ថកិច្ចចាប់ឃាត់ខ្លួន បន្ទាប់ពីបានមករឿងឈ្លោះវាយតប់ជាមួយប្រពន្ធ ដែលបានលែងលះគ្នាជាង ១ឆ្នាំ ទៅហើយ និងបានធ្វើឲ្យមានរបួសដល់កូនប្រុសអាយុ ១៨ឆ្នាំ ម្នាក់ទៀតផងដែរ ដែលហេតុការណ៍ហិង្សានេះ បង្កឲ្យមានការភ្ញាក់ផ្អើលដល់ប្រជាពលរដ្ឋ កាលពីវេលាម៉ោង ៦ និង ១៥នាទី ល្ងាចថ្ងៃទី១០ កុម្ភៈ ២០១៤ នៅចំណុចហាងកាហ្វេ ១កន្លែង យីហោ បូរ៉ាឈី ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
អតីតបប្តីបង្កហិង្សាមានឈ្មោះ ញ៉ា សុខ អាយុ ៤៤ឆ្នាំ មុខរបរជាមន្រ្តីពេទ្យយោធាក្រសួងការពារជាតិ ចំណែកប្រពន្ធមិនត្រូវបានឲ្យស្គាល់អត្តសញ្ញាណឡើយ។ ក្រុមគ្រួសារនេះ មានកូនចំនួន ៥នាក់ ប្រុស៤ ស្រី១។ តាមសម្ដីប្រពន្ធបានឲ្យដឹងថា ពួកគាត់បានលែងលះគ្នាជាង ១ឆ្នាំ ទៅហើយ ដោយខាងប្រពន្ធបង់លុយឲ្យប្តី ៥ពាន់ដុល្លារ ចំណែកកូនៗ រស់នៅជាមួយម្តាយ។ ប៉ុន្តែ តាំងពីលែងលះជាមក បុរសជាប្តីតែងតែមករករឿងឈ្លោះជាញឹកញាប់ និងប្រើហិង្សាលើប្រពន្ធកូនទៀតផង។
ជាក់ស្តែងនៅថ្ងៃកើតហេតុនេះ បុរសជាប្តីបានមករករឿងឈ្លោះក្នុងគ្រួសារ និងបានយកកាំភ្លើងភ្ជង់គំរាម ព្រមទាំងប្រើដំបងឆក់ទៀតផង ទើបគាត់ (ប្រពន្ធ) និងកូនប្រុស ព្រួតគ្នាវាយតបតទៅវិញបង្កការភ្ញាក់ផ្អើលតែម្តង។ ខណៈនោះ សមត្ថកិច្ចក៏បានចុះមកអន្តរាគមន៍ ដោយចាប់ឃាត់ខ្លួនបុរសជាប្តីនាំទៅធ្វើការសាកសួរ និងដកហូតបានកាំភ្លើងខ្លីម៉ាកលុក ១ដើម រួមនិងដំបងឆក់មួយផងដែរ៕
ចែករំលែកព័តមាននេះ