រាជធានីភ្នំពេញ ៖ ស្ត្រីម្នាក់ ត្រូវបានកម្លាំងកងរាជអាវុធហត្ថខេត្តកំពង់ធំ ស្រាវជ្រាវហើយឈានទៅសហការជាមួយកងរាជអាវុធហត្ថរាជធានីភ្នំពេញ ឃាត់ខ្លួនពាក់ព័ន្ធករណីមិនបំពេញកាតព្វកិច្ចចំពោះឧបករណ៍អាចជួញដូរបាន (មូលប្បទានបត្រគ្មានសាច់ប្រាក់ ឬសែកស្អុយ) ។ ស្ត្រីរូបនោះឈ្មោះពិន…
រាជធានីភ្នំពេញ ៖ ស្ត្រីម្នាក់ ត្រូវបានកម្លាំងកងរាជអាវុធហត្ថខេត្តកំពង់ធំ ស្រាវជ្រាវហើយឈានទៅសហការជាមួយកងរាជអាវុធហត្ថរាជធានីភ្នំពេញ ឃាត់ខ្លួនពាក់ព័ន្ធករណីមិនបំពេញកាតព្វកិច្ចចំពោះឧបករណ៍អាចជួញដូរបាន (មូលប្បទានបត្រគ្មានសាច់ប្រាក់ ឬសែកស្អុយ) ។
ស្ត្រីរូបនោះឈ្មោះពិន រស្មី អាយុ ២០ឆ្នាំ រស់នៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។
តាមកងរាជអាវុធហត្ថខេត្តកំពង់ធំ បានឲ្យដឹងថា ដោយមានការអនុញ្ញាតពីលោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ និងដោយមានការសម្របសម្រួលពីស្នងការស្រាវជ្រាវ និងបង្ក្រាបបទល្មើសកងរាជអាវុធហត្ថលើផ្ទៃប្រទេស និងដោយមានការសម្របសម្រួលនីតិវិធីពីលោកព្រះរាជអាជ្ញាខេត្តកំពង់ធំ និងលោកព្រះរាជអាជ្ញារាជធានីភ្នំពេញ នៅថ្ងៃទី២៧ ខែសីហា ឆ្នាំ២០២៥ វេលាម៉ោង ១៣ និង៤០នាទី កម្លាំងមន្ទីរស្រាវជ្រាវ ដឹកនាំដោយលោកវីរសេនីយ៍ទោ គង់ ជាន ប្រធានមន្ទីរ ស្រាវជ្រាវ និងបង្ក្រាបបទល្មើសកងរាជអាវុធហត្ថ ខេត្តកំពង់ធំ បានចុះពន្លាតដែនដី សហការជាមួយកងរាជអាវុធហត្ថរាជធានីភ្នំពេញ ចុះអនុវត្តដីកាបង្គាប់ឲ្យចាប់ខ្លួនលេខ២៦០ “ជ” ចុះថ្ងែទី០៩ ខែកក្តដា ឆ្នាំ២០២៥ ចេញដោយលោក ផាន់ រ័ត្នរិត្យា ចៅក្រមស៊ើបសួរ នៃអយ្យការអមសាលាដំបូងខេត្តកំពង់ធំ នៅចំណុចបុរីអារ៉ាខាវ៉ាថោនសឃ្វែរ ដែលស្ថិតនៅភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ ពាក់ព័ន្ធករណីមិនបំពេញកាតព្វកិច្ចចំពោះឧបករណ៍អាចជួញដូរបាន (សមត្ថកិច្ចមិនបញ្ជាក់ចំនួនទឹកប្រាក់ឡើយ) ។
បច្ចុប្បន្ន ជនសង្ស័យ ត្រូវបានកម្លាំងជំនាញការិយាល័យព្រហ្មទណ្ឌ កងរាជអាវុធហត្ថរាជធានីភ្នំពេញ បានប្រគល់ឲ្យទៅកងរាជអាវុធហត្ថខេត្តកំពង់ធំ ដើម្បីអនុវត្តបន្តតាមនីតិវិធី ៕
ចែករំលែកព័តមាននេះ